Cyclone Arnab Damage Assessment / ଗଜପତି ପରେ ଗଞ୍ଜାମରେ କେନ୍ଦ୍ରୀୟ ଟିମ୍, ବାତ୍ୟା ‘ଅର୍ଣ୍ଣବ’ର କ୍ଷୟକ୍ଷତି କରିବେ ଆକଳନ

ବାତ୍ୟା ‘ଅର୍ଣ୍ଣବ’ କ୍ଷୟକ୍ଷତିର ଆକଳନ । ଆଜି ଗଞ୍ଜାମ ଜିଲ୍ଲାର ବିଭିନ୍ନ ପ୍ରଭାବିତ ଅଞ୍ଚଳ ବୁଲି କ୍ଷୟକ୍ଷତିର ସମୀକ୍ଷା କରିବେ କେନ୍ଦ୍ରୀୟ ଟିମ୍‌ । ମଙ୍ଗଳବାର ଗଜପତି ଜିଲ୍ଲାରେ ସ୍ଥିତି ପରଖିଥିଲେ ୮ ଜଣିଆ କେନ୍ଦ୍ରୀୟ ଟିମ୍ । ଗୃହ ମନ୍ତ୍ରାଳୟର ବରିଷ୍ଠ ଅଧିକାରୀ ରବି ଶନାକାରଙ୍କ ନେତୃତ୍ୱରେ ଏହି ପ୍ରତିନିଧି ଦଳ ହେଲିକପ୍ଟର ଯୋଗେ ଆସି ପାରଳାଖେମୁଣ୍ଡି ସ୍ଥିତ ପୋଲିସ୍ ପଡିଆରେ ଓହ୍ଲାଇଥିଲେ । ଏହାପରେ ଟିମ୍ ସିଧାସଳଖ ଜିଲ୍ଲାପାଳଙ୍କ କାର୍ଯ୍ୟାଳୟରେ ପହଞ୍ଚି ଜିଲ୍ଲାପାଳ ଓ ବରିଷ୍ଠ ଅଧିକାରୀମାନଙ୍କ ସହ ଆଲୋଚନା କରିଥିଲେ । ବାତ୍ୟା ପ୍ରଭାବିତ ଅଞ୍ଚଳର ଭିଡିଓ, ଫଟୋ ଓ କ୍ଷୟକ୍ଷତିର ସମ୍ପୂର୍ଣ୍ଣ ତଥ୍ୟ ଜିଲ୍ଲା ପ୍ରଶାସନ ପକ୍ଷରୁ କେନ୍ଦ୍ରୀୟ ଟିମକୁ ପ୍ରଦାନ କରାଯାଇଛି ।
ବୈଠକ ପରେ ପ୍ରତିନିଧି ଦଳ ସର୍ବାଧିକ ପ୍ରଭାବିତ ମୋହନା ବ୍ଲକ୍, ରାୟଗଡ଼, ଗୁମ୍ମା ଓ ଆର. ଉଦୟଗିରି ବ୍ଲକର ବିଭିନ୍ନ ଅଞ୍ଚଳ ପରିଦର୍ଶନ କରି ସ୍ଥିତି ଅନୁଧ୍ୟାନ କରିଛନ୍ତି । ଗଜପତିରେ କ୍ଷୟକ୍ଷତିର ଆକଳନ ସାରିବା ପରେ ଏହି ଟିମ୍ ଗଞ୍ଜାମ ଗସ୍ତ କରିଛନ୍ତି ।

ଅଧିକ ପଢ଼ନ୍ତୁ: ବାତ୍ୟା 'ଅର୍ଣ୍ଣବ' ପରବର୍ତ୍ତୀ ଅବପାତ ଜନିତ ବନ୍ୟାରେ ଛାରଖାର ଗଞ୍ଜାମ

ସେପଟେ ବାତ୍ୟା ଅର୍ଣ୍ଣବ ଛଡ଼ାଇ ନେଇଛି ଚାଷୀଙ୍କ ବର୍ଷକର ରୋଜଗାର । ସର୍ବସାନ୍ତ ଗଞ୍ଜାମ ଓ ଗଜପତିର ଚାଷୀ । ବାତ୍ୟା ଓ ବର୍ଷାର କୋପରେ ଛାରଖାର ହୋଇଯାଇଛି ହଜାର ହଜାର ଏକର ଚାଷ ଜମି । ନଷ୍ଟ ହୋଇଛି ଛତୁ ଚାଷ । କୋବି, କଲରା, ବାଇଗଣଠାରୁ ଆରମ୍ଭ କରି ମକା ଫସଲ ପର୍ଯ୍ୟନ୍ତ ସବୁକିଛି ପାଣିରେ ଭାସିଯାଇଛି । କେଉଁଠି ଚାଷୀଙ୍କ ଆଖିରୁ ଲୁହ ଶୁଖୁନି ତ ଆଉ କେଉଁଠି ଋଷିକୂଲ୍ୟା ନଦୀର ବନ୍ୟା ପାଣିରେ ସମ୍ପୂର୍ଣ୍ଣ ଭାସିଯାଇଛି ଭିଟାମାଟି ।

ସୋରଡ଼ା ବ୍ଲକ ହୁକୁମା ପଞ୍ଚାୟତ ରାମଚନ୍ଦ୍ରପୁର ଗ୍ରାମର ଚାଷୀମାନଙ୍କର ସବୁ ପନିପରିବା ଫସଲ ବର୍ଷା ପାଣିରେ ଭାସିଯାଇଛି । କୋବି, କଲରା, ବାଇଗଣ ଭଳି ହଜାର ହଜାର ଟଙ୍କାର ଫସଲ ନଷ୍ଟ ହୋଇଯିବା ପରେ ଚାଷୀ ଏବେ ମୁଣ୍ଡରେ ହାତ ଦେଇ ବସିଛନ୍ତି । ସେପଟେ ସୋରଡ଼ା ବରାଡ଼ି ଅଞ୍ଚଳରେ ଋଷିକୂଲ୍ୟା ନଦୀ ସାଜିଛି କାଳ । ନଦୀର ପ୍ରବଳ ସ୍ରୋତରେ ୬ଟି ପରିବାରର ଘରଦ୍ୱାର ସମ୍ପୂର୍ଣ୍ଣ ଭାସିଯାଇଛି । ଗତ ୭ ଦିନ ହେବ ଏହି ବନ୍ୟା ବିପନ୍ନମାନେ ଆଶ୍ରୟସ୍ଥଳୀରେ ଦିନ କାଟୁଛନ୍ତି । ନିଜର ଭଙ୍ଗା ଘରକୁ ଦେଖି ବିପନ୍ନମାନେ ସମ୍ପୂର୍ଣ୍ଣ ଭାଙ୍ଗିପଡ଼ିଛନ୍ତି ।