Odisha Winter / ସରିଲା ବର୍ଷା ଆସୁଛି ଶୀତ; ୨ରୁ ୫ ଡିଗ୍ରୀ କମିବ ରାତି ତାପମାତ୍ରା

ଭୁବନେଶ୍ଵର: ଖୁବଶୀଘ୍ର ବର୍ଷାରୁ ମିଳିବ ଆଶ୍ୱସ୍ତି । ଆସନ୍ତା ନଭେମ୍ବର ୮ରୁ ରାଜ୍ୟରେ ବଢିବ ଶୀତର ପ୍ରକୋପ । ରାତିର ତାପମାତ୍ରା କମିବା ସହ ବଢ଼ିବ ଶୀତ । ନଭେମ୍ବର ଦ୍ୱିତୀୟ ସପ୍ତାହରୁ ରାଜ୍ୟରେ ଖେଳିବ ଶୀତ ଲହରୀ । ବାୟୁମଣ୍ଡଳରେ ଢାଙ୍କିବ କୁହୁଡ଼ିର ଧଳା ଚାଦର । ସକାଳୁ ସକାଳୁ କାଲୁଆ ପବନ ଶରୀରରେ ଶିହରଣ ସୃଷ୍ଟି କରିବ । ଆଉ କିଛି ଦିନ ମଧ୍ୟରେ ରାଜ୍ୟରେ ପାଣିପାଗ କିଛି ଏପରି ହେବାକୁ ଯାଉଛି ।

ସାଧାରଣତ ରାଜ୍ୟରେ କାର୍ତ୍ତିକ ମାସରୁ ଶୀତର ପ୍ରକୋପ ବଢିଥାଏ । କିନ୍ତୁ ଏଥର ବାତ୍ୟା ଯୋଗୁଁ ଶୀତ ଏଯାଏଁ ରାଜ୍ୟରେ ବିଶେଷ ଅନୁଭବ ହୋଇନାହିଁ । ମାତ୍ର ଆଗାମୀ କିଛି ଦିନରେ ଉପକୂଳ ଜିଲ୍ଲାଗୁଡ଼ିକରେ ରାତିର ତାପମାତ୍ରା ସ୍ୱାଭାବିକଠାରୁ ୨ରୁ ୫ ଡିଗ୍ରୀ କମ୍ ରହିବା ଯୋଗୁଁ ଶୀତ ଅନୁଭୂତ ହେବ। ସ୍ଥଳଭାଗ ସହ ସଂସ୍ପର୍ଶ, ଥଣ୍ଡା ଓ ଶୁଷ୍କ ବାୟୁର ପ୍ରଭାବ ଏବଂ ପୂର୍ବଘାଟ ପର୍ବତମାଳା ଯୋଗୁଁ ମୁରାସୁ ଦୁର୍ବଳ ହେବ ବୋଲି କହିଛନ୍ତି ପାଣିପାଗ ବିଶେଷଜ୍ଞ ଶରତ ସାହୁ । ବାତ୍ୟା ପ୍ରଭାବ କମିବା ପରେ ବାୟୁମଣ୍ଡଳରେ ଜଳୀୟବାଷ୍ପର ପରିମାଣ ହ୍ରାସ ପାଇବ । ଫଳରେ ନଭେମ୍ବର ୮ ଓ ୯ ତାରିଖରୁ ରାଜ୍ୟରେ ଶୀତର ପ୍ରକୋପ ବଢ଼ିବା ସମ୍ଭାବନା ରହିଛି । ଅନ୍ୟପଟେ ଆଗାମୀ ଦୁଇ ଦିନରେ ଦିନ ତାପମାତ୍ରା ୧ରୁ ୨ ଡିଗ୍ରୀ ବଢ଼ିପାରେ ।

• ଦୁର୍ବଳ ହେଉଛି ବାତ୍ୟା 'ମୁରାସୁ'

ଆନ୍ଧ୍ର ଉପକୂଳରେ ସ୍ଥଳଭାଗ ଛୁଇଁସାରିଛି ବାତ୍ୟା ମୁରାସୁ । ନେଲୋର ଓ ନରସାପୁର ମଧ୍ୟବର୍ତ୍ତୀ ଅଞ୍ଚଳରେ ମଙ୍ଗଳବାର ଭୋର ୩ଟା ୩୦ରୁ ୫ଟା ୩୦ ମଧ୍ୟରେ ସ୍ଥଳଭାଗ ଅତିକ୍ରମ କରିଥିଲା ବାତ୍ୟା । ଲ୍ୟାଣ୍ଡଫଲ୍ ସମୟରେ ପବନର ବେଗ ଘଣ୍ଟାପ୍ରତି ୧୦୦ରୁ ୧୧୦ କିଲୋମିଟର ଥିବାବେଳେ ଝଟକା ପବନର ବେଗ ୧୨୦ କିଲୋମିଟର ରହିଥିଲା । ସ୍ଥଳଭାଗ ଅତିକ୍ରମ ପରେ ଧୀରେ ଧୀରେ ଦୁର୍ବଳ ହେଉଛି ବାତ୍ୟା । ଆଜି ଅପରାହ୍ନ ସୁଦ୍ଧା ସାଧାରଣ ବାତ୍ୟା ଏବଂ ମଧ୍ୟରାତ୍ରି ସୁଦ୍ଧା ଅତି ଗଭୀର ଅବପାତରେ ପରିଣତ ହେବାର ଆକଳନ କରାଯାଇଛି ।

ପଢନ୍ତୁ ଏହି ଖବର: ସାମୁଦ୍ରିକ ବାତ୍ୟା 'ମୁରାସୁ' ଆନ୍ଧ୍ରର ନେଲୋରରେ ଛୁଇଁଲା ସ୍ଥଳଭାଗ... ଘଣ୍ଟାପ୍ରତି ୧୦୦-୧୧୦ କିମି ବେଗରେ ବହିଲା ପବନ

ତେବେ ବାତ୍ୟାର ସିଧାସଳଖ ବଡ଼ ପ୍ରଭାବ ଓଡ଼ିଶା ଉପରେ ପଡ଼ିବାର ଆଶଙ୍କା ନାହିଁ । ଆଜି ଓ ଆସନ୍ତାକାଲି ପୂର୍ବାହ୍ନ ଯାଏଁ ରାଜ୍ୟର କିଛି ସ୍ଥାନରେ ବର୍ଷା ହୋଇପାରେ । ମାଲକାନଗିରି ଓ କୋରାପୁଟର ଗୋଟିଏ କିମ୍ବା ଦୁଇଟି ସ୍ଥାନରେ ପ୍ରବଳ ବର୍ଷାର ଆଶଙ୍କା ରହିଛି । ଗତ ୨୪ ଘଣ୍ଟାରେ ଗଞ୍ଜାମ ଜିଲ୍ଲା ପାତ୍ରପୁରରେ ସର୍ବାଧିକ ୪୩ ମିଲିମିଟର ବର୍ଷା ରେକର୍ଡ ହୋଇଛି । ୫ ତାରିଖରୁ ବର୍ଷାର ପରିମାଣ କମିବା ସହ ୬, ୭ ଓ ୮ ତାରିଖରେ ପାଗ ମୁଖ୍ୟତଃ ଶୁଖିଲା ରହିବ । ଫଳରେ ଓଡ଼ିଶାରେ କମିବ ବର୍ଷା । ନଭେମ୍ବର ୮ରୁ ରାଜ୍ୟରେ ହେବ ଶୀତ ।