ଅର୍ଗସ ବ୍ୟୁରୋ : ପାନୀୟ ଜଳ ପାଇଁ ସାରା ରାଜ୍ୟରେ ଲୋକେ ଭୋଗୁଛନ୍ତି ଦୁର୍ଦ୍ଦଶା । ବାଙ୍କୀରୁ କଣ୍ଟାବାଞ୍ଜି, ରାଉରକେଲାରୁ ଗଜପତି ସବୁଠି ପିଇବା ପାଣି ପାଇଁ ରାଜ୍ୟବାସୀ କେମିତି ହେଉଛନ୍ତି ଡହଳ ବିକଳ ହୋଉଥିବା ଦୃଶ୍ୟ ଦେଖିବାକୁ ମିଳିଛି । ଖୋଦ୍ ମୁଖ୍ୟମନ୍ତ୍ରୀଙ୍କ ନିର୍ବାଚନମଣ୍ଡଳୀରେ ତ ପାଣି ସମସ୍ୟା ସବୁଠୁ ବେଶୀ ଉତ୍କଟ । ଗଂଜାମ ଜିଲ୍ଲା ହିଞ୍ଜିଳିକାଟୁ ବ୍ଲକ୍ ବଡ଼ଖଣ୍ଡି ପଞ୍ଚାୟତବାସୀ ପିଇବା ପାଣି ପାଇଁ ହେଉଛନ୍ତି ହନ୍ତସନ୍ତ । ପ୍ରକଳ୍ପ ହୋଇଛି, ଟ୍ୟାପ୍ ଲାଗିଛି, କିନ୍ତୁ ଲୋକଙ୍କୁ ମିଳୁନି ପାଣି । ଖରାଦିନରେ ଜଳକଷ୍ଟରେ ଅସ୍ତବ୍ୟସ୍ତ ଅଞ୍ଚଳବାସୀ । କିନ୍ତୁ ଶୁଣିବାକୁ କେହିନାହିଁ ।

ସବୁ ଘରକୁ ମିଳିବ ଟ୍ୟାପ୍ ଯୋଗେ ପିଇବା ପାଣି ଏଥିପାଇଁ ଓଡ଼ିଶାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଇଛନ୍ତି ୧୦୨୧୭ କୋଟି ଟଙ୍କା । କିନ୍ତୁ ରାଜ୍ୟ ସରକାରଙ୍କ ଅପାରଗତା ଯୋଗୁଁ ହେଉନାହିଁ ପ୍ରକଳ୍ପ । ଲୋକଙ୍କୁ ମିଳୁନି ପିଇବା ପାଣି । ଏ ନେଇ ରାଜ୍ୟ ସରକାରଙ୍କ ଉପରେ ବର୍ଷିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।

ଖୋଦ୍ ରାଜ୍ୟ ସରକାର ବିଧାନସଭାରେ ଦେଇଥିବା ଏ ତଥ୍ୟ ବି ରାଜ୍ୟ ସରକାରଙ୍କ ବିଫଳତା ଓ ଅପାରଗତାର ପ୍ରମାଣ । ରାଜ୍ୟରେ ଏଯାଏଁ ହାତକୁ ନିଆଯାଇଥିବା ୨୦୭ଟି ମେଗା ପାଇପ୍ ଜଳ ପ୍ରକଳ୍ପ ମଧ୍ୟରୁ ମାତ୍ର ୧୬ଟି ପ୍ରକଳ୍ପ ହିଁ କାର୍ଯ୍ୟକ୍ଷମ ହୋଇଛି । ପୁଣି ୨ ମାସ ତଳେ ବିଧାନସଭାରେ ତଥ୍ୟ ଦେଇଛନ୍ତି ରାଜ୍ୟ ସରକାର । ରାଜ୍ୟର ମୋଟ ୪୭ ହଜାର ୨୭୪ଟି ଗାଁରୁ ମାତ୍ର ୧୬,୬୫୯ଟି ଗାଁକୁ ଯୋଗାଯାଇଛି ପାଇପ୍ ପାଣି । ଅର୍ଥାତ୍ ଏବେ ବି ୩୦,୬୧୫ ଗାଁକୁ ହୋଇନାହିଁ ପାଣି ଟ୍ୟାପ୍ ସଂଯୋଗ ।

ଅଧିକ ପଢନ୍ତୁ ଓଡ଼ିଶା ଖବର

ଲୋକଙ୍କୁ ପିଇବା ପାଣି ଯୋଗାଇ ଦେବାକୁ ପର୍ଯ୍ୟାପ୍ତ ପାଣ୍ଠି ଯୋଗାଇ ଦେଉଛନ୍ତି ମୋଦି ସରକାର । କିନ୍ତୁ ବିଜେଡି ସରକାରର ଅପାରଗତା କାରଣରୁ ଓଡ଼ିଶାବାସୀ ଭୋଗୁଛନ୍ତି ଜଳ ଦୁର୍ଦ୍ଦଶା । ଅନ୍ୟପଟେ ଅପରାଗତା ଲୁଚାଇବାକୁ ସରକାର ମାଳ ମାଳ ମିଛ ପ୍ରଚାରରେ ବ୍ୟସ୍ତ । ଏଣୁ ଏଥର ନିର୍ବାଚନରେ ପାନୀୟ ଜଳ ସମସ୍ୟା ପାଲଟିଛି ଅନ୍ୟତମ ପ୍ରମୁଖ ପ୍ରସଙ୍ଗ ।

Argus News | argus news | -Argusnews Home: Odisha Latest News, Breaking News, Trending News, Live TV and more