Supreme Court / ୨୬ ବର୍ଷ ପରେ ଜେଲରୁ ମୁକୁଳିବେ ଦାରା ସିଂ ! ଅଗଷ୍ଟ ୧୫ ସୁଦ୍ଧା ମୁକ୍ତ କରିବାକୁ କହିଲେ ସୁପ୍ରିମକୋର୍ଟ

ନୂଆଦିଲ୍ଲୀ: ବହୁ ଚର୍ଚ୍ଚିତ ଗ୍ରାହାମ ଷ୍ଟେନ୍ସ ପୋଡ଼ି ମାମଲାରେ ଆଜୀବନ ସଜା କାଟୁଥିବା ଦାରା ସିଂ, ଆଗାମୀ ଅଗଷ୍ଟ ୧୫ ସୁଦ୍ଧା ଜେଲରୁ ମୁକୁଳି ପାରନ୍ତି । ଏନେଇ ଆଜି ଶୁଣାଣିବେଳେ ସ୍ପଷ୍ଟ କରିଛନ୍ତି ସୁପ୍ରିମକୋର୍ଟ । ବିଚାରପତି ଜଷ୍ଟିସ ମନୋଜ ମିଶ୍ର ଏବଂ ବିଜୟ ବିଷ୍ଣୋଇଙ୍କ ଖଣ୍ଡପୀଠ ଏଭଳି ସଂକେତ ଦେଇଛନ୍ତି ।

ଜେଲରେ ଭଲ ବ୍ୟବହାର କାରଣରୁ ମୋଟ୍ ୫୬ ଜଣଙ୍କୁ ମୁକ୍ତ କରିବାକୁ ସୁପାରିଶ କରିଥିଲା ଷ୍ଟେଟ ସେଣ୍ଟନ୍ସ ରିଭ୍ୟୁ ବୋର୍ଡ (SRB) । ଏହି ତାଲିକାରେ ରହିଛି ରବୀନ୍ଦ୍ର ପାଲ ଓରଫ ଦାରା ସିଂଙ୍କ ନାଁ । ଦାରାଙ୍କୁ ମୁକ୍ତ କରିବା ନେଇ ଗତ ଜୁଲାଇ ୬ ତାରିଖରେ ବସିଥିଲା ଷ୍ଟେଟ ସେଣ୍ଟେନ୍ସ ବୋର୍ଡର ବୈଠକ । ଦାରାଙ୍କୁ ମୁକ୍ତ କରିବା ପାଇଁ ରାଜ୍ୟ ସରକାରଙ୍କୁ ସୁପାରିଶ କରିଥିଲା ବୋର୍ଡ ।

ଏଥିସହ ପଢ଼ନ୍ତୁ: ୭ଟି ବିଭାଗର ୧୩ଟି ପ୍ରସ୍ତାବକୁ କ୍ୟାବିନେଟ୍ ମୋହର; ଗ୍ରାମାଞ୍ଚଳର ରାସ୍ତା ଉପରେ ଗୁରୁତ୍ଵ 

ହେଲେ ତାଙ୍କର କିଛି ଭେରିଫିକେସନ୍ ବାକି ରହିଯାଇଥିବା, ଆଜି ଶୁଣାଣି ବେଳେ ସୁପ୍ରିମକୋର୍ଟଙ୍କୁ ଜଣାଇଥିଲେ ରାଜ୍ୟ ସରକାର । ଫଳରେ କୋର୍ଟ ୧୫ ଅଗଷ୍ଟ ସୁଦ୍ଧା ସବୁ ପ୍ରକ୍ରିୟା ସାରି ତାଙ୍କୁ ମୁକ୍ତ କରିବା ପାଇଁ ପଦକ୍ଷେପ ନେବାକୁ କହିଛନ୍ତି । ନହେଲେ ଅଗଷ୍ଟ ୧୯ ତାରିଖରେ ପବର୍ତ୍ତୀ ଶୁଣାଣିରେ କୋର୍ଟ ନିଷ୍ପତ୍ତି କରିବେ ବୋଲି ଗଣମାଧ୍ୟମକୁ ସୂଚନା ଦେଇଛନ୍ତି ଦାରାଙ୍କ ଓକିଲ ଏପି ସିଂ ।

୧୯୯୯ରେ କେନ୍ଦୁଝର ଜିଲ୍ଲା ମନୋହରପୁରରେ ଏକ ଭିଡ଼ ହିଂସା ଘଟଣାରେ ଅଷ୍ଟ୍ରେଲିଆର ଖ୍ରୀଷ୍ଟିଆନ ମିସନାରୀ ଗ୍ରାହମ ଷ୍ଟେନ୍ସଙ୍କ ସହ ତାଙ୍କ ଦୁଇ ନାବାଲକ ପୁଅଙ୍କୁ ପୋଡ଼ି ମାରି ଦେଇଥିବା ଅଭିଯୋଗ ହୋଇଥିଲା । ଦାରା ସିଂ ଏହି ଭିଡ଼ ହିଂସାର ନେତୃତ୍ବ ନେଇଥିବା ଅଭିଯୋଗରେ ୨୦୦୩ରେ ସ୍ବତନ୍ତ୍ର ସିବିଆଇ କୋର୍ଟ ଦାରା ସିଂଙ୍କୁ ଦୋଷୀ ସାବ୍ୟସ୍ତ କରି ମୃତ୍ୟୁ ଦଣ୍ଡାଦେଶ କରିଥିଲେ ।

ଏଥିସହ ପଢ଼ନ୍ତୁ: ଝାରସୁଗୁଡ଼ାରେ BJDକୁ ଝଟ୍‌କା; ନିଲମ୍ବନକୁ ବିରୋଧ କରି ଦଳ ଛାଡ଼ିଲେ ୧୦ କାଉନସିଲର୍ 

୨୦୦୫ରେ ଓଡ଼ିଶା ହାଇକୋର୍ଟ ଏହାକୁ କୋହଳ କରି ଆଜୀବନ କାରାଦଣ୍ଡ କରିଥିଲେ । ୨୦୧୧ରେ ସୁପ୍ରିମକୋର୍ଟ ମଧ୍ୟ ଦାରା ସିଂଙ୍କ ଆଜୀବନ କାରାଦଣ୍ଡକୁ କାଏମ ରଖିଥିଲେ । ସେବେଠାରୁ ଦାରା ସିଂ ଭୁବନେଶ୍ବର ଝାରପଡ଼ା ଜେଲରେ ରହୁଛନ୍ତି । ୨୬ ବର୍ଷରୁ ଅଧିକ ସମୟ ଧରି ସେ ଜେଲରେ ରହି ସାରିଥିବାରୁ ଏବେ ତାଙ୍କ ମୁକ୍ତି ପାଇଁ ପ୍ରକ୍ରିୟା ଆରମ୍ଭ ହୋଇଛି ।