Dr Ashok Mahapatra / ଆଜି ସନ୍ଧ୍ୟାରେ ଭୁବନେଶ୍ଵର ଆସିବ ସୁନାମଧନ୍ୟ ଡାକ୍ତର ଅଶୋକ ମହାପାତ୍ରଙ୍କ ପାର୍ଥିବ ଶରୀର

ଭୁବନେଶ୍ଵର: ଆଜି ସନ୍ଧ୍ୟାରେ ଭୁବନେଶ୍ୱର ଆସିବ ସୁନାମଧନ୍ୟ ଡାକ୍ତର ଅଶୋକ କୁମାର ମହାପାତ୍ରଙ୍କ ପାର୍ଥିବ ଶରୀର । ଏହା ପୂର୍ବରୁ ଦିଲ୍ଲୀ ଏମ୍ସ ପରିସରରେ ଶ୍ରଦ୍ଧାଞ୍ଜଳି ଜଣାଇଲେ ବିଶିଷ୍ଟ ବ୍ୟକ୍ତି ଓ ଡାକ୍ତର । ଦୀର୍ଘ ବର୍ଷ ଧରି ଦିଲ୍ଲୀ ଏମ୍ସ ସହ ଜଡ଼ିତ ରହିଥିଲେ ଡାକ୍ତର ମହାପାତ୍ର । ଯୋଡ଼ାମୁଣ୍ଡ ଶିଶୁ ଜଗା-ବଳିଆଙ୍କ ଅସ୍ତ୍ରୋପଚାରରେ ପ୍ରମୁଖ ଭୂମିକା ନେଇଥିଲେ ପ୍ରତିଷ୍ଠିତ ନ୍ୟୁରୋସର୍ଜନ ଡାକ୍ତର ମହାପାତ୍ର । ଦିଲ୍ଲୀ ଏମସରେ ତାଙ୍କ ଶେଷ ଦର୍ଶନ କରୁଛନ୍ତି ବିଭିନ୍ନ ମାନ୍ୟଗଣ୍ୟ ବ୍ୟକ୍ତି । ଏଥିପାଇଁ ଦିଲ୍ଲୀ ଏମସ୍ ଦେଖିବାକୁ ମିଳିଛି ପରିସରରେ ଲୋକରଣ୍ୟ ପରିବେଶ । ଏହି ବିଶିଷ୍ଟ ଡାକ୍ତରଙ୍କୁ ଶେଷ ଶ୍ରଦ୍ଧାଞ୍ଜଳି ଜଣାଉଛନ୍ତି ତାଙ୍କ ଶୁଭେଚ୍ଛୁ, ଛାତ୍ରଛାତ୍ରୀ ଏବଂ ଏମ୍ସର କର୍ମଚାରୀ ।

• ଚିକିତ୍ସାଧୀନ ଅବସ୍ଥାରେ ମୃତ୍ୟୁ

ଗତମାସରେ ଅସୁସ୍ଥ ହୋଇପଡ଼ିଥିଲେ ଡାକ୍ତର ଅଶୋକ ମହାପାତ୍ର । ସେବେଠାରୁ ତାଙ୍କୁ ଦିଲ୍ଲୀ ଏମ୍ସରେ ରଖି ଚିକିତ୍ସା କରାଯାଉଥିଲା । ହେଲେ ଚିକିତ୍ସାଧୀନ ଅବସ୍ଥାରେ ତାଙ୍କର ଦେହାନ୍ତ ହୋଇଥିବା ଜଣାପଡ଼ିଛି । ମୃତ୍ୟୁ ବେଳକୁ ତାଙ୍କୁ ୭୪ ବର୍ଷ ହୋଇଥିଲା । ତାଙ୍କ ବିୟୋଗରେ ଚିକିତ୍ସା ବିଜ୍ଞାନ କ୍ଷେତ୍ରରେ ଏକ ଅପୂରଣୀୟ କ୍ଷତି ସୃଷ୍ଟି ହୋଇଛି।

• ମୃତ୍ୟୁବେଳକୁ ହୋଇଥିଲା ୭୪ବର୍ଷ

୧୯୫୨ ମସିହା ଡିସେମ୍ବର ୨୯ ତାରିଖରେ ପୁରୀରେ ଜନ୍ମଗ୍ରହଣ କରିଥିଲେ ଡାକ୍ତର ଅଶୋକ ମହାପାତ୍ର । ୧୯୭୫ରେ ବ୍ରହ୍ମପୁରର MKCG ମେଡିକାଲ କଲେଜରୁ MBBS ଶେଷ କରିବା ପରେ ନୂଆଦିଲ୍ଲୀ AIIMSରୁ MS ଓ ନ୍ୟୁରୋସର୍ଜରୀରେ MCh ଡିଗ୍ରୀ ହାସଲ କରିଥିଲେ । ୧୯୮୩ରୁ ୨୦୧୭ ପର୍ଯ୍ୟନ୍ତ ସେ AIIMS ଦିଲ୍ଲୀର ନ୍ୟୁରୋସର୍ଜରୀ ବିଭାଗରେ ଅଧ୍ୟାପକ ଭାବେ କାମ କରିଥିଲେ । ୧୯୯୬ରେ ପ୍ରଫେସର ଏବଂ ୨୦୦୪ରେ ସିନିୟର ପ୍ରଫେସର ହୋଇଥିଲେ ।

ପଢନ୍ତୁ ଏହି ଖବର: ବିଶିଷ୍ଟ ସ୍ନାୟୁଶଲ୍ୟ ବିଶେଷଜ୍ଞ ତଥା ପଦ୍ମଶ୍ରୀ ପ୍ରଫେସର ଅଶୋକ କୁମାର ମହାପାତ୍ରଙ୍କ ପରଲୋକ

• ଚିକିତ୍ସା ଜଗତକୁ ଡାକ୍ତରଙ୍କ ଅତୁଳନୀୟ ଅବଦାନ

୧୯୮୩ ମସିହାରୁ ୨୦୧୭ ମସିହା ପର୍ଯ୍ୟନ୍ତ ଦିଲ୍ଲୀ ଏମ୍ସରେ ନିଜର ଚିକିତ୍ସା ସେବା ଓ ଗବେଷଣା ମାଧ୍ୟମରେ ଅନେକ ଅବଦାନ ରଖିଥିଲେ । ମଝିରେ ୨୦୦୬ରୁ ୨୦୦୯ ପର୍ଯ୍ୟନ୍ତ ଲକ୍ଷ୍ନୌର SGPGIର ନିର୍ଦ୍ଦେଶକ ଭାବେ ଦାୟିତ୍ୱ ତୁଲାଇଥିଲେ। ପରବର୍ତ୍ତୀ ସମୟରେ ୨୦୧୨ରୁ ୨୦୧୬ ପର୍ଯ୍ୟନ୍ତ ଭୁବନେଶ୍ୱର ଏମ୍ସର ପ୍ରଥମ ନିର୍ଦ୍ଦେଶକ ଭାବେ ମଧ୍ୟ କାର୍ଯ୍ୟ କରିଥିଲେ । ଦିଲ୍ଲୀ ଏମ୍ସ ସହ ତାଙ୍କର ଦୀର୍ଘଦିନର ସମ୍ପର୍କ ଏବଂ ଅନୁଷ୍ଠାନ ପ୍ରତି ତାଙ୍କର ଅବଦାନକୁ ମନେ ପକାଇ ଆଜି ଶ୍ରଦ୍ଧାଞ୍ଜଳି ଜଣାଇଛନ୍ତି ସହକର୍ମୀ, ଡାକ୍ତର ଓ ଏମ୍ସର କର୍ମଚାରୀବୃନ୍ଦ । ସେ ଜଣେ ସୁନାମଧନ୍ୟ ଡାକ୍ତର ସହ ଜଣେ ଭଲ, ସରଳ ଓ ସ୍ନେହୀ ମଣିଷ ଥିଲେ । ରୋଗୀଙ୍କୁ ନିଜ ପରିବାରର ସଦସ୍ୟ ପରି ଶ୍ରଦ୍ଧା କରୁଥିଲେ ।