ଆଦର୍ଶ ଆଚରଣ ବିଧି ଲାଗୁ ହେବାର ୪୮ଘଣ୍ଟା ପରେ ବି ହଟୁନି ପୋଷ୍ଟର

ଅର୍ଗସ ବ୍ୟୁରୋ : ନିର୍ବାଚନ ତାରିଖ ଘୋଷଣା ହେବା ସହ ସାରା ଦେଶରେ ଲାଗୁ ହୋଇସାରିଛି ଆଦର୍ଶ ଆଚରଣ ବିଧି । ବିଭିନ୍ନ ସ୍ଥାନରୁ ହଟାଯାଉଛି ସରକାରଙ୍କ ପକ୍ଷରୁ ଲଗାଯାଇଥିବା ପୋଷ୍ଟର, ବ୍ୟାନର ଏବଂ ହୋର୍ଡିଂ । ଏହାରି ଭିତରେ ମୁଖ୍ୟ ନିର୍ବାଚନ କମିଶନଙ୍କ ଆଦେଶକୁ ୪୮ଘଣ୍ଟା ପୂରଣ ହେବାକୁ ବସିଥିବା ବେଳେ ରାଜଧାନୀ ଭୁବନେଶ୍ବରର ବିଭିନ୍ନ ସରକାରୀ ଅଫିସ ଏବଂ ରାସ୍ତା ଘାଟରେ ସରକାରଙ୍କ ପୋଷ୍ଟର, ବ୍ୟାନର ହୋର୍ଡିଂ ଇତ୍ୟାଦି ହଟାଯାଇ ନଥିବା ଦେଖିବାକୁ ମିଳିଛି । 

ବିଏମସି ପକ୍ଷରୁ ଏନଫୋର୍ସମେଣ୍ଟ ଟିମକୁ ଏସବୁ ହଟାଇବାକୁ ଦାୟିତ୍ଵ ଦିଆଯାଇଛି । ଅଳ୍ପ କେତେକ ସ୍ଥାନରେ ପୋଷ୍ଟର, ବ୍ୟାନର କଢାଯିବା ସହ ହୋର୍ଡିଂ ଉପରେ କପଡା ଘୋଡ଼ା ଚାଲିଛି । ସମ୍ପୂର୍ଣ୍ଣ ରାଜଧାନୀରୁ ଏସବୁ ହଟାଇବାକୁ କାହିଁକି ଏତେ ବିଳମ୍ବ ହେଉଛି ବୋଲି ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି । ସେପଟେ ଏହି ପ୍ରସଙ୍ଗରେ ବିଏମସି ସମେତ ରାଜ୍ୟ ସରକାରଙ୍କୁ ଘେରିଛନ୍ତି ବିରୋଧୀ । 

ଅଧିକ ପଢନ୍ତୁ ଓଡ଼ିଶା ଖବର

ସରକାରଙ୍କ ଦ୍ୱାରା ଲଗାଯାଇଥିବା ହୋର୍ଡିଂରେ କପଡା ଘୋଡାଇବା ଛାଡି ଏହାକୁ ସମ୍ପୂର୍ଣ୍ଣ କାଢ଼ିବାକୁ କଂଗ୍ରେସ ଓ ବିଜେପି ପକ୍ଷରୁ ଦାବି କରାଯାଇଛି । ମୁଖ୍ୟ ନିର୍ବାଚନ କମିଶନଙ୍କ ଆଦେଶକୁ ଅନୁପାଳନରେ ବିଳମ୍ବ କରିବା ବେଆଇନ ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି । ସେପଟେ ଏନେଇ ପ୍ରତିକ୍ରିୟା ରଖିଛି ବିଜେଡି । ବିଏମ୍ସି ପକ୍ଷରୁ ଏନଫୋର୍ସମେଣ୍ଟ ଟିମ ଲଗାଇ ହୋଡିଂ ଲୁଚେଇବା କାମ ଚାଲୁଥିବା ବେଳେ  ୟାରି ଭିତରେ ଗୋଟିଏ ଦିନରୁ ଉର୍ଦ୍ଧ୍ବ ସମୟ ବିତି ସାରିଛି କିନ୍ତୁ ଏବେବି ସାରି ପାରୁନି ହୋଡିଂ ଉଠିବା କାର୍ଯ୍ୟକ୍ରମ ।