ଅର୍ଗସ ବ୍ୟୁରୋ : ହଜିବାକୁ ବସିଲାଣି କଟକର ତାରକସୀ କାମ । କାମ କରୁଥିବା କାରିଗରଙ୍କୁ ମିଳୁନି ପ୍ରୋତ୍ସାହନ ।ଜିଆଇ ମାନ୍ୟତା ପାଇଲା ପରେ ଏବେ ହବ୍ ପାଇଁ ହେଲାଣି ଦାବି । ଦିନେ ଥିଲା ହଜାର ବର୍ଷର ସହର କଟକର ଗଳିକନ୍ଦିରେ ଥିଲେ ରୂପା ତାରକସୀ କାରିଗର । ସୁନ୍ଦର ସୁନ୍ଦର ରୂପା ତାରକସୀ କାର୍ଯ୍ୟ କରି ଭଲ ବ୍ୟବସାୟ କରିବା ସାଙ୍ଗକୁ ପ୍ରଶଂସା ସାଉଁଟୁଥିଲେ । ପ୍ରଥମେ ମଧୁବାବୁ ଓ ପରେ ବିଜୁ ବାବୁ କଟକର ରୂପା ତାରକସୀ କାର୍ଯ୍ୟର ପ୍ରଚାର ପ୍ରସାର, ତାରକସୀ କାରୀଗରଙ୍କୁ ବଞ୍ଚେଇ ରଖିବା, କଟକକୁ ତାରକସୀ କାର୍ଯ୍ୟର ହବ କରିବା ଦେଖିଥିଲେ ସ୍ବପ୍ନ । ଏଥିପାଇଁ ବିଂଶ ଶତାବ୍ଦୀରେ ଉତ୍କଳ ୱାର୍କ ଫ୍ୟାକ୍ଟ୍ରି ପ୍ରତିଷ୍ଠା କରିଥିଲେ ମଧୁବାବୁ । ତାହା ବନ୍ଦ ହେବା ପରେ ୧୯୬୨ ମସିହାରେ ତତ୍କାଳୀନ ଶିଳ୍ପମନ୍ତ୍ରୀ ବିଜୁ ପଟ୍ଟନାୟକ ଖପୁରିଆରେ ପ୍ରତିଷ୍ଠା କରିଥିଲେ କଳିଙ୍ଗ ଫିଲିଗ୍ରୀ ସମବାୟ ସମିତି ।

କଟକ ସହରର ରୂପା ତାରକସୀ କାରିଗର କାର୍ଯ୍ୟ କରିବା ସହ ଭଲ ରୋଜଗାର କରୁଥିଲେ । ତେବେ ତାହା ବନ୍ଦ ହେବା ପରେ ତାରକସୀ ପେଶାରୁ ଅନେକ କାରିଗର ଦୂରେଇ ଯାଇଛନ୍ତି । ସେମାନଙ୍କ ଭବିଷ୍ୟତ ପୀଢ଼ି ଆଉ ସେହି ପେଶାକୁ ଆସୁନାହାନ୍ତି । ସରକାରଙ୍କ ଉଦାସୀନତା ଯୋଗୁଁ ଏବେ କଟକ ସହରରେ ଖାଣ୍ଟି କଟକିଆ ରୂପା ତାରକସୀ କାରୁକାର୍ଯ୍ୟ ଧିମେଇ ଯାଇଛି । ଭଲ ବଜାର ନଥିବା ଏବଂ ପ୍ରୋତ୍ସାହନ ନମିଳିବା ଯୋଗୁଁ ଏହି ପେଶାରୁ ମୁହଁ ମୋଡ଼ି ଦେଇଛନ୍ତି ଅନେକ କାରିଗର ।

ଅଧିକ ପଢନ୍ତୁ ଓଡ଼ିଶା ଖବର

ଯାହାଫଳରେ ଏବେ କଟକ ବଜାରରେ କଲିକତା ରୂପା ତାରକସୀ ଅଳଙ୍କାର ବିକ୍ରୀ ହେଉଛି। ତଥାପି ଏମାନଙ୍କୁ ପ୍ରୋତ୍ସାହନ ମିଳିଲେ ଏହି କାର୍ଯ୍ୟକୁ ଜୋର୍ ଦିଆଯିବ। ଏ ନେଇ କଟକ ମହାନଗର ନିଗମ ପକ୍ଷରୁ ସମସ୍ତ ପ୍ରକାରର ସହଯୋଗ ଯୋଗେଇ ଦିଆଯିବ ବୋଲି ଅର୍ଗସକୁ ପ୍ରତିକ୍ରିୟା ଦେଇ କହିଛନ୍ତି ମେୟର ସୁବାସ ସିଂ । ତରକାରୀ କାର୍ଯ୍ୟକୁ ପ୍ରୋତ୍ସାହନ ଦେବା ଲାଗି ରାଜ୍ୟ ସରକାରଙ୍କ ତରଫରୁ କି ପଦକ୍ଷେପ ନିଆଯାଉଛି ତାହା ଦେଖିବାକୁ ବାକି ରହିଲା ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV