Fake Paneer Racket / ଅଧା ହୋଇଯାଇଛି ପନିର ବିକ୍ରି; ଦଲାଲଙ୍କ ପାଇଁ ସଜା ଭୋଗୁଛନ୍ତି ଗୋପାଳ ପରିବାର

ଭୁବନେଶ୍ଵର ଉପକଣ୍ଠ ବାଲିଅନ୍ତାର କଣ୍ଟାଗୋଠ ଗାଁ । ଏଠାରେ ରୁହନ୍ତି ପ୍ରାୟ ୬୦ ଗୋପାଳ ପରିବାର । ଗାଁର ସମସ୍ତେ ଗାଈ ରଖିଛନ୍ତି । ଛେନା, ପନିର ବିକ୍ରି ପରିବାର ଚଳାନ୍ତି । ହେଲେ ଭେଜାଲ ପନିର ସନ୍ଦେହରେ ଏବେ ବିଭିନ୍ନ ସ୍ଥାନରେ ଧରପଗଡ ପରେ ଚିନ୍ତାରେ ଏହି ଗାଁର ଗୋପାଳ ପରିବାର । ଅଧା ହୋଇଯାଇଛି ପନିର ବିକ୍ରି । ସବୁ ଦିନ ପନିର ନେଉଥିବା ଛୋଟ ଦୋକାନୀ ବି ଆଉ ଏମାନଙ୍କ ଠାରୁ ପନିର ନେଉନାହାନ୍ତି । ଗାଁର ଉର୍ମିଳାଙ୍କ ଗ୍ୟାସ ଚୁଲାରେ ୨୦ ଲିଟର ବଦଳରେ ବସିଛି ୧୦ ଲିଟର କ୍ଷୀର । ପୂର୍ବରୁ ୪-୫ କେଜି ପନିର କରୁଥିଲେ ଏବେ ୨ କେଜିକୁ ପନିର ତିଆରି ଖସିଆସିଛି ।

• ଭାଲିଆଦଣ୍ଡା ଗାଁରେ ବି ସମାନ ସ୍ଥିତି

ବାଲିପାଟଣା ଭାଲିଆଦଣ୍ଡା ଗାଁରେ ମଧ୍ୟ ୬୦ ପରିବାରର ସମାନ ଦଶା । ଗାଁରେ କିଛି ବଡ଼ ପନିର ଓ ଛେନା ବ୍ୟବସାୟୀ ଅଛନ୍ତି । ଗାଁର ପ୍ରମୋଦ ବେହେରା ଦୁଗ୍ଧ ଚାଷୀଙ୍କ ପାଖରୁ କ୍ଷୀର ସଂଗ୍ରହ କରି ଦିନକୁ ପ୍ରାୟ ୫୦ କେଜି ଛେନା ପ୍ରସ୍ତୁତ କରନ୍ତି । ଏବେ ତାଙ୍କର ବ୍ୟବସାୟ ଅଧା ହୋଇଯାଇଛି । ଏହି ଗାଁର ଆଉ ଜଣେ ବ୍ୟବସାୟୀ ଫଗୁ ବେହେରା ବି ପ୍ରତିଦିନ ଗୋଟିଏ କ୍ୱିଣ୍ଟାଲ ପନିର କଟକ ପଠାନ୍ତି । ଧରପଗଡରେ ତାଙ୍କ ପନିର ବି ଯାଞ୍ଚ ହୋଇଥିଲା । ନିଜେ ପ୍ରସ୍ତୁତ କରୁଥିବା ପନିର କେତେ ଶୁଦ୍ଧ ଦେଖାଇବାକୁ କ୍ୟାମେରା ସାମନାରେ ଗାଁ ଦାଣ୍ଡରେ କରିଥିଲେ ପରୀକ୍ଷା ।

• ଛୋଟ ଦୁଗ୍ଧ ଚାଷୀ ପ୍ରଭାବିତ

ରାଜ୍ୟରେ ପ୍ରାୟ ୧୫ ଲକ୍ଷ ଦୁଗ୍ଧ ଚାଷୀ ଅଛନ୍ତି । ବିଭିନ୍ନ ସ୍ଥାନରେ ପନିର ଓ ମିଠା ଦୋକାନ ଉପରେ ଚଢାଉ ପରେ ବିଶେଷ କରି ଛୋଟ ଦୁଗ୍ଧ ଚାଷୀ ଏବେ ବେଶୀ ପ୍ରଭାବିତ ହୋଇଛନ୍ତି । ଅଲ୍ ଓଡିଶା ଗୋପାଳ ସମାଜ ଏ ଚଢାଉକୁ ସ୍ୱାଗତ କରିଛି । ତେବେ ଅସଲି ଦୁଗ୍ଧ ଚାଷୀ ଭେଜାଲ କରୁ ନାହାଁନ୍ତି ବରଂ କିଛି ଦଲାଲ ଓ ବଡ ପାଉଡର ବ୍ୟବସାୟୀ ଏକଥା କରୁଛନ୍ତି ବୋଲି କହିଛି ଗୋପାଳ ସମାଜ ।

ପଢନ୍ତୁ ଏହି ଖବର: ଭୁବନେଶ୍ଵରରୁ କଟକ ଓ ବ୍ରହ୍ମପୁର ସଵୁଠି ଭେଜାଲ୍ ପନିର; ଖାଇବା ଥାଳିରେ ପରସା ଯାଉଛି କି ବିଷ ?

କିଛି ଅସାଧୁ ବ୍ୟବସାୟୀ କ୍ଷୀରରୁ ନୁହେଁ, ବିଷରୁ ପ୍ରସ୍ତୁତ କରୁଛନ୍ତି ପନିର । ଅସଲି କ୍ଷୀର ବଦଳରେ ମଇଦା, ପାରସ ପାଉଡର ଓ ରାସାୟନିକ ପଦାର୍ଥରେ ପ୍ରସ୍ତୁତ ହେଉଥିବା ପନିର କିଛି ସ୍ଥାନରେ ଧରା ପଡ଼ିଲାଣି । ରାଜ୍ୟର ପ୍ରମୁଖ ସହରଗୁଡ଼ିକରେ ଦୈନିକ ୮୦ରୁ ୧୦୦ ମେଟ୍ରିକ୍ ଟନ୍ ପନିରର ଚାହିଦା ରହିଥିବା ବେଳେ ଉତ୍ପାଦନ କମ୍ ଥିବାରୁ କୋଲକାତା ସମେତ ଅନ୍ୟ ସ୍ଥାନରୁ ବି ଆସୁଛି ପନିର । ନିଅଣ୍ଟିଆ ସ୍ଥିତିର ସୁଯୋଗ ନେଇ ପନିରର ନକଲି ନେଟୱାର୍କ ଏବେ ସହର ବଜାର ଗଳିକନ୍ଦିରେ ମୁଣ୍ଡ ଟେକିଳଣି ।