Unsafe Building / ୩ ଜୀବନ ଯିବା ପରେ ଚେତିଲା ପ୍ରଶାସନ; କଟକରେ ଭଙ୍ଗାଯିବ ଅସୁରକ୍ଷିତ କୋଠା

କଟକ: ଆପାର୍ଟମେଣ୍ଟ ବାଲକୋନି ଭୁଶୁଡ଼ିଲା, ୩ ଜୀବନ ଗଲା । ବାପା, ପୁଅ ଓ ନାତି ଆଖି ବୁଜିବା ପରେ ପ୍ରଶାସନର ଚେତା ପଶିଛି । ମଣିସାହୁ ଛକ ହାଡ଼ିବନ୍ଧୁ ସ୍କୁଲ ନିକଟରେ ଥିବା ଶୁଭମ୍ କମ୍ପ୍ଲେକ୍ସ ଆପର୍ଟମେଣ୍ଟର ବାଲକୋନୀ ଭୁଶୁଡ଼ିବା ଘଟଣାର ତଦନ୍ତ ପାଇଁ ଉଚ୍ଚସ୍ତରୀୟ କମିଟି ଗଠନ କରାଯାଇଛି ।

ଗତ ଅଗଷ୍ଟ ମାସରେ କଟକ ସହରରେ ୨୨୧ଟି ଅସୁରକ୍ଷିତ କୋଠା ଥିବା ହାଇକୋର୍ଟଙ୍କୁ ଅବଗତ କରାଇଥିଲା ପ୍ରଶାସନ । ଏପରିକି ଆଇନ୍ ଅନୁଯାୟୀ ସମସ୍ତଙ୍କୁ କୋଠା ଖାଲି କରିବା ପାଇଁ ନୋଟିସ୍ ପଠା ଯାଇଥିବା ଅତିରିକ୍ତ ଜିଲ୍ଲାପାଳ ସତ୍ୟପାଠ ଦାଖଲ କରିଥିଲେ ।

ଏଥିସହ ପଢ଼ନ୍ତୁ: କଟକ ସହରରେ ୨୨୧ଟି ଅସୁରକ୍ଷିତ କୋଠା ଚିହ୍ନଟ, କୋଠା ଖାଲି କରିବାକୁ ନୋଟିସ୍

ଅଗଷ୍ଟରେ ପ୍ରଶାସନ ଚିହ୍ନଟ କରିଥିବା ୨୨୧ଟି ଅସୁରକ୍ଷିତ କୋଠା ଭିତରେ ଶନିବାର ଭୁଶୁଡ଼ିଥିବା ଶୁଭମ୍ କମ୍ପ୍ଲେକ୍ସ ଆପର୍ଟମେଣ୍ଟ ଅଛି ନା ନାହିଁ ତାହା ସ୍ପଷ୍ଟ ହୋଇ ନାହିଁ । ଏବେ ଆପାର୍ଟମେଣ୍ଟର ବାଲକୋନି ଭୁଶୁଡ଼ିବା ପରେ ହାଇକୋର୍ଟଙ୍କ ନିର୍ଦ୍ଦେଶ କ୍ରମେ ପ୍ରଶାସନ ସ୍ୱତନ୍ତ୍ର କମିଟି ଗଠନ କରିଛି । ଗଠିତ କମିଟି କଟକ ସହରରେ ଥିବା ଅସୁରକ୍ଷିତ କୋଠା ଗୁଡ଼ିକୁ ଚିହ୍ନଟ କରିବ ।

କଟକ ସଦର ଉପଜିଲ୍ଲାପାଳ, ଆରଆଣ୍ଡବି ଅଧିକ୍ଷଣ ଯନ୍ତ୍ରୀ ଓ ସିଏମସି ସିଟି ଇଞ୍ଜିନିୟରଙ୍କୁ ନେଇ ଏହି କମିଟି ଗଠନ ହୋଇଛି । ସିଏମସିର ଅତିରିକ୍ତ କମିଶନର କଳ୍ପତରୁ ବେହେରା କହିଛନ୍ତି, "କମିଟି ଅସୁରକ୍ଷିତ କୋଠା ଚିହ୍ନଟ କରିବା ପରେ ସେ ଗୁଡ଼ିକୁ ପର୍ଯ୍ୟାୟ କ୍ରମେ ଭାଙ୍ଗି ଦିଆଯିବ ।"

ଶୁଭମ୍ କମ୍ପ୍ଲେକ୍ସ ଆପର୍ଟମେଣ୍ଟର ବାଲକୋନି ଭୁଶୁଡ଼ି ୩ ଜଣଙ୍କ ମୃତ୍ୟୁ ପରେ ଅନେକ ସତ ପଦାକୁ ଆସିଛି । ଆପାର୍ଟମେଣ୍ଟଟି ସମ୍ପୂର୍ଣ ଭାବେ ଅସୁରକ୍ଷିତ ଥିବାବେଳେ କାନ୍ଥରେ ଗଛଲତା ଉଠିଛି, ଅନେକ ଅଂଶ ଭାଙ୍ଗିରୁଜି ଯାଇଛି । ଆପାର୍ଟମେଣ୍ଟରେ କେହି ସୁରକ୍ଷା କର୍ମୀ ଅଛନ୍ତି ନା କୌଣସି ଆସୋସିଏସନ୍ ଅଛି । ସେଠାରେ ଭଡ଼ା ରହୁଥିବା ଲୋକମାନେ ବି ଜାଣି ନାହାନ୍ତି କିଏ ଏହି ଆପାର୍ଟମେଣ୍ଟର ପ୍ରକୃତ ମାଲିକ ?

କଟକ ସହର ଭିତରେ ଏଭଳି ଏକାଧିକ ଅସୁରକ୍ଷିତ ଆପାର୍ଟମେଣ୍ଟ ରହିଥିବା ବେଳେ କୌଣସି କାର୍ଯ୍ୟାନୁଷ୍ଠାନ ନିଆଯାଉ ନାହିଁ । ଗତ ଅଗଷ୍ଟରେ କଟକ ସହରରେ ଥିବା ୨୨୧ଟି ଅସୁରକ୍ଷିତ କୋଠା ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ହାଇକୋର୍ଟ ନିର୍ଦ୍ଦେଶ ଦେଇଥିଲେ । ହାଇକୋର୍ଟଙ୍କ ନିର୍ଦ୍ଦେଶ ସତ୍ତ୍ଵେ ପ୍ରଶାସନ କୌଣସି ପଦକ୍ଷେପ ନେଉ ନଥିବା ଲୋକେ ଅଭିଯୋଗ କରିଛନ୍ତି ।

ଏଥିସହ ପଢ଼ନ୍ତୁ: ପ୍ରତି ମୃତକଙ୍କ ପରିବାରକୁ ସହାୟତା ଘୋଷଣା କଲେ ମୁଖ୍ୟମନ୍ତ୍ରୀ

କୋଠା ଭୁଶୁଡ଼ି ୩ ଜଣଙ୍କ ମୃତ୍ୟୁକୁ ନେଇ ଦୁଃଖ ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ । ମୃତକଙ୍କ ପରିବାର ପାଇଁ କଲେ ସହାୟତା ଘୋଷଣା । ମୁଖ୍ୟମନ୍ତ୍ରୀ ରିଲିଫ ପାଣ୍ଠି ବା CMRFରୁ ୩ ମୃତକଙ୍କ ପରିବାରକୁ ୪ ଲକ୍ଷ ଟଙ୍କା ଲେଖାଏଁ ଅନୁକମ୍ପାମୂଳକ ସହାୟତା ଘୋଷଣା କରିଛନ୍ତି ମୁଖ୍ୟମନ୍ତ୍ରୀ । ମୃତକ ଅବଦୁଲ ମୁଜାହିଦ, ଅବଦୁଲ ଜାହିଦ ଓ ଅବଦୁଲ ଜଲିଲଙ୍କ ପ୍ରାଣହାନୀକୁ ନେଇ ଗଭୀର ଶୋକ ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଘଟଣାରେ ସମସ୍ତ ଆହତଙ୍କ ଉତ୍ତମ ଚିକିତ୍ସାର ସୁବନ୍ଦୋବସ୍ତ କରିଛନ୍ତି ରାଜ୍ୟ ସରକାର ।