Dharmendra Pradhan / ଦେବଗଡ଼ରେ ସ୍କୁଲ ଛାତ୍ରଛାତ୍ରୀଙ୍କ ସହ ସ୍ୱାଧୀନତା ଦିବସ ପାଳିଲେ ସାଂସଦ ଧର୍ମେନ୍ଦ୍ର ପ୍ରଧାନ

ଦେବଗଡ଼/ବାରକୋଟ: ସମ୍ବଲପୁର ସାଂସଦ ତଥା ପୂର୍ବତନ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଶନିବାର ଦେବଗଡ଼ ଜିଲ୍ଲା ବାରକୋଟ ବ୍ଲକ୍‌ ସ୍ଥିତ ଝାରବାହାଲ ଏସ.ଏସ.ଡି. ହାଇସ୍କୁଲ ପରିସରରେ ସ୍ୱାଧୀନତା ଦିବସ ପାଳନ କରିବା ସହ ଜାତୀୟ ପତାକା ଉତ୍ତୋଳନ କରିଛନ୍ତି । ସ୍ୱାଧୀନତା ଦିବସର ଶୁଭେଚ୍ଛା ଜଣାଇବା ଜାତୀୟ ପତାକା ତ୍ରିରଙ୍ଗାକୁ ଭାରତର ଏକତା, ବିବିଧତା ଏବଂ ଗର୍ବର ଜୀବନ୍ତ ପ୍ରତୀକ ଭାବେ ଅଭିହିତ କରିଥିଲେ ପ୍ରଧାନ । ଏହି ଅବସରରେ ଦେବଗଡ଼, ଅନୁଗୋଳ, କେନ୍ଦୁଝର ଓ ସୁନ୍ଦରଗଡ଼ ଜିଲ୍ଲାର ପୌଡ଼ି ଭୂୟାଁ (ପିଭିଟିଜି) ଓ ମୁଣ୍ଡା ସମ୍ପ୍ରଦାୟରୁ ଆସିଥିବା ପ୍ରତିଭାବାନ୍ ଛାତ୍ରଛାତ୍ରୀମାନଙ୍କ ସହ ସେ ଭାବବିନିମୟ କରିଥିଲେ ।

ଛାତ୍ରଛାତ୍ରୀଙ୍କୁ ସମ୍ବୋଧିତ କରି ଧର୍ମେନ୍ଦ୍ର କହିଥିଲେ, "ଗ୍ରାମାଞ୍ଚଳ ଓ ଆଦିବାସୀ ମାଟିରୁ ବାହାରୁଥିବା ଏହି କୋମଳମତି ପ୍ରତିଭାମାନେ ହିଁ କାଲିର ନୂତନ ଭାରତର ଭିତ୍ତିଭୂମି । ସେମାନଙ୍କ ଆଖିରେ ଥିବା ଉଚ୍ଚ ଆକାଂକ୍ଷା, ସ୍ୱପ୍ନ ଓ ସାହସ ସତରେ ପ୍ରେରଣାଦାୟୀ । କେବଳ ଚାକିରି ଖୋଜିବା ନୁହେଁ, ବରଂ ନିଜେ ସମର୍ଥ ହୋଇ ଅନ୍ୟମାନଙ୍କୁ ନିଯୁକ୍ତି ଦେବାର ଯେଉଁ ସଂକଳ୍ପ ସେମାନଙ୍କ ମନରେ ରହିଛି, ତାହା ଶିକ୍ଷାର ପ୍ରକୃତ ବିକାଶକୁ ଦର୍ଶାଉଛି । ଜନଜାତି ଶିକ୍ଷାର ବିକାଶ ଓ ଏହି ଶିଶୁମାନଙ୍କ ସାଙ୍ଗଠନିକ ସଶକ୍ତୀକରଣ ହିଁ ଆମର ପ୍ରାଥମିକତା ।"

ଝରବାହାଳ ଏସ.ଏସ.ଡି. ହାଇସ୍କୁଲରେ ଦେବଗଡ଼, ଓ ଅନୁଗୋଳ, କେନ୍ଦୁଝର, ସୁନ୍ଦରଗଡ଼ର ପୌଡ଼ି ଭୂୟାଁ ଓ ମୁଣ୍ଡା ସମେତ ଅନ୍ୟ ଜନଜାତି ସମ୍ପ୍ରଦାୟରୁ ଆସିଥିବା ଛାତ୍ରଛାତ୍ରୀମାନଙ୍କ ସହ କଥା ହେଲି । ସେମାନଙ୍କ ଆଖିରେ ଥିବା ଉଚ୍ଚ ଆକାଂକ୍ଷା, ସ୍ୱପ୍ନ ଓ ସାହସ ସତରେ ପ୍ରେରଣାଦାୟୀ । କେବଳ ଚାକିରି ଖୋଜିବା ନୁହେଁ, ବରଂ ନିଜେ ସମର୍ଥ ହୋଇ… pic.twitter.com/qUVgA926BP

— Dharmendra Pradhan (@dpradhanbjp) August 15, 2026

ପଢନ୍ତୁ ଏହି ଖବର: ଭୁବନେଶ୍ୱର ମହାତ୍ମା ଗାନ୍ଧୀ ମାର୍ଗରେ ୮୦ତମ ରାଜ୍ୟସ୍ତରୀୟ ସ୍ୱାଧୀନତା ଦିବସ ପାଳନ

ଦେବଗଡ଼ର ଐତିହ୍ୟକୁ ସ୍ମରଣ କରି ସେ କହିଥିଲେ ଯେ, ଦେବଗଡ଼ର ଶିକ୍ଷା ଓ ବିକାଶରେ ମହାରାଜା ବାସୁଦେବ ସୁଢ଼ଳ ଦେବ ଏବଂ ସଚ୍ଚିଦାନନ୍ଦ ତ୍ରିଭୁବନ ଦେବଙ୍କ ଯୁଗାନ୍ତକାରୀ ଅବଦାନ ଅତୁଳନୀୟ । ସେହିପରି ବୀର ସୁରେନ୍ଦ୍ର ସାଏ, ଭଗବାନ ବିର୍ସା ମୁଣ୍ଡା, ଜୟୀ ରାଜଗୁରୁ, ଲକ୍ଷ୍ମଣ ନାୟକ, ବକ୍ସି ଜଗବନ୍ଧୁ ଓ ଶହୀଦ ବାଜି ରାଉତଙ୍କ ଭଳି ମହାନ ସଂଗ୍ରାମୀମାନଙ୍କ ତ୍ୟାଗ ଓ ବଳିଦାନ ବଳରେ ଆମେ ସ୍ୱାଧୀନତା ପ୍ରାପ୍ତ କରିଛେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ 'ବିକଶିତ ଭାରତ' ଆହ୍ୱାନ ବିଷୟରେ ଉଲ୍ଲେଖ କରି ଧର୍ମେନ୍ଦ୍ର କହିଛନ୍ତି ଯେ, ୨୦୩୬ରେ ଓଡ଼ିଶା ପ୍ରଦେଶ ଗଠନର ୧୦୦ ବର୍ଷ ପୂରଣ ହେବାକୁ ଯାଉଥିବା ବେଳେ ୨୦୪୭କୁ ଦେଶ ସ୍ୱାଧୀନତାର ଶତବାର୍ଷିକୀ ପୂରଣ କରିବ । ତେଣୁ ଆଗାମୀ ୧୫ରୁ୨୦ ବର୍ଷ ଆମ ଜୀବନର ସବୁଠାରୁ ଗୁରୁତ୍ୱପୂର୍ଣ୍ଣ ସମୟ । ବିକଶିତ ଭାରତ ପାଇଁ ଓଡ଼ିଶାକୁ ବିକଶିତ କରିବାକୁ ପଡ଼ିବ । ଏହି କୋମଳମତି ଛାତ୍ରଛାତ୍ରୀମାନେ ହିଁ ଆଗାମୀ ଦିନରେ ସମୃଦ୍ଧ ଦେବଗଡ଼, ବିକଶିତ ଓଡ଼ିଶା ଓ ସଶକ୍ତ ଭାରତ ଗଠନର ଆଗଧାଡ଼ିର ନେତୃତ୍ୱ ନେବେ ବୋଲି ସେ କହିଥିଲେ ।

‘ସ୍ୱାଧୀନତା ଦିବସ’ର ହାର୍ଦ୍ଦିକ ଅଭିନନ୍ଦନ

ଦେବଗଡ଼ ଜିଲ୍ଲା ବାରକୋଟ ଝରବାହାଳ ଏସ.ଏସ.ଡି. ସ୍କୁଲ ପରିସରରେ ଛାତ୍ରଛାତ୍ରୀମାନଙ୍କ ଗହଣରେ ଜାତୀୟ ପତାକା ଉତ୍ତୋଳନ କରି ନିଜକୁ ଗୌରବାନ୍ୱିତ ମନେକରୁଛି । ସ୍ୱାଧୀନତାର ଏହି ମହାପର୍ବରେ ଆମ ସମାଜର ମୁଖ୍ୟସ୍ରୋତରୁ ଆସୁଥିବା ପ୍ରତିଭାବାନ୍ ଛାତ୍ରଛାତ୍ରୀମାନଙ୍କ ସହ କିଛି ସମୟ ଅତିବାହିତ କରିବା… pic.twitter.com/aqDF7JqjNx

— Dharmendra Pradhan (@dpradhanbjp) August 15, 2026

ଏହା ପୂର୍ବରୁ ବାରକୋଟ ଝରବାହାଳଠାରେ ଆୟୋଜିତ 'ତ୍ରିରଙ୍ଗା ଯାତ୍ରା'ରେ ଧର୍ମେନ୍ଦ୍ର ସାମିଲ ହୋଇଥିଲେ । ଦେବଗଡ଼ଠାରେ ‘ଧରତୀ ଆବା’ ଭଗବାନ ବିର୍ସା ମୁଣ୍ଡା ଏବଂ ଭାରତୀୟ ସମ୍ବିଧାନର ପ୍ରଣେତା ଭାରତ ରତ୍ନ ବାବାସାହେବ ଡକ୍ଟର ଭୀମରାଓ ଆମ୍ବେଦକରଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟାର୍ପଣ କରି ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ମାତୃଭୂମିର ସ୍ୱାଧୀନତା, ସାମାଜିକ ନ୍ୟାୟ ଓ ଏକତା ପାଇଁ ଏହି ମହାନ ଜନନାୟକମାନଙ୍କ ଅତୁଳନୀୟ ଯୋଗଦାନ ଏବଂ ତ୍ୟାଗ ସଦାସର୍ବଦା ପ୍ରେରଣା ଯୋଗାଇବ ବୋଲି ସେ ପ୍ରକାଶ କରିଥିଲେ ।