କେନ୍ଦ୍ରାପଡ଼ା: ଅକ୍ଟୋବର ଆସିଲେ ଡରାଉଛି ବାତ୍ୟା । ଏଥର ବି ଅକ୍ଟୋବର ମାସ ସରିବାକୁ ବସିଥିବାବେଳେ ବାତ୍ୟା କିନ୍ତୁ ପିଛା ଛାଡ଼ିନି । ସ୍ଥଳଭାଗ ଆଡ଼କୁ ମାଡ଼ି ଆସୁଛି ବାତ୍ୟା 'ଅର୍ଣ୍ଣବ' । ସମୁଦ୍ର ଭିତରେ ଅତି ଭୀଷଣ ବାତ୍ୟାର ରୂପ ନେଇସାରିଛି । ସେପଟେ କେନ୍ଦ୍ରାପଡ଼ାରୁ ଏକ ବଡ଼ ଖବର ଆସି ପହଞ୍ଚିଛି । କେନ୍ଦ୍ରାପଡ଼ାରେ ୨୦ ମତ୍ସ୍ୟଜୀବୀ ନିଖୋଜ ହୋଇଯାଇଛନ୍ତି । ସପ୍ତାହକ ପୂର୍ବରୁ କଙ୍କଡା ଧରିବା ପାଇଁ ଯାଇଥିଲେ, ହେଲେ ଆଉ ଫେରି ପାରିନାହାନ୍ତି ।
ଗଭୀର ସମୁଦ୍ରକୁ କଙ୍କଡା ଧରିବାକୁ ଯାଇ ପ୍ରାୟ ୨୦ ଜଣ ମତ୍ସ୍ୟଜୀବୀ ନିଖୋଜ ହୋଇଯାଇଛନ୍ତି । ଏମାନେ ସମସ୍ତେ ମହାକାଳପଡ଼ା ପେଟଛେଲା ପଞ୍ଚାୟତର ଶବର ସାହିର ମତ୍ସ୍ୟଜୀବୀ । ମାଦେଳି ମୁହାଣରେ ଥିବା ଲଞ୍ଚଗୋଲା ଦୀପପୁଞ୍ଜରେ ଫସିଥିବା କୁହାଯାଉଛି । ସପ୍ତାହକ ପୂର୍ବରୁ କଙ୍କଡା ଧରିବା ପାଇଁ ଯାଇଥିଲେ । କିନ୍ତୁ ଏଯାଏ କାହାର ପତ୍ତା ମିଳିନାହିଁ । ସେମାନେ ନିୟମିତ କଙ୍କଡା ଧରିବା ପାଇଁ ଯାଆନ୍ତି । ଏହି ଦଳରେ ମହିଳା ଓ ନାବାଳକ ଥିବା ସୂଚନା ମିଳିଛି ।
- ସମୁଦ୍ର ଭିତରକୁ ନଯିବାକୁ କଡ଼ା ପରାମର୍ଶ ଥିଲା
ବଙ୍ଗୋପସାଗରରେ ସୃଷ୍ଟି ହୋଇଥିବା ଭୀଷଣ ବାତ୍ୟା 'ଅର୍ଣ୍ଣବ'କୁ ନେଇ ସମସ୍ତଙ୍କୁ ସତର୍କ କରାଯାଇଥିଲା । ସମୁଦ୍ର ଭିତରକୁ ମାଛ ଧରିବା ପାଇଁ ନଯିବାକୁ ଡଙ୍ଗା ମାଲିକ ଓ ମତ୍ସ୍ୟଜୀବୀମାନଙ୍କୁ କଡ଼ା ଚେତାବନୀ ଦିଆଯାଇଥିଲା । ମତ୍ସ୍ୟ ଓ ପ୍ରାଣୀ ସମ୍ପଦ ବିକାଶ ବିଭାଗ ପକ୍ଷରୁ କେନ୍ଦ୍ରାପଡ଼ା ଜିଲ୍ଲା ମହାକାଳପଡ଼ା ବ୍ଲକର ବିଭିନ୍ନ ଅଞ୍ଚଳରେ ବ୍ୟାପକ ସଚେତନତା ଅଭିଯାନ କରାଯାଇଥିଲା । ବିଭାଗୀୟ କର୍ମଚାରୀମାନେ ମହାକାଳପଡ଼ା ବ୍ଲକର ଖରିନାସି, ଜମ୍ବୁ, କଜଳପାତିଆ ଏବଂ ତନ୍ତିଆପାଳ ଆଦି ପ୍ରମୁଖ ମତ୍ସ୍ୟ ଅବତରଣ କେନ୍ଦ୍ରରେ ପହଞ୍ଚିଥିଲେ। ସେଠାରେ ଡଙ୍ଗା ମାଲିକ ଓ ମତ୍ସ୍ୟଜୀବୀମାନଙ୍କୁଭେଟି ସମୁଦ୍ରର ସୁରକ୍ଷା ସ୍ଥିତି ସମ୍ପର୍କରେ ଅବଗତ କରାଇବା ସହ ସମୁଦ୍ରକୁ ନଯିବା ପାଇଁ ପରାମର୍ଶ ଦେଇଥିଲେ ।
- ୨୯ ତାରିଖ ପର୍ଯ୍ୟନ୍ତ ମାଛ ଧରିବା ମନା
କେନ୍ଦ୍ରାପଡା ଜିଲ୍ଲା ମହାକାଳପଡା ବ୍ଲକ ଖରିନାସି, ଜମ୍ବୁ , କଜଳପାତିଆ ଓ ତନ୍ତିଆପାଳ ମତ୍ସ୍ୟ ଅବତରଣ କେନ୍ଦ୍ରରେ ମତ୍ସ୍ୟ ଓ ପ୍ରାଣୀ ସମ୍ପଦ ବିକାଶ ବିଭାଗର ଅଧିକାରୀମାନେ ପହଞ୍ଚି ଡଙ୍ଗା ମାଲିକ ଓ ମତ୍ସ୍ୟଜୀବୀ ମାନଙ୍କୁ ସମୁଦ୍ରକୁ ମାଛ ଧରିବାକୁ ନଯିବାପାଇଁ ସଚେତନ କରିଥିଲେ । ଲଘୁଚାପ ପ୍ରଭାବରେ ସମୁଦ୍ର ଅଶାନ୍ତ ରହିବା ସହିତ ଓଡ଼ିଶାର ଉପକୂଳରେ ପ୍ରବଳରୁ ଅତିପ୍ରବଳ ବର୍ଷା ଓ ୬୦ରୁ ୭୦ କିଲୋମିଟର ବେଗରେ ପବନ ବହିବାର ସମ୍ଭାବନା ରହିଛି । ଏଣୁ ଆସନ୍ତା ୨୯ ତାରିଖ ପର୍ଯ୍ୟନ୍ତ ସମୁଦ୍ରକୁ ମାଛ ଧରିବାକୁ ନଯିବା ସହିତ ଯେଉଁ ମତ୍ସ୍ୟଜୀବୀମାନେ ସମୁଦ୍ରକୁ ମାଛ ଧରିବାକୁ ଯାଇଛନ୍ତି, ସେମାନଙ୍କୁ ତୁରନ୍ତ ଫେରିଆସିବାକୁ ଡଙ୍ଗା ମାଲିକ ଓ ମତ୍ସ୍ୟଜୀବୀମାନଙ୍କୁ ସଚେଚନ କରାଯାଇଥିଲା । ତଥାପି ଏହି ୨୦ଜଣ ମତ୍ସ୍ୟଜୀବୀ ସମୁଦ୍ର ଭିତରେ ଫସିଯାଇଛନ୍ତି ।
ପଢନ୍ତୁ ଏହି ଖବର: ମାଡ଼ି ଆସୁଛି ଅତି ଭୀଷଣ ବାତ୍ୟା ‘ଅର୍ଣ୍ଣବ’, କାଲି ସକାଳେ କରିବ ଲ୍ୟାଣ୍ଡଫଲ୍ ! ୧୪୦ କିମି ବେଗରେ ବହିବ ପବନ - ଅତି ଭୀଷଣ ବାତ୍ୟା ରୂପ ନେଲା ଅର୍ଣ୍ଣବ
ସମୁଦ୍ର ଭିତରେ ଅତି ଭୀଷଣ ବାତ୍ୟାର ରୂପ ନେଇସାରିଛି ‘ଅର୍ଣ୍ଣବ’ । ଘଣ୍ଟାପ୍ରତି ୨୫ କିଲୋମିଟର ବେଗରେ ପଶ୍ଚିମ-ଉତ୍ତରପଶ୍ଚିମ ଦିଗରେ ଆଗକୁ ବଢ଼ୁଛି ଏହି ବାତ୍ୟା । ବର୍ତ୍ତମାନ ଏହା ଗୋପାଳପୁରଠାରୁ ଦକ୍ଷିଣରେ ପ୍ରାୟ ୩୮୦ କିଲୋମିଟର ଦୂରରେ ଥିବା ବେଳେ ବିଶାଖାପାଟଣାଠାରୁ ଦକ୍ଷିଣ-ପୂର୍ବ ଦିଗରେ ୩୦୦ କିଲୋମିଟର ଦୂରରେ କେନ୍ଦ୍ରୀଭୂତ ହୋଇଛି । ଆସନ୍ତାକାଲି (ଅକ୍ଟୋବର ୨୮) ଆନ୍ଧ୍ରପ୍ରଦେଶର ବାପଟଲା ଓ ବିଶାଖାପାଟଣା ମଧ୍ୟବର୍ତ୍ତୀ ଉପକୂଳ ଅଞ୍ଚଳରେ ବାତ୍ୟା ‘ଅର୍ଣ୍ଣବ’ ସ୍ଥଳଭାଗ ଅତିକ୍ରମ କରିବାର ସମ୍ଭାବନା ରହିଛି ।
