New Cyclone Alert / ମାଡ଼ି ଆସୁଛି ନୂଆ ସମ୍ଭାବ୍ୟ ବାତ୍ୟା 'ଅକବାନ୍'; ସନ୍ଧ୍ୟାରେ ବଡ଼ ବୈଠକ, ସବୁ ଜିଲ୍ଲାପାଳଙ୍କୁ SRCଙ୍କ ଆଲର୍ଟ

ଭୁବନେଶ୍ଵର: ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ କ୍ରମଶଃ ଘନୀଭୂତ ହେବାରେ ଲାଗିଛି । ଆସନ୍ତାକାଲି ସୁଦ୍ଧା ଏହା ଏକ ସ୍ପଷ୍ଟ ଚିହ୍ନିତ ଲଘୁଚାପ ଏବଂ ୧୫ ତାରିଖ ସକାଳ ସୁଦ୍ଧା ଅବପାତରେ ପରିଣତ ହେବାର ସମ୍ଭାବନା ରହିଛି । ପରବର୍ତ୍ତୀ ସମୟରେ ଏହା ଉତ୍ତର ଓ ଉତ୍ତର-ପଶ୍ଚିମ ଦିଗକୁ ଗତି କରି ୧୬ ତାରିଖ ସନ୍ଧ୍ୟା ସୁଦ୍ଧା ଏକ ସାମୁଦ୍ରିକ ଘୂର୍ଣ୍ଣିଝଡ଼ ବା ବାତ୍ୟାର ରୂପ ନେଇପାରେ ବୋଲି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ କୁହାଯାଇଛି । ଯଦି ଏହା ବାତ୍ୟାର ରୂପ ନିଏ, ତେବେ ଏହାର ନାମ ରଖାଯିବ 'ଅକବାନ୍' ।

ନଭେମ୍ବର ୧୩ରୁ ୧୭ ତାରିଖ ରାଜ୍ୟରେ ପାଗ ମୁଖ୍ୟତଃ ଶୁଖିଲା ରହିବ । ଉପକୂଳ ଓଡ଼ିଶା ସମେତ ମୟୂରଭଞ୍ଜ ଓ କେନ୍ଦୁଝର ଜିଲ୍ଲାର କିଛି ସ୍ଥାନରେ ହାଲୁକାରୁ ମଧ୍ୟମ ବର୍ଷା ସହ ବିଜୁଳି, ଘଡ଼ଘଡ଼ି ଏବଂ ଘଣ୍ଟାପ୍ରତି ୩୦ରୁ ୪୦ କିମି ବେଗରେ ଝଟକା ପବନ ବହିପାରେ । ସେହିପରି କେନ୍ଦ୍ରାପଡ଼ା ଓ ଜଗତସିଂହପୁର ଜିଲ୍ଲାର ଗୋଟିଏ ବା ଦୁଇଟି ସ୍ଥାନରେ ପ୍ରବଳ ବର୍ଷା ହେବାର ଆଶଙ୍କା ରହିଛି । ଉପକୂଳ ଓ ଆଭ୍ୟନ୍ତରୀଣ ଓଡ଼ିଶାର କିଛି ସ୍ଥାନରେ ବର୍ଷା ସହ ବିଜୁଳି, ଘଡ଼ଘଡ଼ି ଏବଂ ପବନ ଜାରି ରହିବ । ବିଶେଷକରି ପୁରୀ, ଗଞ୍ଜାମ, ଗଜପତି ଓ ରାୟଗଡ଼ା ଜିଲ୍ଲାରେ ପ୍ରବଳ ବର୍ଷାର ସମ୍ଭାବନା ରହିଛି ।

• "ଝଟକା ପବନ ୬୫ କିମି ବେଗରେ ବହିପାରେ"

ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ରର ନିର୍ଦ୍ଦେଶିକା ମନୋରମା ମହାନ୍ତିଙ୍କ ସୂଚନା ଅନୁଯାୟୀ, ବାତ୍ୟାଟି କେଉଁ ଉପକୂଳ ଆଡ଼କୁ ମୁହାଁଇବ, ସେନେଇ ବର୍ତ୍ତମାନ ସ୍ପଷ୍ଟ ଆକଳନ କରିବା ସମ୍ଭବ ନୁହେଁ । ଏହା ସମ୍ପୂର୍ଣ୍ଣ ରୂପେ ଅବପାତରେ ପରିଣତ ହେବା ପରେ ହିଁ ଏହାର ସଠିକ୍ ଗତିପଥ ସ୍ପଷ୍ଟ ହେବ । ତଥାପି, ଆଗୁଆ ସତର୍କତା ସ୍ୱରୂପ ୧୭ ତାରିଖରେ ବିଶେଷକରି ଦକ୍ଷିଣ ଓଡ଼ିଶା ଉପକୂଳରେ ପାଗ ଖରାପ ରହିବା ସହ ଘଣ୍ଟାପ୍ରତି ୪୫ରୁ ୫୫ କିମି ଏବଂ ଝଟକା ପବନ ୬୫ କିମି ବେଗରେ ବହିପାରେ । ଏହାକୁ ଦୃଷ୍ଟିରେ ରଖି ମତ୍ସ୍ୟଜୀବୀମାନଙ୍କୁ ସମୁଦ୍ର ମଧ୍ୟକୁ ନଯିବାକୁ କଡ଼ା ପରାମର୍ଶ ଦିଆଯାଇଛି । ଅନ୍ୟପଟେ ରାଜ୍ୟରେ ଆଗାମୀ ୫ ଦିନ ଯାଏଁ ରାତ୍ରି ତାପମାତ୍ରାରେ କୌଣସି ବଡ଼ ପରିବର୍ତ୍ତନ ହେବାର ନାହିଁ, କିନ୍ତୁ ୧୮ ତାରିଖରୁ ରାତି ତାପମାତ୍ରା ୧ରୁ ୨ ଡିଗ୍ରୀ ପର୍ଯ୍ୟନ୍ତ ବୃଦ୍ଧି ପାଇପାରେ ।

• ବାତ୍ୟା ପାଇଁ ସନ୍ଧ୍ୟାରେ ବଡ଼ ବୈଠକ

ରାଜସ୍ୱ, ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀଙ୍କ ଅଧ୍ୟକ୍ଷତାରେ ସନ୍ଧ୍ୟାରେ ବସିବ ବୈଠକ । ଭାରତୀୟ ପାଣିପାଗ ବିଭାଗର ବିପର୍ଯ୍ୟୟ ପରିଚାଳନା ଅଧିକାରୀଙ୍କୁ ନେଇ ହେବ ବୈଠକ । ମୁକାବିଲା ପାଇଁ ସରକାର ପ୍ରସ୍ତୁତ । ପ୍ରାଥମିକ ଅକାଳନ ଅନୁଯାୟୀ ପବନର ଗତି ୪୦ରୁ ୫୦ କିମି ହେବ । ଓଡ଼ିଶାରେ ଏହାର ପ୍ରଭାବ କେତେ ପଡିବ ତାର ଆକଳନ କରିବ IMD ।

ଏନେଇ ରାଜସ୍ଵ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ କହିଛନ୍ତି, " IMDରୁ ଆସିଥିବା ରିପୋର୍ଟକୁ ଅଧ୍ୟୟନ କରୁଛୁ । ଅବପାତ ହେଲା ପରେ କେତେ କିଲୋମିଟର ଯିବ, କେଉଁ ଦିଗକୁ ଯିବ ସ୍ୱାଭାବିକ ଭାବେ ବଙ୍ଗୋପସାଗରରେ ଲଘୁଚାପ ହେଲେ କେଉଁଠି ହିଟ୍ କରିବ ରିପୋର୍ଟକୁ ଅଧ୍ୟୟନ କରୁଛୁ । ଆଜି ସନ୍ଧ୍ୟା କିମ୍ଭା ଆସନ୍ତାକାଲି ସୁଦ୍ଧା ସ୍ପଟ ହେବ ଗତିପଥ ଏବଂ ଲ୍ୟାଣ୍ଡଫଲ ଏରିଆ । କିନ୍ତୁ ଉପକୂଳ ଜିଲ୍ଲାକୁ ପ୍ରଭାବ ରହିପାରେ ତେଣୁ ଉପକୂଳ ଜିଲ୍ଲାମାନଙ୍କୁ ଆଲର୍ଟ କରାଯାଇଛି ।"

• କାହିଁକି ବାତ୍ୟାର ନାଁ ଅକବାନ୍ ?

ବଙ୍ଗୋପସାଗରରେ ସୃଷ୍ଟି ହେବାକୁ ଥିବା ସମ୍ଭାବ୍ୟ ବାତ୍ୟାର ନାମ 'ଅକବାନ୍' (Akvan) ରଖିବା ପାଇଁ ଇରାନ ଦେଶ ପ୍ରସ୍ତାବ ଦେଇଛି । ପାରସ୍ୟ ବା ଫାର୍ସୀ ଭାଷାରେ ଏହି ଶବ୍ଦର ଅର୍ଥ ହେଉଛି 'ଦୁଷ୍ଟ ଚିନ୍ତାଧାରା', 'ଖରାପ ମନ' କିମ୍ବା 'ଏକ ରାକ୍ଷସ'। ତେବେ ଯଦି ବାତ୍ୟା ସୃଷ୍ଟି ହୁଏ, ତେବେ ତାହାର ନାମ ଅକବାନ୍ ରଖାଯିବ । ବର୍ତ୍ତମାନ ଏହା ସମ୍ଭାବ୍ୟ ବାତ୍ୟା ରହିଛି । ଆସନ୍ତାକାଲି ବାତ୍ୟା ନେଇ ଅଧିକ ସୂଚନା ଆସିବ ।

ପଢନ୍ତୁ ଏହି ଖବର: ବଙ୍ଗୋପସାଗରରେ ପୁଣି ବାତ୍ୟା; ୧୫ରେ ଅବପାତ ଓ ୧୬ରେ ନେଇପାରେ ବାତ୍ୟା ରୂପ

• ସବୁ ଜିଲ୍ଲାପାଳଙ୍କୁ SRCଙ୍କ ଆଲର୍ଟ

ଭାରତୀୟ ପାଣିପାଗ ବିଭାଗର ପୂର୍ବାନୁମାନ ପରେ ସ୍ୱତନ୍ତ୍ର ରିଲିଫ୍ କମିଶନର ବା SRC ସମସ୍ତ ଜିଲ୍ଲାପାଳଙ୍କୁ ଆଲର୍ଟ ଜାରି କରିଛନ୍ତି । ଏହି ସମ୍ଭାବ୍ୟ ବିପର୍ଯ୍ୟୟକୁ ଦୃଷ୍ଟିରେ ରଖି SRCଙ୍କ କାର୍ଯ୍ୟାଳୟ ପକ୍ଷରୁ ସମସ୍ତ ଜିଲ୍ଲାପାଳ, ବିଭିନ୍ନ ବିଭାଗର ସଚିବ, ଆରଡିସି ଏବଂ ଓସଡମା କାର୍ଯ୍ୟନିର୍ବାହୀ ନିର୍ଦ୍ଦେଶକଙ୍କୁ ସତର୍କ କରାଯାଇ ପ୍ରସ୍ତୁତି ରହିବାକୁ ପରାମର୍ଶ ଦିଆଯାଇଛି।