ଓଡ଼ିଶା ଏବେ ଗଞ୍ଜେଇ ମାଫିଆଙ୍କ ସେଫ୍ ଜୋନ୍ ପାଲଟିଛି । ବାହାର ରାଜ୍ୟରେ ଓଡ଼ିଶା ଗଞ୍ଜେଇର ବଢୁଥିବା ଚାହିଦାକୁ ଦୃଷ୍ଟିରେ ରଖି ଏବେ ପୁଣି ସକ୍ରିୟ ହୋଇଛନ୍ତି ନିଶା ମାଫିଆ । ବିଶେଷ କରି ପଡ଼ୋଶୀ ପଶ୍ଚିମବଙ୍ଗରେ ନିର୍ବାଚନ ଥିବାରୁ ଏହି କାରବାର ଏବେ ଚରମ ସୀମାରେ । କନ୍ଧମାଳରୁ ଭୁବନେଶ୍ୱର ଦେଇ ବାଲେଶ୍ୱର ପର୍ଯ୍ୟନ୍ତ ଲମ୍ବିଛି ଏହି ନିଶା ସିଣ୍ଡିକେଟ୍ । ତେବେ ଏହି ବେଆଇନ କାରବାରର ମୂଳପୋଛ ପାଇଁ ଅଣ୍ଟା ଭିଡ଼ିଛି କ୍ରାଇମବ୍ରାଞ୍ଚର ସ୍ପେଶାଲ ଟାସ୍କଫୋର୍ସ ବା STF ।

କିଛି ଦିନର ନୀରବତା ପରେ ରାଜ୍ୟରେ ପୁଣି ମାତିଛନ୍ତି ନିଶା ମାଫିଆ । କନ୍ଧମାଳରୁ କେନ୍ଦ୍ରାପଡ଼ା ସବୁଠି ଏବେ ଗଞ୍ଜେଇ କାରବାରର ଚେର ଲମ୍ବିଥିବା ବେଳେ ଆକ୍ସନ ମୋଡକୁ ଆସିଛି STF । ମାଫିଆଙ୍କ ଟାର୍ଗେଟ୍‌ରେ ଏବେ ରାଜ୍ୟର ବିଭିନ୍ନ ଶିକ୍ଷାନୁଷ୍ଠାନ ସହ ପଡ଼ୋଶୀ ରାଜ୍ୟ । ସପ୍ଲାଏ ପାଇଁ ବଡ଼ ଧରଣର ଯୋଜନା ଚାଲିଥିବା ବେଳେ ବିଭିନ୍ନ ସ୍ଥାନରେ ଚଢ଼ାଉ ଜାରି ରହିଛି । ଗତ ଦୁଇ ଦିନ ତଳେ ରାଜଧାନୀ ଭିତରକୁ ଗଞ୍ଜେଇ ଚାଲାଣ ହେଉଥିବା ବେଳେ ମାଡ଼ି ବସିଲା STF । ଜବତ ହେଲା କୁଇଣ୍ଟାଲ ୨୫ କେଜିର ଦାମୀ ଗଞ୍ଜେଇ ।

ଅଧିକ ପଢ଼ନ୍ତୁ: ଦରମା ପାଇଁ ଦଙ୍ଗା ନା ପାକିସ୍ତାନ କରୁଛି ଷଡ଼ଯନ୍ତ୍ର ? ଗିରଫ ହେଲେଣି ୩ ଶହରୁ ଅଧିକ

ସେପଟେ ଗତକାଲି ଗଜପତି ଓ ସୁବର୍ଣ୍ଣପୁର ଜିଲ୍ଲାରେ ହୋଇଛି ମେଗା ରେଡ୍ । ଗଜପତିରେ ପୋଲିସ ଚଢ଼ାଉ ବେଳେ ବାଡ଼ି ପଛରେ ମାଟି ତଳୁ ମିଳିଛି ଗଞ୍ଜେଇର ଖଣି । ଟିଣ ବାକ୍ସ ଓ ପ୍ଲାଷ୍ଟିକ ଡ୍ରମ୍ ଭିତରେ ଲୁଚାଇ ରଖାଯାଇଥିଲା ୬୭ ବସ୍ତା ଗଞ୍ଜେଇ, ଯାହାର ବଜାର ମୂଲ୍ୟ ୨ କୋଟିରୁ ଅଧିକ । ସେହିପରି ସୁବର୍ଣ୍ଣପୁରର ଏକ ଫାର୍ମ ହାଉସ୍‌ରୁ ୮ କୁଇଣ୍ଟାଲ ୫୩ କେଜି ଗଞ୍ଜେଇ ଜବତ କରିଛି ପୋଲିସ । ବିଶେଷଜ୍ଞଙ୍କ ମତରେ କନ୍ଧମାଳ ଅଞ୍ଚଳର ପାଣିପାଗ ପାଇଁ ସେଠାକାର ଗଞ୍ଜେଇର ଚାହିଦା ବାହାରେ ଢେର୍ ଅଧିକ ରହିଛି ।

ନିଶା ବେପାରୀଙ୍କ ବିରୋଧରେ ଏବେ ‘ଜିରୋ ଟୋଲରାନ୍ସ’ ନୀତି ଆପଣାଇଛି ପୋଲିସ । ଆଗକୁ ପଡ଼ୋଶୀ ରାଜ୍ୟରେ ନିର୍ବାଚନ ଥିବାରୁ ଚେକ୍ ପୋଷ୍ଟ ଗୁଡ଼ିକରେ କଡ଼ା ନଜର ରଖାଯାଇଛି । ପ୍ରଶ୍ନ ଉଠୁଛି ପୋଲିସ ଓ STFର ଏହି କଡ଼ା ଆକ୍ସନ ପରେ ଗଞ୍ଜେଇ ସିଣ୍ଡିକେଟ୍‌ର ଚେର କଟିବ ନା ମାଫିଆମାନେ ନୂଆ କୌଶଳରେ ନିଜର କଳା ସାମ୍ରାଜ୍ୟ ଜାରି ରଖିବେ ?