ଅର୍ଗସ ବ୍ୟୁରୋ : ଜଣେ ଦିବ୍ୟାଙ୍ଗ ହିଁ ଜାଣେ ଦିବ୍ୟାଙ୍ଗର କଷ୍ଟ । କିନ୍ତୁ ବାସ୍ତବରେ ଆଜିର ଦିନରେ ଜଣେ ଜଣକୁ ସାହାଯ୍ୟ କରିବାକୁ ଦେଉଛନ୍ତି ପଛ ଘୁଞ୍ଚା । କିନ୍ତୁ ଆଜି ବି ବଞ୍ଚି ରହିଛି ମାନବିକତା । ଏପରି ସେହି ପରି ଦୃଶ୍ୟ ଦେଖିବାକୁ ମିଳିଛି ବୋରିଗୁମ୍ମା ଅଞ୍ଚଳରେ । ନିଜେ ଦିବ୍ୟାଙ୍ଗ ହୋଇ ଅନ୍ୟ ଦିବ୍ୟାଙ୍ଗଙ୍କୁ ସେବା ଯୋଗାଇ ଆସୁଛନ୍ତି । ସତରେ ଦିବ୍ୟାଙ୍ଗଙ୍କ ପାଇଁ ଦେବଦୂତ ପାଲଟିଛନ୍ତି ସେ ।

ଅଧିକ ପଢନ୍ତୁ ଓଡ଼ିଶା ଖବର

ରାଜ୍ୟ ସରକାର ଅସହାୟ ଦିବ୍ୟାଙ୍ଗଙ୍କ ପାଇଁ କାହିଁ କେତେ ଯୋଜନା ତିଆରି କରିଛନ୍ତି । କିନ୍ତୁ ଅଶିକ୍ଷିତ ଆଦିବାସୀ ଗରିବ ଦିବ୍ୟାଙ୍ଗ ସରକାରୀ ଯୋଜନା ପର୍ଯ୍ୟନ୍ତ ପହଞ୍ଚି ପାରୁନାହିଁ । ଗରିବ ଦିବ୍ୟାଙ୍ଗ କିଭଳି ସରକାରୀ ସୁବିଧା ସୁଯୋଗ ପାଇ ପାରିବେ ସେଥିପାଇଁ ବୋରିଗୁମ୍ମା ଅଞ୍ଚଳର ଦିବ୍ୟାଙ୍ଗ ବିଜୟ ରାଉତ ଦିବ୍ୟାଙ୍ଗଙ୍କ ମାଧ୍ୟମ ପାଲଟିଛନ୍ତି । ବିଜୟ ରାଉତ ସକାଳୁ ଉଠି ଖୋଜି ବୁଲନ୍ତି କେଉଁ ଗାଁରେ ଦିବ୍ୟାଙ୍ଗ ଅଛନ୍ତି । ପରିଚୟ ପତ୍ର, ଆଧାର କାର୍ଡ, ଭିନ୍ନକ୍ଷମ ଭତ୍ତା, ଦିବ୍ୟାଙ୍ଗଙ୍କୁ କୁତ୍ରିମ ଅଙ୍ଗ ଟ୍ରାଇ ସାଇକେଲ ମିଳିଛି କି ନାହିଁ । ଯଦି ମିଳିନାହିଁ ସଙ୍ଗେ ସଙ୍ଗେ ଦିବ୍ୟାଙ୍ଗଙ୍କୁ ନେଇ ଆଧାର କାର୍ଡ କରାଇ ଭିନ୍ନକ୍ଷମ ପରିଚୟ ପତ୍ର ପାଇଁ ଆବେଦନ କରିଥାନ୍ତି ।

ଯେଉଁ ଦିବ୍ୟାଙ୍ଗଙ୍କ ଅସୁବିଧା ହୁଏ ସେମାନେ ବିଜୟଙ୍କୁ କଲ କରି ସମସ୍ୟା ସମ୍ପର୍କରେ ଅବଗତ କରନ୍ତି । ଯେଉଁ ଦିବ୍ୟାଙ୍ଗ ମାନେ ସରକାରୀ ସୁବିଧା ସୁଯୋଗ ପାଇ ପାରୁ ନଥିଲେ ସେମାନେ ବିଜୟ ଯୋଗୁଁ ସୁବିଧା ପାଇ ପାରିଛନ୍ତି । ଏବଂ ସେମାନଙ୍କ ମୁହଁରେ ହସ ଫୁଟି ପାରିଛି । ନିଜେ ବିଜୟ ଠିକ ସେ ଚାଲି ପାରନ୍ତି ନାହିଁ ତଥାପି ପ୍ରତିଦିନ ହାତରେ ଖଣ୍ଡିଏ ବ୍ୟାଗରେ ଲୋକଙ୍କ କାଗଜପତ୍ର ଧରି ବ୍ଲକ ଅଫିସ ଏବଂ ଆଧାର କାର୍ଡ ସେଣ୍ଟରରେ ପହଞ୍ଚି ଯାଆନ୍ତି । ଆଉ ଦିବ୍ୟାଙ୍ଗଙ୍କ କାଗଜପତ୍ର କାମରେ ଲାଗି ପଡ଼ନ୍ତି ।

ବିଜୟ ପେସାରେ ଜଣେ ଡ୍ରାଇଭର । ସେ ଗାଡି ଚଳେଇ ପରିବାର ପ୍ରତିପୋଷଣ କରୁଥିଲେ । ଦିନେ ଦୁର୍ଘଟଣା ପରେ ତାଙ୍କ ଡାହାଣ ଗୋଡ଼ରେ ଏବଂ ହାତରେ ଗଭୀର ଆଘାତ ଲାଗିଥିଲା ଫଳରେ ସେ ଦିବ୍ୟାଙ୍ଗ ପାଲଟି ଗଲେ । ସେ ଭିନ୍ନକ୍ଷମ ପରିଚୟ ପତ୍ର ପାଇବା ପାଇଁ ବହୁତ ସଂଘର୍ଷ କରି ପରିଚୟ ପତ୍ର ପାଇଥିଲେ । ସରକାର ପକ୍ଷରୁ ଭିନ୍ନକ୍ଷମ ଭତ୍ତା ଏବଂ ଚାଉଳ ମିଳୁଛି । କିନ୍ତୁ ଆଜି ପର୍ଯ୍ୟନ୍ତ ଆବାସ ଯୋଜନାରେ ସାମିଲ ହୋଇ ନାହାନ୍ତି । ଆଜିର ଦୁନିଆରେ ଜଣେ ଦିବ୍ୟାଙ୍ଗ ନିଜ ପାଇଁ ଚିନ୍ତା ନ କରି ଅନ୍ୟ ପାଇଁ ଚିନ୍ତା କରିବା ଏବଂ ସାହାଯ୍ୟର ହାତ ବଢେଇବା ସତରେ ଚର୍ଚ୍ଚାର ବିଷୟ ।

Argus News | argus news | -Argusnews Home: Odisha Latest News, Breaking News, Trending News, Live TV and more