Argus News - ଗାଁ ପାଣିଟାଙ୍କି ଭିତରେ ମୃତ ମାଙ୍କଡ଼; ଭୟଭୀତ ଅବସ୍ଥାରେ ପାଣି ପିଉଥିବା ଗ୍ରାମବାସୀ

ଗାଁର ପିଛା ଛାଡୁନି ପିଇବା ପାଣି ସମସ୍ୟା । ବହୁ ଉଦ୍ୟମ ପରେ ଗାଁଲୋକେ ପାଣି ଟାଙ୍କିରୁ ପାଣି ନେଉଥିଲେ । ହେଲେ ଏବେ ପାଣି ଟାଙ୍କି ଭିତରୁ ବାହାରିଛି ମଲା ମାଙ୍କଡ଼ । ପ୍ରାୟ ୭ ଦିନ ଧରି ମଲା ମାଙ୍କଡ଼ ପଡ଼ିଥିବା ପାଣି ପିଉଥିଲେ ଗ୍ରାମବାସୀ । ଏବେ ଟାଙ୍କିରୁ ମାଙ୍କଡ଼ର ମୃତଦେହ ଉଦ୍ଧାର ହେବା ପରେ ପୁରା ଗ୍ରାମବାସୀ ଭୟଭୀତ ଅବସ୍ଥାରେ ଅଛନ୍ତି । ଏଭଳି ଅଭାବନୀୟ ଘଟଣା ବରଗଡ଼ ବିଜେପୁର ନିର୍ବାଚନ ମଣ୍ଡଳୀ ଗାଇସିଲେଟ୍ ବ୍ଲକ୍ ଡାଙ୍ଗବାହାଲ ଗାଁରେ ଘଟିଛି ।

ଡାଙ୍ଗବାହାଲ ଗାଁରେ ବହୁ ଦିନ ଧରି ପିଇବା ପାଣି ସମସ୍ୟା ରହିଥିଲା । ଗାଁ ଲୋକେ ନଳକୂପରୁ ପିଉଥିବା ପାଣି ଫ୍ଲୋରାଇଟ ଯୁକ୍ତ ଥିବାରୁ ଗାଁର ଅନେକ ଲୋକ କିଡନୀ, ଦାନ୍ତ ହଳଦିଆ ପଡ଼ିଯିବା ପରି ସମସ୍ୟାର ସମ୍ମୁଖୀନ ହେଉଥିଲେ । ଏହାପରେ ଅଙ୍ଗ ନଦୀରୁ ପିଇବା ପାଣିର ସୁବିଧା କରାଯାଇଥିଲା । ଏବେ ମଲା ମାଙ୍କଡ଼ ଟାଙ୍କି ଭିତରୁ ବାହାରିବା ପରେ ଅସନ୍ତୋଷ ଅବସ୍ଥାରେ ଅଛନ୍ତି ଗାଁ ଲୋକେ । ପାଣିଟାଙ୍କିର ସଠିକ ରକ୍ଷାଣବେକ୍ଷଣ ହେଉନଥିବା ଗାଁଲୋକେ ଅଭିଯୋଗ କରିଛନ୍ତି ।

• ଖୋଲା ଅବସ୍ଥାରେ ଥିଲା ପାଣି ଟାଙ୍କି

ଗ୍ରାମବାସୀଙ୍କ କହିବା କଥା ହେଉଛି ଏହି ପାଣି ଟାଙ୍କିଟି ଖୋଲା ଅବସ୍ଥାରେ ଥିଲା । ଏହା ଉପରେ କୌଣସି ଢାଙ୍କୁଣି ରଖାଯାଇନଥିଲା । ପୂର୍ବରୁ ପିଇବା ପାଣିରୁ କୀଟ ପତଙ୍ଗା ବାହାରୁଥିଲା । ଟାଙ୍କି ଖୋଲା ଥିବାରୁ ମାଙ୍କଡ଼ଟି ଟାଙ୍କି ଭିତରେ ପଡ଼ିଯାଇଥିବା ଅଭିଯୋଗ ହୋଇଛି । ଏହି ପାଣି ଟାଙ୍କି ଉପରେ ପୂରା ଗାଁ ନିର୍ଭରଶୀଳ । ପିଲାଠୁ ବୟସ୍କ ସମସ୍ତେ ଏଠୁ ପାଣି ପିଇଥାନ୍ତି । ଏବେ ମଲା ମାଙ୍କଡ଼ ବାହାରିବା ପରେ ଲୋକେ ସ୍ଵାସ୍ଥ୍ୟ ପରୀକ୍ଷା ନେଇ ଦାବି କରିଛନ୍ତି । ଗାଁର ହଜାର ହଜାର ଲୋକ ଏହି ପାଣି ପିଇବା ପରେ ପ୍ରଶାସନକୁ ମେଡିକାଲ ପରୀକ୍ଷା ପାଇଁ ଦାବି କରିଛନ୍ତି ।

ପଢନ୍ତୁ ଏହି ଖବର: ଚପଲ ପିନ୍ଧି ମନ୍ଦିରରେ ଫଟୋସୁଟ୍; ମାଡ଼ି ଆସିଲେ ସ୍ଥାନୀୟ ଲୋକ, ଦେଲେ ଉତ୍ତମ ମଧ୍ୟମ

• ଗାଁରେ ଉତ୍କଟ ପିଇବା ପାଣି ସମସ୍ୟା

ପୂର୍ବରୁ ଗାଁରେ ପିଇବା ପାଣି ସମସ୍ୟା ରହିଥିଲା । ଏବେ ଟାଙ୍କିରୁ ମଲା ମାଙ୍କଡ଼ ବାହାରିବା ପରେ ପୁଣି ଉତ୍କଟ ପିଇବା ପାଣି ସଙ୍କଟ ଦେଖାଦେଇଛି । ସ୍ଵାସ୍ଥ୍ୟ ବିଭାଗ ଗାଁଲୋକଙ୍କୁ ଆସି ପରୀକ୍ଷା କରାଇବା ସହ ବିଭାଗୀୟ ଅଧିକାରୀ ଶୁଦ୍ଧ ପାଣି ତୁରନ୍ତ ଯୋଗାଇବାକୁ ଦାବି କରିଛନ୍ତି ଗାଁ ଲୋକେ ।