Crime In Odisha / SCB ମେଡିକାଲକୁ ଚିକିତ୍ସା ପାଇଁ ଆସିଥିଲେ, ହେଲେ ଲଜ୍‌ରୁ ମିଳିଲା ମହିଳାଙ୍କ ମୃତଦେହ

କଟକ: କଟକ ମଙ୍ଗଳାବାଗ ମେଡିକାଲ ରୋଡ୍‌ରେ ଥିବା ଏକ ଲଜ୍‌ରୁ ସନ୍ଦେହଜନକ ଅବସ୍ଥାରେ ଉଦ୍ଧାର ହୋଇଥିବା ମହିଳାଙ୍କ ମୃତଦେହ ସୃଷ୍ଟି କରିଛି ବଡ଼ ସନ୍ଦେହ । ପୋଲିସ ଏହି ଘଟଣାର ତଦନ୍ତ ଆରମ୍ଭ କରିଛି ।

ମହିଳାଙ୍କ ସହ ଲଜ୍‌କୁ ଆସିଥିବା ପୁରୁଷ ବନ୍ଧୁ ଜଣକ କିଏ ? ସେ ଏବେ କେଉଁଠି ? ସେହି ନେଇ ଏକ ସ୍ୱତନ୍ତ୍ର ଟିମ୍ ଗଠନ କରାଯାଇ ଚଢ଼ାଉ ଜାରି ରଖିଛି ପୋଲିସ । ତେବେ ଏହା ଏକ ହତ୍ୟାକାଣ୍ଡ ନା ଅନ୍ୟ କିଛି, ତାହା ପୋଷ୍ଟମର୍ଟମ ରିପୋର୍ଟ ଆସିବା ପରେ ସ୍ପଷ୍ଟ ହେବ ବୋଲି ପୋଲିସ କହିଛି ।

ଏଥିସହ ପଢ଼ନ୍ତୁ: ପାର୍ବଣ ପୂର୍ବରୁ ଗଡ଼ିଲା ମୁଣ୍ଡ; ସାଙ୍ଗର ଗଳା କାଟିଲା ସାଙ୍ଗ 

ମଙ୍ଗଳାବାଗ ଥାନା ଅନ୍ତର୍ଗତ ମେଡିକାଲ ରୋଡ୍‌ରେ ଥିବା 'ବିନାୟକ ଲଜ୍'ର ରୁମ୍ ନମ୍ବର ୧୨୫ରୁ ମହିଳାଙ୍କ ମୃତଦେହ ଉଦ୍ଧାର । ମୃତକଙ୍କ ଘର ବାଲେଶ୍ୱର ଜିଲ୍ଲାରେ । ସେ ଏସସିବି ମେଡିକାଲକୁ ଚିକିତ୍ସା ପାଇଁ ଆସିଥିଲେ । ଲଜ୍‌ର ବାଥରୁମ୍‌ରୁ ମହିଳାଙ୍କ ମୃତଦେହ ମିଳିଥିଲା ।

ମୃତକଙ୍କ ନାକରେ ଲାଗିଥିଲା ତୁଳା, ଆଖି ଥିଲା ଖୋଲା ଏବଂ ବାଥରୁମ୍‌ର ଅସ୍ୱାଭାବିକ ଅବସ୍ଥାରେ ପଡ଼ିଥିଲା ମୃତଦେହ । ମହିଳା ସହ ଲଜ୍‌କୁ ଆସିଥିବା ପୁରୁଷ ବନ୍ଧୁ ଜଣକ ବର୍ତ୍ତମାନ ଫେରାର ଅଛନ୍ତି । ପୋଲିସ ଲଜ୍ ଆଖପାଖର ସିସିଟିଭି ଫୁଟେଜ୍, ମହିଳାଙ୍କ ବ୍ୟାଗ୍ ଓ ମୋବାଇଲ୍ ଫୋନ୍ ଜବତ କରି ତଦନ୍ତ ଚଳାଇଛି ।

ଶୁକ୍ରବାର ସନ୍ଧ୍ୟା ପାଖାପାଖି ୬.୩୦ ମିନିଟ୍ ସମୟରେ ନିଜ ପୁରୁଷ ବନ୍ଧୁଙ୍କ ସହ କଟକ ମଙ୍ଗଳାବାଗ ସ୍ଥିତ ବିନାୟକ ଲଜ୍‌କୁ ଆସିଥିଲେ । ଶନିବାର ଏସସିବି ମେଡିକାଲର ସ୍ତ୍ରୀ ଓ ପ୍ରସୂତି ବିଭାଗରେ ଚିକିତ୍ସା କରିଥିଲେ ବୋଲି ତାଙ୍କ ମେଡିକାଲ ରିପୋର୍ଟରୁ ଜଣା ପଡ଼ିଛି ।

ଏଥିସହ ପଢ଼ନ୍ତୁ: ଗୋଟିଏ ଦିନରେ ହୃଦ୍‌ଘାତରେ ଚାଲିଗଲା ସ୍ୱାମୀ ଓ ସ୍ତ୍ରୀଙ୍କ ଜୀବନ 

କିନ୍ତୁ, ତାଙ୍କ ସହ ଆସିଥିବା ସେ ପୁରୁଷ ବନ୍ଧୁ କିଏ ? ଲଜ୍ ବାଥରୁମ୍‌ରେ ପ୍ରକୃତରେ କ'ଣ ଘଟିଥିଲା ? ମୃତ୍ୟୁ ପଛରେ ରହିଛି କି କୌଣସି ଗୂଢ଼ ରହସ୍ୟ ? ଏହା ଏକ ହତ୍ୟାକାଣ୍ଡ ନା ଅସ୍ୱାଭାବିକ ମୃତ୍ୟୁ ? ଏହି ଘଟଣାର ରହସ୍ୟ ଉପରୁ ପରଦା ଉଠାଇବା ଯେତିକି ଚ୍ୟାଲେଞ୍ଜପୂର୍ଣ୍ଣ, ତା'ଠାରୁ ଅଧିକ ଚ୍ୟାଲେଞ୍ଜ ହେଉଛି ଫେରାର ଥିବା ପୁରୁଷ ବନ୍ଧୁଙ୍କୁ ଧରିବା ।