ଘୁ.ଉଦୟଗିରି (କନ୍ଧମାଳ): ନିଶା ସଂସାର ଉଜାଡ଼ି ଦିଏ, ମଥାରୁ ସିନ୍ଦୂର ପୋଛିଦିଏ, ସନ୍ତାନ ସନ୍ତତିଙ୍କୁ ଅନାଥ କରିଦିଏ । ଆଉ ଥରେ ଯିଏ ନିଶା ମାୟାରେ ପଡ଼େ, ସିଏ ମଲା ପର୍ଯ୍ୟନ୍ତ ଛାଡ଼ି ପାରେନି । ଆଉ ଶେଷରେ ଜୀବନ ଚାଲିଯାଏ ।

ଏହାର ଉଦାହରଣ ଦେଖିବାକୁ ମିଳିଛି କନ୍ଧମାଳ ଜିଲ୍ଲାର ଦାରିଙ୍ଗବାଡ଼ି ଥାନା ଅଞ୍ଚଳରେ । ଯେଉଁଠି ବାପା, ପୁଅକୁ ଆକଟ କରିବା କଥା ସେଠି ତା'ର ଓଲଟା ଘଟିଛି । ମଦ ପିଇବାକୁ ପୁଅର ବାରଣ ପରେ କୀଟନାଶକ ପିଇ ଦେବାରୁ ବୃଦ୍ଧ ବାପାର ମୃତ୍ୟୁ ହୋଇଛି ।

ଏଥିସହ ପଢ଼ନ୍ତୁ: ଶିକାରୀଙ୍କ ଫାଶରେ ପଡ଼ି ଛଟପଟ ହୋଇ ମଲା କଲରାପତରିଆ ବାଘ 

ଦାରିଙ୍ଗବାଡ଼ି ଥାନା ଅନ୍ତର୍ଗତ ବାଡ଼ାବାଙ୍ଗା ପଞ୍ଚାୟତ ବାଲୁବାଙ୍ଗା ଗାଁରେ ୬୨ ବସୀତାରାମ ନାୟକଙ୍କ ମୃତ୍ୟୁ ହୋଇଛି । ସୂଚନା ଅନୁସାରେ, ବାଲୁବାଙ୍ଗା ଗାଁର ବସୀତାରାମ ସବୁଦିନ ଭଳି ସବୁଦିନ ଭଳି ମଦ୍ୟପାନ କରି ଘରକୁ ରାତିରେ ଫେରିଥିଲେ ।

ବାପା ନିଶାସକ୍ତ ଅବସ୍ଥାରେ ଘରକୁ ଫେରିବା ଦେଖି ପୁଅ ମୁରଲୀ ନାୟକ ବିରୋଧ କରିଥିଲେ । ବାପା ମଦ ପିଇବାକୁ ପୁଅ ବାରଣ କରିଥିଲା । ଆଉ ପୁଅର ବିରୋଧକୁ ନେଇ ଉତ୍‌କ୍ଷିପ୍ତ ହୋଇ ପଡ଼ିଥିଲେ ବସୀତାରାମ । ପୁଅର ଆକଟ ପରେ ନେଇ ଯାଇଥିଲେ ଚରମ ନିଷ୍ପତ୍ତି ।

ଏଥିସହ ପଢ଼ନ୍ତୁ: ଭୁଜାଲି ମାଡ଼ର ଜବାବ ଗୁଳି; ପୋଲିସ ଏନ୍‌କାଉଣ୍ଟରରେ ୨ ଦୁର୍ଦ୍ଦାନ୍ତ ଅପରାଧୀ ଆହତ 

ପିଇଦେଲେ କୀଟନାଶକ

କୋବି ଚାଷ ପାଇଁ ଘରେ ରଖା ଯାଇଥିବା କୀଟନାଶକ ପିଇ ଦେଇଥିଲେ ବସୀତାରାମ । ପରିବାର ଲୋକେ ବସୀତାରାମ କୀଟନାଶକ ପିଇ ଦେଇଥିବା ଜାଣିବା ପରେ ସଙ୍ଗେ ସଙ୍ଗେ ଦାରିଙ୍ଗବାଡ଼ି ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ ।

ଅବସ୍ଥା ଆହୁରି ବିଗିଡ଼ିବାରୁ ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା । ଜିଲ୍ଲା ଚିକିତ୍ସାଳୟ ନେବା ବାଟରେ ହିଁ ବସୀତାରାମଙ୍କ ମୃତ୍ୟୁ ହୋଇଛି । ଖବର ପାଇ ଦାରିଙ୍ଗବାଡ଼ି ଥାନା ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ପୋଲିସ ଏକ ଅପମୃତ୍ୟୁ ମାମଲା ରୁଜୁ କରିଥିବା ସୂଚନା ଦେଇଛନ୍ତି ଦାରିଙ୍ଗବାଡ଼ି ଥାନା ଅଧିକାରୀ ।