ବିଶ୍ୱ ପ୍ରସିଦ୍ଧ ଘୋଷଯାତ୍ରାରେ ମହାପ୍ରଭୁଙ୍କ ସହ ଯେଉଁମାନଙ୍କର ନବକଳେବର ହୁଏ, ଆଉ ମହାପ୍ରଭୁ ପାତାଳୀ ହେଲେ ଯେଉଁମାନେ ସମାଧିସ୍ଥ ହୁଅନ୍ତି, ସେହି ରଥ ସାରଥିମାନେ ଆଜି ଅବହେଳିତ । ନରେନ୍ଦ୍ର ମହଲା ସ୍ଥିତ ଟିଣ ଛାତ ତଳେ ପ୍ରଖର ଗରମରେ ସିଝୁଛନ୍ତି ଦାରୁବ୍ରହ୍ମଙ୍କ ରଥର ସାରଥି । ବର୍ଷ ସାରା ଖଈ କୋରା ଭୋଗ ହେଉଥିବା ଏହି ପୂଜ୍ୟ ଠାକୁରଙ୍କ ପାଇଁ ସ୍ଥାୟୀ ଗୃହ ନିର୍ମାଣ ପାଇଁ ରୂପକାର ସେବକଙ୍କ ମହଲରେ ତେଜିଛି ଅସନ୍ତୋଷ ।

ବିଶ୍ୱ ପ୍ରସିଦ୍ଧ ଘୋଷଯାତ୍ରାରେ ତିନି ରଥର ସାରଥି ସାଜନ୍ତି ଦାରୁକ, ଅର୍ଜୁନ ଓ ମାତଳୀ । ମହାପ୍ରଭୁଙ୍କ ସହିତ ଏମାନଙ୍କର ମଧ୍ୟ ନବକଳେବର ହୋଇଥାଏ, ଆଉ ମହାପ୍ରଭୁ ପାତାଳୀ ହେଲେ ଏମାନେ ବି ସମାଧିସ୍ଥ ହୁଅନ୍ତି । ଘୋଷଯାତ୍ରା ପରେ ରଥର ବିଭିନ୍ନ ଅଂଶକୁ ଭାଙ୍ଗି ଶ୍ରୀମନ୍ଦିର ରୋଷଘରେ ଜାଳେଣି ରୂପେ ବ୍ୟବହୃତ ହେଉଥିବା ବେଳେ, ଏହି ଜୀବନ୍ତ ଠାକୁର କିନ୍ତୁ ଅକ୍ଷତ ରୁହନ୍ତି । ହେଲେ ଏହି ରଥ ସାରଥିମାନେ ଏବେ ନରେନ୍ଦ୍ର ମହଲା ସ୍ଥିତ ଟିଣ ଛାତ ତଳେ ଅପୂଜା ହୋଇ ପଡ଼ି ରହିବା ସହ ପ୍ରଖର ଗରମରେ ସିଝୁଛନ୍ତି । ଯାହାକୁ ନେଇ ସେବାୟତ ମହଲରେ ତେଜିଛି ଅସନ୍ତୋଷ ।

ଅଧିକ ପଢ଼ନ୍ତୁ: ମୁଖା ଖୋଲିଦେଲା ମିଛ ଅଭିଯୋଗ; ଗଣଦୁଷ୍କର୍ମ ଅଭିଯୋଗ ପାଇଁ ପ୍ରେମିକାକୁ କରୁଥିଲା ମୋହରା

ପୂର୍ବ ସମୟରେ ରଥ ସାରଥିମାନେ ଶ୍ରୀମନ୍ଦିର ଭିତରେ ପାଣି ଘରେ ରହିଥିଲେ । ପରେ ସେମାନଙ୍କୁ କୋଇଲି ବୈକୁଣ୍ଠକୁ ସ୍ଥାନାନ୍ତର କରାଯାଇଥିଲା । ତା'ପରେ ଦୋଳବେଦୀ ଓ ପରିକ୍ରମା ପ୍ରକଳ୍ପ ନିର୍ମାଣ ପରେ ଏବେ ସେମାନଙ୍କୁ ନରେନ୍ଦ୍ର ମହଲା ସ୍ଥିତ ଟିଣ ଛାତ ତଳକୁ ଅଣାଯାଇଛି । ତେବେ ବର୍ଷ ସାରା ଖଈ କୋରା ଭୋଗ ହେଉଥିବା ଏହି ପୂଜ୍ୟ ଠାକୁରଙ୍କୁ ଉପଯୁକ୍ତ ସମ୍ମାନ ଦେଇ ଏକ ସ୍ଥାୟୀ ଗୃହ ନିର୍ମାଣ ସହ ପୂଜାର୍ଚ୍ଚନା କରିବାକୁ ରୂପକାର ସେବକମାନେ ଦାବି କରିଛନ୍ତି । ସେପଟେ ରଥଯାତ୍ରା ସମୟରେ ଏହାର ସମାଧାନ କରାଯିବ ବୋଲି କହିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ।

ଯେଉଁ ସାରଥିମାନେ ରଥଯାତ୍ରା ସମୟରେ ଲକ୍ଷ ଲକ୍ଷ ଭକ୍ତଙ୍କ ଆକର୍ଷଣର କେନ୍ଦ୍ରବିନ୍ଦୁ ସାଜିଥାନ୍ତି, ସେମାନେ ଆଜି ଏମିତି ଅଲୋଡା ଅବସ୍ଥାରେ ପଡ଼ି ରହିବା ସମସ୍ତଙ୍କୁ ବ୍ୟଥିତ କରିଛି । ତେବେ କେତେ ଶୀଘ୍ର ଟିଣ ଛାତର ଏହି ଅନ୍ଧାରୀ କୋଠରୀରୁ ମୁକ୍ତି ପାଇ ଏକ ସ୍ଥାୟୀ ଗୃହରେ ପୂଜା ପାଇବେ ଦାରୁବ୍ରହ୍ମଙ୍କ ରଥ ସାରଥି ତାକୁ ଦେଖିବାକୁ ଭକ୍ତଙ୍କ ଅପେକ୍ଷା ।