Fake Diesel / କିରୋସିନରେ କେମିକାଲ ମିଶାଇ ତିଆରି ହେଉଛି ନକଲି ଡିଜେଲ

ସୋନପୁର: କିରୋସିନରେ କେମିକାଲ ମିଶାଇ ପ୍ରସ୍ତୁତ ହେଉଥିଲା ନକଲି ଡିଜେଲ । ସୋନପୁର ଖମ୍ବେଶ୍ୱରୀପାଲିରେ ପ୍ରଶାସନ ଚଢ଼ାଉ କରି ଏଭଳି ଏକ ନକଲି ଡିଜେଲ କାରଖାନା ଠାବ କରିଛି । ଚୂନ ଭଳି ଦିଶୁଥିବା କେମିକାଲକୁ କିରୋସିନରେ ମିଶାଇ ପ୍ରସ୍ତୁତ କରୁଥିଲେ ନକଲି ଡିଜେଲ୍ ।

କାରଖାନାରୁ ୮୯୦ ଲିଟର ବେଆଇନ କିରୋସିନ ଜବତ ହୋଇଛି । ତେବେ ଏତେ ପରିମାଣର କିରୋସିନ କେଉଁଠୁ ଆସିଲା ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଏହି ଘଟଣାରେ ପୋଲିସ ତନାଘନା ଚଳାଇଥିବା ବେଳେ ଏଯାଏଁ ନକଲି ଡିଜେଲର କଳା ଧନ୍ଦା ଚଳାଇଥିବା ମାଫିଆଙ୍କ ପାଖରେ ପହଞ୍ଚିପାରିନାହିଁ ।

ଏଥିସହ ପଢ଼ନ୍ତୁ: ରାଜ୍ୟରେ ନାହିଁ ତେଲ ସଂକଟ; ପେଟ୍ରୋଲିୟମ ସଂଘର ଦୃଢ଼ୋକ୍ତି 'କାଲି ସନ୍ଧ୍ୟା ସୁଦ୍ଧା ସୁଧୁରିବ ସ୍ଥିତି' 

କିରୋସିନରେ ମିଶୁଥିଲା କେମିକାଲ, ପ୍ରସ୍ତୁତ ହେଉଥିଲା ନକଲି ଡିଜେଲ । କିରୋସିନରେ ମିଶୁଥିଲା ଚୁନ ଗୁଣ୍ଡ ଓ କେମିକାଲ । ସୋନପୁର ଖମ୍ବେଶ୍ୱରୀପାଲିର ଏକ ପେଟ୍ରୋଲ ପମ୍ପ ନିକଟରେ ଥିବା ଏକ ଘର ସାଜିଥିଲା ନକଲି ଡିଜେଲ କାରଖାନା ।

ଧଳା ରଙ୍ଗର ଗଚ୍ଛିତ ଥିବା କେମିକାଲ କିରୋସିନରେ ମିଶାଇ ଡିଜେଲ ପ୍ରସ୍ତୁତ କରୁଥିଲେ ଦୁର୍ବୃତ୍ତ । ଏଇ ଘରେ ଚାଲିଥିଲା କିରୋସିନ ଓ ଡିଜେଲ କାରବାରର କଳା ଧନ୍ଦା । ତେବେ ଡୁପ୍ଲିକେଟ ଡିଜେଲ କାରଖାନାରେ କାମ କରୁଥିବା କର୍ମଚାରୀ ଏ ବାବଦରେ ଜାଣିନଥିବା କହୁଥିବା ବେଳେ ସ୍ଥାନୀୟ ଲୋକେ କିନ୍ତୁ ଦାବି କରିଛନ୍ତି କଡ଼ା ଆକ୍ସନ ।

ଡୁପ୍ଲିକେଟ ଡିଜେଲ କାରଖାନା ନେଇ ଖବର ମିଳିବା ମାତ୍ରେ ଅଚାନକ ଚଢ଼ାଉ କରିଥିଲା ପ୍ରଶାସନ । ଜିଲ୍ଲାପାଳଙ୍କ ନିର୍ଦ୍ଦେଶରେ ଉପଜିଲ୍ଲାପାଳ, ଯୋଗାଣ ବିଭାଗ, ଖଣି ବିଭାଗ, ପୋଲିସ ଉପସ୍ଥିତିରେ ଚଢାଉ କରିଥିଲେ । ଘଟଣା ସ୍ଥଳରୁ ମିଳିଥିଲା ୮୯୦ ଲିଟର କିରୋସିନ ।

କେବଳ କିରୋସିନ ନୁହେଁ ଏହି ଘର ସାଜିଥିଲା ବେଆଇନ ବାଲି ଚୋରା ଚାଲାଣର ପେଣ୍ଠସ୍ଥଳୀ । ଯୋଗାଣ ବିଭାଗ ସେଠାରୁ ଦୁଇଟି ହାଇୱାକୁ ଜବତ କରିଛି । ପୋଲିସ ଓ ପ୍ରଶାସନର ଟିମ ଘଟଣାର ପୁଙ୍ଖାନୁପୁଙ୍ଖ ତଦନ୍ତ ଜାରି ରଖିଛନ୍ତି ।

ତେବେ ଏହି କଳା କାରବାର ପଛରେ ଏକ ବଡ଼ ସିଣ୍ଡିକେଟ କାର୍ଯ୍ୟ କରୁଥିବା ପୋଲିସ ସନ୍ଦେହ କରୁଛି । ଏଯାଏଁ ଘଟଣାରେ କାହାକୁ ଗିରଫ କରାଯାଇନଥିବା ବେଳେ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ବୋଲି ଜିଲ୍ଲାପାଳ କହିଛନ୍ତି ।

ଏଥିସହ ପଢ଼ନ୍ତୁ: ତେଲ ସଙ୍କଟ ପାଇଁ ଲୋକେ ଏବେ EV ମୁହାଁ, EV ବୁକିଂ ୧୦ଗୁଣ ବୃଦ୍ଧି 

ତେଲ ସଂକଟର ଫାଇଦା ନେଇ ମାଫିଆ ଚଳାଇଥିଲେ ଡୁପ୍ଲିକେଟ ଡିଜେଲ କାରଖାନା । ତେବେ ଏହି କାରଖାନା କାହାର ? ସ୍ଥାନୀୟ ପେଟ୍ରୋଲ ପମ୍ପ ମାଲିକଙ୍କର ଏହି ଘଟଣାରେ କଣ ସମ୍ପୃକ୍ତି ରହିଛି ?

ଏତେ ପରିମାଣ କିରୋସିନ ମାଫିଆ ମାନେ ଆଣିଲେ କେଉଁଠୁ ? ଡୁପ୍ଲିକେଟ ଡିଜେଲ ପ୍ରସ୍ତୁତ ପରେ କୁଆଡ଼େ ଯାଉଥିଲା ? କେବେ ଧରାପଡ଼ିବେ ଏହି ନକଲି ଡିଜେଲ କାରଖାନାର ଦୁର୍ବୃତ୍ତ ? ଏହାର ଜୋରଦାର ଖୋଳତାଡ଼ ଚଳାଇଛି ପ୍ରଶାସନ ।