ଅର୍ଗସ ବ୍ୟୁରୋ : ଭଦ୍ରକର ସବୁଠାରୁ ବଡ଼ ଇଞ୍ଜିନିୟରିଂ କଲେଜ, ବରପଦା କଲେଜ ଅଫ୍ ଇଞ୍ଜିନିୟରିଂ ଏଣ୍ଡ ଟେକ୍ନୋଲୋଜି । ସବୁଠି ମହାଦୁର୍ନୀତିର ଅଭିଯୋଗ । ଏହାକୁ ନେଇ ଏବେ ବଢ଼ିଛି ବିଜେଡି ବିଧାୟକ ତଥା ପୂର୍ବତନ ମନ୍ତ୍ରୀ ପ୍ରଫୁଲ୍ଲ ସାମଲଙ୍କ ଅଡୁଆ । ଗୁରୁବାର ପ୍ରଫୁଲ୍ଲଙ୍କ ଭଦ୍ରକ ସ୍ଥିତ ୨ଟି ଘର ଓ ଭୁବନେଶ୍ବର ପଳାସପଲ୍ଲୀ ସ୍ଥିତ ଘର ସମେତ ୯ଟି ସ୍ଥାନରେ ଏକକାଳୀନ ଚଢ଼ାଉ କରିଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ । ଆଉ ଇଡି ଚଢ଼ାଉରେ ଭୁବନେଶ୍ବର ପଳାସପଲ୍ଲୀରେ ଥିବା ଘରୁ ମିଳିଛି ୧୦ ଲକ୍ଷ ଟଙ୍କା । ପ୍ରଫୁଲ୍ଲଙ୍କ ପୁଅ ପ୍ରୟାସକାନ୍ତି ବା ଲୁଲୁ ସାମଲଙ୍କ ନାଁରେ ଥିବା ଏହି ଘରୁ ଏକ ଦାମୀ ଗାଡ଼ି ମଧ୍ୟ ଜବତ କରିଛି ଇଡି । ଇଡ଼ି ରେଡ୍ ପରେ ଶୁକ୍ରବାର ବରପଦା ଇଂଜିନିୟରିଂ କଲେଜ ଗେଟ ଆଗରେ ଧାରଣାରେ ବସିଥିବା କର୍ମଚାରୀ ପ୍ରଫୁଲ୍ଲ ସାମଲ ଓ ବିଜେଡ଼ିର ଭଦ୍ରକ ଜିଲ୍ଲା ପର୍ଯ୍ୟବେକ୍ଷକ ସଞ୍ଜୟ ଦାସବର୍ମାଙ୍କ କୁଶପୁତ୍ତଳିକା ଦାହ କରିଛିନ୍ତି । ପ୍ରଫୁଲ୍ଲ ଓ ଲୁଲୁ କଲେଜର କୋଟି କୋଟି ଟଙ୍କା ହଡ଼ପ କରିଛନ୍ତି, ଦୁର୍ନୀତିରେ ସଞ୍ଜୟ ଦାସ ବର୍ମା ସହଯୋଗ କରିଥିବା ଅଭିଯୋଗ କରିବା ସହ ଲୁଟେରାଙ୍କୁ ଗିରଫ କରିବାକୁ ଦାବି କରିଛନ୍ତି ।

କଲେଜର କର୍ମଚାରୀଙ୍କୁ ବର୍ଷ ବର୍ଷ ଧରି ମିଳୁନି ଦରମା । ଏହା ବିରୋଧରେ ସେମାନେ ଦୀର୍ଘ ଦିନ ଧରି କଲେଜ ଗେଟ୍ ଆଗରେ ଧାରଣାରେ ବସିଛନ୍ତି । ସେମାନେ ଇଡି କାର୍ଯ୍ୟାନୁଷ୍ଠାନକୁ ସ୍ବାଗତ କରିଛନ୍ତି । ଏଥିସହ କଲେଜରେ ହୋଇଥିବା କୋଟି କୋଟି ଟଙ୍କାର ଦୁର୍ନୀତିର ତଦନ୍ତ, କ୍ୟାସ୍ ଟ୍ରାଞ୍ଜାକ୍ସନ୍ ବନ୍ଦ କରାଯିବା, ୧୬ ମାସର ବକେୟା ଦରମା ପ୍ରଦାନ ଆଦି ଦାବି କରିଛନ୍ତି ।

ବିଜେଡିର ପାୱାରଫୁଲ୍ ବିଧାୟକ ପ୍ରଫୁଲ୍ଲ ସାମଲ ଓ ତାଙ୍କ ପୁଅ ଲୁଲୁ ସାମଲଙ୍କ କେଳେଙ୍କାରୀର ଫର୍ଦ୍ଦ ଖୁବ୍ ଲମ୍ବା । ପୁଅ ପ୍ରୟାସକାନ୍ତିଙ୍କ ନାଁରେ କଲେଜ ଟଙ୍କାରେ ଦାମୀ କାର କିଣା ହୋଇଥିବା ଅଭିଯୋଗ ରହିଛି । ସେହପରି ଜମି କେଳେଙ୍କାରୀରରେ ବି ଅଭିଯୁକ୍ତ ସାମଲ ବାପପୁଅ । ବୁଧବାର ଦୀର୍ଘ ୧୫ ଘଣ୍ଟା ପରେ ପ୍ରଫୁଲ୍ଲଙ୍କ ଭଦ୍ରକ ନୂଆବଜାର ବାସଭବନରୁ ବାହାରିଥିଲେ ଇଡ଼ି ଅଧିକାରୀ । କଲେଜ ବିଷୟରେ ପଚରା ଉଚରା କରିଥିଲେ । ଚଢ଼ାଉ ପରେ ପ୍ରଫୁଲ୍ଲ କହିଲେ ରାଜନୈତିକ ଶତ୍ରୁତା ରଖି ନିର୍ବାଚନରେ ହରାଇବା ପାଇଁ ତାଙ୍କ ବିରୋଧରେ କରାଯାଇଛି ଷଡ଼ଯନ୍ତ୍ର ।

ଅଧିକ ପଢନ୍ତୁ ଓଡ଼ିଶା ଖବର

ପୂର୍ବରୁ ବରପଦା ଇଞ୍ଜିନିୟରିଂ କଲେଜ କେଳେଙ୍କାରୀରେ ସାମଲ ବାପପୁଅଙ୍କର ସଂପୃକ୍ତି ନେଇ ପ୍ରମାଣ ସହ ଖବର ପ୍ରସାରଣ କରିଥିଲା ଅର୍ଗସ ନ୍ୟୁଜ୍ । ପୁତ୍ର ମୋହରେ ଅନ୍ଧ ଧ୍ରୁତରାଷ୍ଟ୍ର ସାଜି ବିଧାୟକ ପ୍ରଫୁଲ୍ଲ ସାମଲ ପୁଅର ଦୁର୍ନୀତିକୁ ପ୍ରଶ୍ରୟ ଦେଇଥିବା ଅଭିଯୋଗ ହୋଇଥିଲା । କଲେଜକୁ ନିଜ କବଜାରେ ରଖିବା ପାଇଁ ବାଇ ଲ ବଦଳାଇଥିବା ନେଇ ଆସିଥିଲା ସାଂଘାତିକ ଅଭିଯୋଗ । ଆଉ ବାପପୁଅଙ୍କର ଏହି କେଳେଙ୍କାରୀକୁ ମିଳିଥିଲା ବିଜେଡି ସରକାରଙ୍କ ସୁରକ୍ଷା । ଯାହାର ଏବେ ପ୍ରମାଣ ଯୋଗାଡ଼ କରୁଛି ପ୍ରବର୍ତ୍ତନ ନିର୍ଦ୍ଦେଶାଳୟ ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV