କଟକ: ରାଜ୍ୟର ସବୁଠୁ ପୁରୁଣା ବଡ଼ ମେଡିକାଲ କଟକ ଏସ୍‌ସିବି । ଚିକିତ୍ସା ପାଇଁ ରହିଛି ଅନେକ ସୁନାମ । ଯେଉଁଥିପାଇଁ କଟକକୁ ସାରା ରାଜ୍ୟ ସହ ପଡ଼ୋଶୀ ପଶ୍ଚିମବଙ୍ଗ, ବିହାର, ଝାଡ଼ଖଣ୍ଡରୁ ବି ରୋଗୀ ସୁସ୍ଥ ହେବା ପାଇଁ ଦୌଡ଼ି ଆସନ୍ତି ।

ଚିକିତ୍ସା ପାଇଁ ଅନେକ ସୁନାମ ପାଇଥିବା ବଡ଼ ମେଡିକାଲ୍ ଏବେ ଅବ୍ୟବସ୍ଥା ପାଇଁ ଦୁର୍ନାମ ମୁଣ୍ଡାଉଛି । କଟକ ଶ୍ରୀରାମଚନ୍ଦ୍ର ଭଞ୍ଜ ବଡ଼ ମେଡିକାଲ୍‌ରେ ଅଘଟଣ ଘଟିଛି । ପୁରୁଣା ମେଡିସିନ୍ ୱାର୍ଡରେ ରୋଗୀଙ୍କ ଚିକିତ୍ସା ଚାଲିଥିବା ବେଳେ ଖସି ପଡ଼ିଛି ସିଲିଂ । ତାହା ପୁଣି ରୋଗୀଙ୍କ ମୁଣ୍ଡ ଉପରେ ।

ଏଥିସହ ପଢ଼ନ୍ତୁ: ୩ ଦିନ ଶୀତ ଲହରୀ, ୫ ଦିନ ଘନ କୁହୁ଼ଡ଼ି; ଚେତାଇଲା ପାଣିପାଗ ବିଭାଗ

ଯାହାକୁ ନେଇ କଟକ ବଡ଼ ମେଡିକାଲ୍ ରୋଗୀଙ୍କ ପାଇଁ କେତେ ସୁରକ୍ଷିତ ବୋଲି ପ୍ରଶ୍ନ ଉଠିଲାଣି । ସୂଚନା ଅନୁସାରେ, ଏସ୍‌ସିବିର ପୁରୁଣା ମେଡିସିନ୍ ୱାର୍ଡରେ ରୋଗୀଙ୍କ ଚିକିତ୍ସା ଚାଲିଥିଲା । ରୋଗୀଙ୍କ ଠାରେ ଭେଣ୍ଟିଲେଟର ମଧ୍ୟ ଲାଗିଥିଲା ।

ଅର୍ଥାତ୍ ରୋଗୀ ଜଣଙ୍କ ସ୍ଵାସ୍ଥ୍ୟାବସ୍ଥା ପୂର୍ବରୁ ହିଁ ଗୁରୁତର ଥିଲା । ଏବେ ତାଙ୍କ ମୁଣ୍ଡ ଉପରେ ସିଲିଂ ଖସି ପଡ଼ିବା ପରେ ସେ ଆହୁରି ଗୁରୁତର ହୋଇ ପଡ଼ିଛନ୍ତି । ରୋଗୀ ଜଣଙ୍କ ଚିକିତ୍ସା ଆରମ୍ଭ ହୋଇଛି ।

ଏଥିସହ ପଢ଼ନ୍ତୁ: ସମାଜ ସେବାରେ ସମର୍ପିତ ଅଟୋ ଚାଳକ; କର୍କଟ ରୋଗୀଙ୍କ ମୁହଁରେ ଫୁଟାଉଛନ୍ତି ହସ

ତେବେ କଟକ ଏସ୍‌ସିବିରେ ଏହା ପ୍ରଥମ ଘଟଣା ନୁହେଁ । ବିଭିନ୍ନ ସମୟରେ ସିଲିଂର ରକ୍ଷଣାବେକ୍ଷଣ ଅଭାବ ଏବଂ ପରିବର୍ତ୍ତନ ନ ହେବା ଯୋଗୁଁ ଏଭଳି ଅଘଟଣ ଘଟୁଛି । ଏଠି ରୋଗୀ ସୁସ୍ଥ ହେବା ପାଇଁ ବଡ଼ ମେଡିକାଲ୍ ଆସିଥିବା ବେଳେ ସିଲିଂ ଖସି ତାଙ୍କ ମୁଣ୍ଡରେ ପଡ଼ିବାରୁ ସେ ଅଧିକ ଅସୁସ୍ଥ ହୋଇ ପଡ଼ିଛନ୍ତି ।

#କଟକ_ଏସସିବି_ମେଡ଼ିକାଲରେ_ଅଘଟଣ
SCBରେ ସିଲିଂ ଖସି ରୋଗୀ ଗୁରୁତର#Cuttack #SCB #CeilingCollapses #Odisha #ArgusNews #ArgusStaticPost #ArgusUpdate pic.twitter.com/01YOu77enR

— Argus News (@ArgusNews_in) January 7, 2026

ପୁରୁଣା ମେଡିସିନ୍ ୱାର୍ଡରେ ସିଲିଂ ଖସିବାକୁ ନେଇ ରୋଗୀ ଓ ସମ୍ପର୍କୀୟଙ୍କ ମଧ୍ୟରେ ଚାପା ଉତ୍ତେଜନା ଦେଖିବାକୁ ମିଳିଛି । ବୃଦ୍ଧ ରୋଗୀଙ୍କ ମୁଣ୍ଡରେ କେଉଁ ସ୍ଥିତିରେ ସିଲିଂ ଖସି ପଡ଼ିଲା ତାର ତଦନ୍ତ ଆରମ୍ଭ କରିଛନ୍ତି ଏସ୍‌ସିବି ମେଡିକାଲ୍ କର୍ତ୍ତୃପକ୍ଷ ।

ଏହା ପୂର୍ବରୁ ୨୦୨୫ ଜାନୁଆରୀ ୧୮ରେ କଟକ ଏସ୍‌ସିବି ଟ୍ରମା କାଜୁଆଲିଟିରେ ସିଲିଂ ଖସିଥିଲା । ସହାୟିକା ଓ ରୋଗୀଙ୍କ ସମ୍ପର୍କୀୟ ବସିଥିବା ବେଳେ ହଠାତ୍ ଛାତର ସିଲିଂ ଖସି ପଡ଼ିଥିଲା । ସୌଭାଗ୍ୟବଶତଃ ସେତେବେଳେ କେହି ଆହତ ହୋଇ ନଥିଲେ । ଆଉ ଏବେ ଚିକିତ୍ସାଧିନ ରୋଗୀଙ୍କ ମୁଣ୍ଡ ଉପରେ ସିଲିଂ ଖସି ପଡ଼ିଛି ।