Pothole / ବିଭାଗ ବିଭାଗ ଭିତରେ ରହୁନି ସମନ୍ଵୟ; ମୌସୁମୀ ବର୍ଷା ଭିତରେ ଯନ୍ତ୍ରଣା ଦେଉଛି ରାସ୍ତା

କଟକ: ମୌସୁମୀ ବର୍ଷା ଠାରୁ ଅଧିକ ଚିନ୍ତା ବଢ଼େଇଲାଣି ବିପର୍ଯ୍ୟସ୍ତ ରାସ୍ତା । କେଉଁଠି ଖାଲଖମା ତ କେଉଁଠି ସୃଷ୍ଟି ହୋଇଛି ବଡ଼ ବଡ଼ ଗର୍ତ୍ତ । ଗଳିକନ୍ଦି ହେଉ କିମ୍ବା ରିଂ-ରୋଡ । ଯୁଆଡେ ଦେଖିଲେ ସିଆଡ଼େ କେବଳ ବିପର୍ଯ୍ୟସ୍ତ ରାସ୍ତା । ୫୨ ବଜାର ୫୩ ଗଳିର ସହର କଟକର ଯୁଆଡ଼େ ଯିବେ ସବୁଠି ସମାନ ଅବସ୍ଥା ।

କଟକ ସହର ବାସିନ୍ଦାଙ୍କୁ ବର୍ତ୍ତମାନ ଏହି ରାସ୍ତା ସବୁ ନାକେଦମ୍ କଲାଣି । ବିଭାଗ ବିଭାଗ ମଧ୍ୟରେ ସମନ୍ୱୟ ଅଭାବ ଯୋଗୁଁ ଯନ୍ତ୍ରଣା ଭୋଗୁଛନ୍ତି ସହରବାସୀ । ବାରମ୍ବାର ଅଭିଯୋଗ ପରେ ମଧ୍ୟ ସୁଧୁରି ପାରୁନି ବିପର୍ଯ୍ୟସ୍ତ ରାସ୍ତାର ଅବସ୍ଥା ।

ଏଥିସହ ପଢ଼ନ୍ତୁ: ରାଜଧାନୀରେ ମାତିଛନ୍ତି ଲୁଟେରା; ସ୍ପିଡ଼ ବାଇକରେ ଆସି ଝାମ୍ପି ନେଲେ 

କଟକ ସହରର ବିଭିନ୍ନ ସ୍ଥାନରେ ବିଭିନ୍ନ ପ୍ରକଳ୍ପ ପାଇଁ ରାସ୍ତା ଖୋଳି କାମ କରିବା ପରେ ସୃଷ୍ଟି ହୋଇଯାଉଛି ଏପରି ବଡ଼ ବଡ଼ ଗାତ । କେବଳ ଏତିକି ନୁହେଁ, ସହରର ଗଳିକନ୍ଦି ଓ ରିଂ-ରୋଡରେ ମାସ ମାସ ଧରି ବିପର୍ଯ୍ୟସ୍ତ ଅବସ୍ଥାରେ ପଡ଼ି ରହୁଛି ରାସ୍ତାଘାଟ ।

କେଉଁଠି ପିଚୁ ଉଠି ଯାଇଛି ତ, ଆଉ କେଉଁଠି କଂକ୍ରିଟ । ବିଭାଗ ବିଭାଗ ମଧ୍ୟରେ ସମନ୍ୱୟର ଅଭାବ ଯୋଗୁଁ ସହରବାସୀ ହନ୍ତସନ୍ତ ହେଉଛନ୍ତି, ଯନ୍ତ୍ରଣା ଭୋଗୁଛନ୍ତି । ଯାହାକୁ ନେଇ କଟକ ମହାନଗର ନିଗମ ଓ ଜିଲ୍ଲା ପ୍ରଶାସନ ଉପରେ ଅସନ୍ତୋଷ ଝାଡ଼ିଛନ୍ତି ସହରବାସୀ ।

କଟକ ମହାନଗର ନିଗମ ଅଧୀନରେ ମୋଟ ୮୬୦.୫୭ କିମି ରାସ୍ତା ରହିଛି । ସେଥିରୁ ୪୦୩.୦୭ କିମି କଂକ୍ରିଟ ରାସ୍ତା, ୩୭୮.୩୦ କିମି ହେଉଛି ପିଚୁ ରାସ୍ତା । ୭୯.୨୦ କିମି ଅନ୍ୟାନ୍ୟ ରାସ୍ତା ରହିଛି । ସେହିପରି ଆରଏଣ୍ଡବି ଅଧୀନରେ ସହରର ମୋଟ ୧୨୯ କିମି ରାସ୍ତା ରହିଛି ।

ଏଥିସହ ପଢ଼ନ୍ତୁ: ଜ୍ୱରରୁ ଉଠି ସମ୍ପୂର୍ଣ୍ଣ ସୁସ୍ଥ ହେଲେଣି ବିଶ୍ଵ ନିଅନ୍ତା, ମଙ୍ଗଳବାର ନବଯୌବନ ଦର୍ଶନ ଦେବେ ଶ୍ରୀଜିଉ 

ସେଥିରୁ ୧୭ କିମି ରିଂ ରୋଡ, ମର୍କତନଗର ଓ ସିଡିଏକୁ ମିଶାଇ ୬୫ କିମି ରାସ୍ତା, ଓ OMP ଛକରୁ ବିଜୁ ପଟ୍ଟନାୟକ ଛକ ପର୍ଯ୍ୟନ୍ତ ୪୭ କିମି ରାସ୍ତା ରହିଛି । ତେବେ ଏ ସବୁ ରାସ୍ତାରୁ ଅଧିକାଂଶ ରାସ୍ତାର ଅବସ୍ଥା ବିପର୍ଯ୍ୟସ୍ତ ହୋଇ ପଡ଼ିଛି ।

କଟକ ଜିଲ୍ଲାପାଳ ଦତ୍ତାତ୍ରୟ ଭାଉସାହେବ ସିନ୍ଦେ କହିଛନ୍ତି, "ଖରାପ ରାସ୍ତାର ମରାମତି କରାଯାଉଛି । ଯେଉଁଠି ତୁରନ୍ତ ରାସ୍ତାର ମରାମତି ଆବଶ୍ୟକ କରୁଛୁ । ବର୍ଷା ଶେଷ ହେବା ପରେ ସ୍ଥାୟୀ ଭାବେ ରାସ୍ତା କାମ କରାଯିବ ।" ତେବେ କଟକ ସହରର ବିପର୍ଯ୍ୟସ୍ତ ରାସ୍ତାର ଅବସ୍ଥାରେ କେବେ ସୁଧାର ଆସୁଛି, ତାହା ଦେଖିବାକୁ ବାକି ରହିଲା ।