Gold Smuggling / ସ୍କାନରରେ ‘ଏନ୍‌ଏଚ୍‌-୧୬'; ଦୁବାଇ-ନେପାଳ-ପଶ୍ଚିମବଙ୍ଗରୁ ଓଡ଼ିଶା: ସୁନା ସ୍ମଗଲିଂର କଳା ସାମ୍ରାଜ୍ୟ

ଭୁବନେଶ୍ଵର: ଦୁବାଇର ସିଣ୍ଡିକେଟ୍, ନେପାଳ-ବାଂଲାଦେଶର ସୀମା, ଆଉ ଓଡ଼ିଶାର ଏନ୍‌ଏଚ୍‌-୧୬ । ସୁନା ତସ୍କରଙ୍କ ପାଇଁ ଏବେ ସେଫ୍ ଜୋନ୍ ପାଲଟିଛି ଓଡ଼ିଶାର ଜାତୀୟ ରାଜପଥ । ବିମାନବନ୍ଦରରେ କଡ଼ା ଚେକିଂକୁ ଏଡ଼ାଇବା ପାଇଁ ସ୍ମଗଲରମାନେ ସଡ଼କ ପଥକୁ କରିଛନ୍ତି ନିଜର ମୁଖ୍ୟ ହତିଆର । ରାଜସ୍ୱ ଗୁଇନ୍ଦା ନିର୍ଦ୍ଦେଶାଳୟ ହାତରେ ଧରାପଡ଼ିଥିବା ଗ୍ୟାଙ୍ଗ୍ ଖୋଲିଛି ସ୍ମଗଲିଂର ସବୁଠାରୁ ବଡ଼ କଳା ସତ । କିଭଳି କୋଟି କୋଟି ଟଙ୍କାର ରାଜସ୍ୱ ଲୁଟି ନେଉଛନ୍ତି ଏହି ସିଣ୍ଡିକେଟ୍‌ ତାକୁ ନେଇ ଏବେ ଜୋରଦାର ଚର୍ଚ୍ଚା ।

• ଜାତୀୟ ରାଜପଥରେ ୫୫% ସୁନା ଚାଲାଣ

ବାଲେଶ୍ୱର, ଭଦ୍ରକ, ଯାଜପୁର, କଟକ, ଭୁବନେଶ୍ୱର ଓ ବ୍ରହ୍ମପୁର ଦେଇ ଏନ୍‌ଏଚ୍‌-୧୬ ରାସ୍ତାରେ ଏହି ଗାଡ଼ିଗୁଡ଼ିକ ସିଧା ପହଞ୍ଚୁଛନ୍ତି ସାଉଥ୍ ଇଣ୍ଡିଆର ଗୋଲ୍ଡ ହବ୍ ହାଇଦ୍ରାବାଦରେ । ଦକ୍ଷିଣ ଭାରତରେ ସୁନାର ଭାରି ଚାହିଦା, ଆଉ ସେପଟେ ସରକାରୀ ଟିକସ ବୃଦ୍ଧି, ଏହି ଦୁଇଟି କାରଣ ପାଇଁ ବଢ଼ି ଚାଲିଛି ବେଆଇନ୍ ସୁନା କାରବାର । ହେଲେ, ସ୍ମଗଲରଙ୍କ ଏହି ଗୁପ୍ତ ପ୍ଲାନ୍ ଉପରେ ପଡ଼ିଥିଲା ରାଜସ୍ୱ ଗୁଇନ୍ଦା ନିର୍ଦ୍ଦେଶାଳୟ (DRI)ର ସୂକ୍ଷ୍ମ ନଜର । ଗୋଟିଏ ସନ୍ଦିଗ୍ଧ ଗାଡ଼ିକୁ ପଶ୍ଚିମବଙ୍ଗ ସୀମାରୁ ପିଛା କରିଥିଲେ DRI ଅଫିସର । ଓଡ଼ିଶା ସୀମା ପାର୍ ହୋଇ ବିଶାଖାପାଟଣା ନିକଟରେ ଗାଡ଼ିଟିକୁ କାବୁ କରାଯାଇଥିଲା ।

• ଜବତ ହେଲା ୯ କୋଟିର ଖାଣ୍ଟି ସୁନା

ଗାଡ଼ିର ଯେତେବେଳେ ସିକ୍ରେଟ୍ ଚ୍ୟାମ୍ବର ଖୋଲାଗଲା, ଅଫିସରମାନଙ୍କ ଆଖି ଖୋସି ହୋଇଗଲା । ଭିତରୁ ବାହାରିଲା ୨୪ କ୍ୟାରେଟ୍ ଶୁଦ୍ଧତାର ପ୍ରାୟ ୯ କୋଟି ଟଙ୍କାର ସୁନା ବିସ୍କୁଟ୍ । ଘଟଣାସ୍ଥଳରୁ ଦୁଇଜଣ ସାର୍ପ ସ୍ମଗଲରଙ୍କୁ ଗିରଫ କରାଯାଇଛି । ଆକାଶ ଓ ଜଳପଥରେ ଚେକିଂ କଡ଼ା ହେବା ପରେ ସ୍ମଗଲିଂ ଗ୍ୟାଙ୍ଗ୍ ଏବେ ସଡ଼କ ପଥକୁ ସବୁଠାରୁ ‘ସେଫ୍ ରୁଟ୍’ ଭାବେ ବାଛି ନେଇଛନ୍ତି ।

ପଢନ୍ତୁ ଏହି ଖବର: ନୃଶଂସ ପାଲଟିଲା ପ୍ରେମିକ; ପ୍ରେମିକାକୁ ୧୦୦୦ ଫୁଟ୍ ଗଭୀର ଖାତକୁ ଠେଲି ଦେଲା

ସଡ଼କ ପଥରେ ବିମାନବନ୍ଦର କିମ୍ବା ବନ୍ଦର ଭଳି ସ୍କାନର କି କଡ଼ା ଚେକିଂ ବ୍ୟବସ୍ଥା ନାହିଁ। ଆଉ ଏହାର ସମ୍ପୂର୍ଣ୍ଣ ଫାଇଦା ଉଠାଉଛନ୍ତି ଅନ୍ତର୍ଜାତୀୟ ସ୍ମଗଲିଂ ସିଣ୍ଡିକେଟ୍‌। ସୁନାରେ ଟ୍ୟାକ୍ସ ବଢ଼ିବା ପରେ କୋଟି କୋଟି ଟଙ୍କାର ଅତିରିକ୍ତ ମୁନାଫା କମାଇବାକୁ ଦେଶର ଅର୍ଥନୀତିକୁ ପଙ୍ଗୁ କରିଦେଉଛନ୍ତି ଏହି ଗ୍ୟାଙ୍ଗଷ୍ଟର। ଆକଳନ କହୁଛି, ଗତ କିଛି ମାସ ମଧ୍ୟରେ DRIର ସ୍ୱତନ୍ତ୍ର ମିଶନ୍‌ରେ ୪୦ କିଲୋରୁ ଅଧିକ ସୁନା ଜବତ ହୋଇସାରିଛି ଏବଂ ୧୫ ଜଣ ସ୍ମଗଲର ଜେଲ୍ ହାଜତକୁ ଯାଇଛନ୍ତି। ହେଲେ ପ୍ରଶ୍ନ ଉଠୁଛି, ହାଇୱେରେ ଗୁଇନ୍ଦା ବିଭାଗ ଓ ପୋଲିସ ଚେକିଂ କୁ ଆହୁରି କଡ଼ାକଡ଼ି ନକଲେ, ସରକାର କେବଳ ରାଜସ୍ୱ ହରାଇବେନି ବରଂ ଓଡ଼ିଶା ପାଲଟିଯିବ ଅପରାଧୀଙ୍କ ସୁରକ୍ଷିତ ଆଡ୍ଡା ।