Vending Zone / ଭେଣ୍ଡିଂ ଜୋନ୍ କାହା ସ୍ୱାର୍ଥରେ ? କାଗଜପତ୍ର ଦେଇ ବି ମିଳୁନି ଦୋକାନ

କଟକ: ଉଠା ଦୋକାନୀଙ୍କୁ ଥଇଥାନ କରିବା ପାଇଁ କଟକ ମହାନଗର ନିଗମ କଟକ ସହରର ବିଭିନ୍ନ ସ୍ଥାନରେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରି ଭେଣ୍ଡିଂ ଜୋନ୍ ନିର୍ମାଣ ହୋଇଛି । ମାତ୍ର ତାହା କୌଣସି କାର୍ଯ୍ୟରେ ଲାଗୁଛି ନା ଲୋକଙ୍କୁ ଆବଣ୍ଟନ ହୋଇପାରୁଛି । ଯାହାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ଉଠା ଦୋକାନୀ ।

ସେପଟେ ମହାନଗର ନିଗମ କମିଶନର କହିଛନ୍ତି, କିଛି ଭେଣ୍ଡିଂ ଜୋନ୍ ଆବଣ୍ଟନ ପାଇଁ ପକ୍ରିୟା ଆରମ୍ଭ ହୋଇଛି । ଯେଉଁଠି ଭେଣ୍ଡିଂ ଜୋନ୍ ହୋଇଛି ସେଠାରେ ପାର୍କିଂର ଅସୁବିଧା ରହିଛି । ଗୋଟିଏ କିମିଟି ଗଠନ ହୋଇଛି, ସେମାନେ ସ୍ଥିତି ଯାଞ୍ଚ କରି ରିପୋର୍ଟ ଦେବେ ରିପୋର୍ଟ ଦେବା ପରେ ସେଗୁଡ଼ିକ ମଧ୍ୟ ଆବଣ୍ଟନ କରାଯିବ ।

ଏଥିସହ ପଢ଼ନ୍ତୁ: ଅରଡ଼ ବଜାରରେ ଗୁଳିକାଣ୍ଡ; କାର୍‌ରୁ ଓହ୍ଲାଇବା ବେଳେ ବ୍ୟବସାୟୀଙ୍କୁ ହତ୍ୟା କଲେ ଦୁର୍ବୃତ୍ତ 

ସହରର ରାସ୍ତା ପାର୍ଶ୍ଵରେ ବ୍ୟବସାୟ କରୁଥିବା କ୍ଷୁଦ୍ର ବ୍ୟବସାୟୀଙ୍କୁ ଥଇଥାନ କରିବା ପାଇଁ କଟକ ମହାନଗର ନିଗମ ପକ୍ଷରୁ ସହରର ବିଭିନ୍ନ ସ୍ଥାନରେ ଭେଣ୍ଡିଂ ଜୋନ୍‌ର ବ୍ୟବସ୍ଥା ତ କରାଯାଇଛି । ମାତ୍ର ନିର୍ମାଣ ଶେଷ ହେବାର ବର୍ଷେ ପରେ ମଧ୍ୟ ନା ଏହା ଆବଣ୍ଟନ ହୋଇ ପାରୁଛି, ନା କୌଣସି କାର୍ଯ୍ୟରେ ଲାଗି ପାରୁଛି ।

ଫଳରେ କିଛି ଭେଣ୍ଡିଂ ଜୋନ୍ ଏବେ ନଷ୍ଟ ହେବାକୁ ବସିଲାଣି । ତେବେ ଏହି ଭେଣ୍ଡିଂ ଜୋନ୍‌ରେ ଥିବା ଦୋକାନ ଘରକୁ ନେବା ପାଇଁ ହିତାଧିକାରୀ ମାନେ ମହାନଗର ନିଗମ ନିକଟରେ ସମସ୍ତ କାଗଜପତ୍ର ଦାଖଲ କରି ସାରିଥିଲେ ସୁଦ୍ଧା ଆବଣ୍ଟନରେ ବିଳମ୍ବକୁ ନେଇ ଆଶାୟୀ ବ୍ୟବସାୟୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି ।

ଏଥିସହ ପଢ଼ନ୍ତୁ: ଉପବାଚସ୍ପତିଙ୍କ ନକଲି ଦସ୍ତଖତରେ ବଦଳି ଷଡଯନ୍ତ୍ର ଘଟଣା: ୧୦ ଦିନ ପରେ ବି ପୋଲିସ ହାତ ଖାଲି 

କଟକ ରିଂ ରୋଡ଼ ମାତା ମଠ ଅଞ୍ଚଳରେ ନିର୍ମାଣ ହୋଇଥିବା ଭେଣ୍ଡିଂ ଜୋନ୍‌ର ସମସ୍ତ ଦୋକାନ ବନ୍ଦ ହୋଇ ପଡ଼ିଛି । ଯାହାଫଳରେ ଏହି ଅଞ୍ଚଳ ଏବେ କେବଳ ଗାଡ଼ି ପାର୍କିଂ ସ୍ଥଳୀ ପାଲଟିଛି । ସେହିପରି ଯୋବ୍ରା ଛକ ମେରିଆ ବଜାର ବକ୍ସ ରାସ୍ତା କଡ଼ରେ ମଧ୍ୟ ମହାନଗର ନିଗମ ପକ୍ଷରୁ ୩୦ରୁ ଊର୍ଦ୍ଧ୍ଵ ଦୋକାନ ନିର୍ମାଣ ହୋଇଛି । କିନ୍ତୁ ଏଠାରେ ମଧ୍ୟ ସମାନ ଅବସ୍ଥା । ପାର୍କିଂ ପାଇଁ ଜଗା ନଥିବାରୁ ନିର୍ମାଣ ଶେଷ ହେବା ପରେ ବି ଏହାକୁ ଖୋଲାଯାଇ ପାରୁନାହିଁ ।

ସାଧାରଣ ଜନତାଙ୍କ ଟିକସ ପଇସାରେ ନିର୍ମାଣ ହୋଇଛି ଭେଣ୍ଡିଂ ଜୋନ୍ । ଯେଉଁଥିରେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ ହୋଇଛି । ଏବେ ଦେଖିବାର କଥା ଭେଣ୍ଡିଂ ଜୋନ୍ ପ୍ରକୃତରେ କେବେ କାର୍ଯ୍ୟକାରୀ ହେଉଛି ଏବଂ କ୍ଷୁଦ୍ର ବ୍ୟବସାୟୀଙ୍କୁ କେବେ ମିଳୁଛି ନ୍ୟାୟ ।