କଟକରେ କୋଠା ଭୁଶୁଡ଼ି ୩ ଜଣଙ୍କର ମୃତ୍ୟୁ ଘଟଣାରେ ତଦନ୍ତ ପାଇଁ ଗଠିତ ହେଲା ଉଚ୍ଚସ୍ତରୀୟ କମିଟି । ପ୍ରତି ମୃତକଙ୍କ ପାଇଁ ପରିବାରକୁ ୧୦ ହଜାର ଲେଖାଏଁ ଦିଆଗଲା ତ୍ୱରିତ କ୍ଷତିପୂରଣ । ଅନ୍ୟପଟେ କଟକରେ ଭଙ୍ଗାଯିବ ଅସୁରକ୍ଷିତ କୋଠା । କଡ଼ାକଡ଼ି କାର୍ଯ୍ୟକାରୀ ହେବ ହାଇକୋର୍ଟଙ୍କ ନିର୍ଦ୍ଦେଶ । ଏଥିପାଇଁ ହାଇକୋର୍ଟ ପୂର୍ବରୁ ନିର୍ଦ୍ଦେଶ ଦେଇଥିବାବେଳେ ଅସୁରକ୍ଷିତ କୋଠା ଚିହ୍ନଟ କରି ରିପୋର୍ଟ ଦେବାକୁ କହିଥିଲେ । ସିଏମସି ପକ୍ଷରୁ ଅସୁରକ୍ଷିତ କୋଠା ଚିହ୍ନଟ କରି ହାଇକୋର୍ଟରେ ରିପୋର୍ଟ ମଧ୍ୟ ଦାଖଲ ହୋଇଥିଲା । କିନ୍ତୁ ଏସବୁ ଭଙ୍ଗା ଯିବା ନେଇ କୌଣସି ପଦକ୍ଷେପ ନିଆଯାଇନଥିଲା ।

ଏବେ ବଡ଼ ଅଘଟଣ ପରେ ଅସୁରକ୍ଷିତ କୋଠା ଚିହ୍ନଟ କରିବାକୁ ପୁଣି ଥରେ ସିଏମସି କମିଟି ଗଠନ କରାଯାଇଛି । ସେପଟେ ଏହି ଘଟଣାରେ ପ୍ରତିକ୍ରିୟା ରଖିଛନ୍ତି ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର । ଏମିତି ଅସୁରକ୍ଷିତ କୋଠା ନଜରକୁ ଆସିଲେ ସରକାର କାର୍ଯ୍ୟାନୁଷ୍ଠାନ ନେବେ । ତେବେ ଲୋକେ ବି ସଚେତନ ରହିବାକୁ ମନ୍ତ୍ରୀ ଅପିଲ୍ କରିଛନ୍ତି ।

ଅଧିକ ପଢ଼ନ୍ତୁ: ଆପାର୍ଟମେଣ୍ଟ ବାଲକୋନି ଭୁଶୁଡ଼ିବା ଘଟଣା; ୨୪ ଘଣ୍ଟାରେ ରିପୋର୍ଟ ଦେବାକୁ ଜିଲ୍ଲାପାଳଙ୍କ ନିର୍ଦ୍ଦେଶ

କେବଳ କଟକ ନୁହେଁ ରାଜଧାନୀ ଭୁବନେଶ୍ବରର ବିଭିନ୍ନ ପ୍ରମୁଖ ଅଞ୍ଚଳ ଗୁଡିକରେ ମାଳ ମାଳ ଅସୁରକ୍ଷିତ କୋଠା ରହିଛି । ଶହୀଦ ନଗର ହେଉ କି ଶୈଳଶ୍ରୀ ବିହାର, ଜୟଦେବ ବିହାର ହେଉ କି ପୁରୁଣା ଭୁବନେଶ୍ବର ସବୁଠି ସମାନ ସ୍ଥିତି । ଟିକିଏ ଭୂମିକମ୍ଫ ହେଲେ ଭୁଶୁଡ଼ି ପଡ଼ିବ କୋଠା ଆଉ ମାତ୍ର କେଇ ମିନିଟରେ ଚାଲିଯିବ ଶହ ଶହ ଜୀବନ । ରାଜଧାନୀର ଏହି ସବୁ ସ୍ଥାନରେ ସତୁରୀ, ଅଶୀ ଦଶକରୁ ନିର୍ମାଣ ହୋଇଥିବା କୋଠା ଗୁଡ଼ିକ ଜରାଜୀର୍ଣ୍ଣ ଅବସ୍ଥାକୁ ଆସିଥିବା ବେଳେ ଏଠାରେ କିଛି ଲୋକ ବିପଦ ସଙ୍କୁଳ ଭାବେ ଅବସ୍ଥାନ କରୁଛନ୍ତି । ଏଗୁଡିକର ଶୀଘ୍ର ମରାମତି ନଚେତ ପୁନଃ ନିର୍ମାଣ କରା ନ ଗଲେ କେଉଁ ବି ମୁହୂର୍ତ୍ତରେ ଅଘଟଣକୁ ଏଡାଇ ଦିଆଯାଇନପାରେ ବୋଲି ରାଜଧାନୀବାସୀନ୍ଦା ଆଶଙ୍କା ପ୍ରକାଶ କରିଛନ୍ତି ।

ଓଡିଏ ପ୍ଲାନି ଆଣ୍ଡ ବିଲ୍ଡିଂ ଷ୍ଟାଣ୍ଡାର୍ଡ ରୁଲ୍-୨୦୨୦ ଅନୁଯାୟୀ ସହରରେ ରହିଥିବା ବିପଦ ସଙ୍କୁଳ କୋଠା ଗୁଡ଼ିକ ଚିହ୍ନଟ କରି ଏହାର ସର୍ଭେ କରାଯିବା ଆବଶ୍ୟକ । ତେବେ ଦୁଃଖର ବିଷୟ ରାଜଧାନୀରେ କେତେ ସଂଖ୍ୟକ ଏଭଳି ବିଲ୍ଡିଂ ରହିଛି, ତାହାର ହିସାବ ବିଏମସି କି ବିଡ଼ିଏ ପାଖରେ ନାହିଁ । ଆଗାମୀ ଦିନରେ ଏଭଳି ବିପଦ ସଙ୍କୁଳ ଅବସ୍ଥାରେ ରହିଥିବା ବହୁତଳ କୋଠାକୁ ନେଇ କ'ଣ ପଦକ୍ଷେପ ନିଆଯାଉଛି ଦେଖିବାକୁ ବାକି ।