ଶିଖରଚଣ୍ଡୀ ସଫଳ ହେଲା ଅପରେସନ୍‌ ଗଜରାଜ । ୬ ଦିନ ପରେ ଭରତପୁର ଜଙ୍ଗଲକୁ ଫେରିଲେ ହାତୀ । ହାତୀଙ୍କୁ ଘଉଡ଼ାଇବାକୁ ବନ ବିଭାଗ ନାକେଦମ୍ । ଆଉ ହାତୀ ଭରତପୁର ଜଙ୍ଗଲକୁ ଫେରିଯିବା ପରେ ପୁଣି ଥରେ ଆଜିଠୁ ପର୍ଯ୍ୟଟକଙ୍କ ପାଇଁ ଖୋଲିଲା ଶିଖରଚଣ୍ଡୀ ।

ଛଅ ଦିନ ପରେ ଶିଖରଚଣ୍ଡୀ ପାହାଡ଼ରୁ ଜଙ୍ଗଲକୁ ଫେରିଛନ୍ତି ଦୁଇ ଦନ୍ତା ହାତୀ । ହାତୀ ଘଉଡାଇବା ପାଇଁ ରବିବାର ନାଇଟ୍‌ ଅପରେସନ ଚଳାଇଥିଲା ବନ ବିଭାଗ । ଆଉ ଏହି ଅପରେସନ୍‌ରେ ବନ ବିଭାଗକୁ ମିଳିଛି ସଫଳତା । ପଥରଗାଡ଼ିଆ, ଶ୍ରୀବିହାର, ଗଣେଶ ବିହାର ଦେଇ ଆଜି ଭୋରରୁ ଦୁଇ ଦନ୍ତା ହାତୀ ଭରତପୁର ଜଙ୍ଗଲକୁ ଫେରିଛନ୍ତି । ତେବେ ଫେରିବା ସମୟରେ ହାତୀ ଦୁଇଟି ସ୍ଥାନୀୟ ଅଞ୍ଚଳରେ ଆତଙ୍କ ରଚିଥିଲେ । ଗଛ ଭାଙ୍ଗିବା ସହ ନିର୍ମାଣଧୀନ ଘରର ପାଚେରୀ ଭାଙ୍ଗିଥିଲେ ଏବଂ କଲୋନୀ ରାସ୍ତାରେ ଚାଲି ଚାଲି ଜଙ୍ଗଲମୁହାଁ ହୋଇଥିଲେ ହାତୀ ।

ଅଧିକ ପଢ଼ନ୍ତୁ: ନେତାଙ୍କ କଳିରେ ପଡ଼ୁନି ଯବନିକା, ଜଣେ ଜଣଙ୍କ ଗୋହି ଖୋଳିବାରେ ବ୍ୟସ୍ତ !

ସେପଟେ ହାତୀ ଭୟରେ ଦୁଇ ଦିନ ହେଲା ବନ୍ଦ ଥିଲା ଶିଖରଚଣ୍ଡୀ । ପର୍ଯ୍ୟଟକଙ୍କ ପ୍ରବେଶ ଉପରେ ବାରଣ ଲଗାଯାଇଥିଲା । ଆଗକୁ ଇଂରାଜୀ ନୂଆ ବର୍ଷ ଥିବାରୁ ବହୁ ସଂଖ୍ୟାରେ ପର୍ଯ୍ୟଟକ ଭୋଜି କରିବା ପାଇଁ ଶିଖରଚଣ୍ଡୀ ଆସିଥାନ୍ତି । କିନ୍ତୁ ହାତୀ ପାଇଁ ସମସ୍ତ ପର୍ଯ୍ୟଟକଙ୍କୁ ଶିଖରଚଣ୍ଡୀ ଯିବାକୁ ବାରଣ କରାଯାଇଥିଲା । ଅନିର୍ଦ୍ଦିଷ୍ଟ କାଳ ପାଇଁ ଗେଟ୍‌ରେ ତାଲା ପକାଇ ଦିଆଯାଇଥିଲା । ଦୁଇ ଦନ୍ତା ହାତୀ ଶିଖରଚଣ୍ଡୀ ପାହାଡ଼ରେ ବୁଲୁଥିବାରୁ ଏଭଳି ନିଷ୍ପତ୍ତି ନେଇଥିଲା ପ୍ରଶାସନ । ଶିଖରଚଣ୍ଡୀ ପାହାଡ଼ ପାଦ ଦେଶରେ ଥିବା ମୁଖ୍ୟ ଗେଟକୁ ସମ୍ପୂର୍ଣ୍ଣ ବନ୍ଦ କରି ଦିଆଯାଇଥିଲା । ତେବେ ହାତୀ ଫେରିଯିବା ପରେ ପୁଣି ଚଳଚଞ୍ଚଳ ହୋଇଛି ଶିଖରଚଣ୍ଡୀ ପାହାଡ଼ । ଜମିଛି ଭୋଜିର ଆସର । ପର୍ଯ୍ୟଟନ ଋତୁ ସହ ନୂଆବର୍ଷ ପାଇଁ ଏବେ ଶିଖରଚଣ୍ଡୀରେ ଲୋକଙ୍କ ଭିଡ଼ ଜମୁଛି ।

ଅଧିକ ପଢ଼ନ୍ତୁ: ଜିରୋ ନାଇଟ୍ ପାଇଁ ପୋଲିସର କଟକଣା; ରାତି ୧୨ ପରେ ବାଜିବନି ମ୍ୟୁଜିକ୍

ସୂଚନା ଅନୁସାରେ, ଗତ ୬ ଦିନ ତଳେ ଭରତପୁର ଜଙ୍ଗଲରୁ ଖାଦ୍ୟ ଅନେଶ୍ୱଣରେ ଶିଖରଚଣ୍ଡୀ ଆସିଥିଲେ ଦୁଇ ଦନ୍ତା ହାତୀ । କିନ୍ତୁ ଶିଖରଚଣ୍ଡୀ ଆସିବା ପରେ ଆଉ ଯିବାକୁ ନା ଧରି ନଥିଲେ ଦୁଇ ଦନ୍ତା । ଯାହାଫଳରେ ଲୋକଙ୍କ ସୁରକ୍ଷା ଦୃଷ୍ଟିରୁ ୨ ଦିନ ଶିଖରଚଣ୍ଡୀ ବନ୍ଦ ଥିଲା ।