Pahala Sweet Shop Raid / ଟ୍ବିନ ସିଟିରେ ମାତିଛନ୍ତି ଫୁଡ୍ ମାଫିଆ, ମିଠା ନାଁରେ ବିକ୍ରି ହେଉଛି ମିଠା ଜହର

ରାକ୍ଷୀ ପୂର୍ଣ୍ଣିମା ପୂର୍ବରୁ ଅପମିଶ୍ରଣ ପାଇଁ ଯାଞ୍ଚକୁ ଜୋରଦାର କରିଛି ସ୍ୱାସ୍ଥ୍ୟ ବିଭାଗ । ଫୁଡ୍ ସେଫ୍ଟି ଅନ୍ ହୁଇଲ୍ସ ଭ୍ୟାନ୍ ଜରିଆରେ ମଧ୍ୟ ପାହାଳ ଅଞ୍ଚଳର ବିଭିନ୍ନ ମିଠା ଦୋକାନରେ ଅଚାନକ ଚଢ଼ାଉ ମାରିଥିଲା ଟିମ୍ । ପାହାଳରେ ବିକ୍ରି ହେଉଥିବା ଶତାଧିକ ମିଠା ଦୋକାନ ଉପରେ ବଡ଼ ରେଡ୍ ମାରିଛି ବିଭାଗ । ରେଡ୍ ପଡ଼ୁଥିବା ଦେଖି ବହୁତ୍ ମିଠା ଦୋକାନୀ ତାଲା ପକାଇ ଛୁ ମାରିଛନ୍ତି । ସେପଟେ ଆନାଲଗ ପନିର ଓ ଅସଲି ପନିରକୁ ନେଇ ଅର୍ଗସ ନ୍ୟୁଜରେ ବାରମ୍ବାର ଖବର ପ୍ରସାରଣ ପରେ ଏବେ ହଲଚଲ । ମିଠା ଦୋକାନୀ, ହୋଟେଲ ଓ ରେଷ୍ଟୁରାଣ୍ଟ ବ୍ୟବସାୟୀ ଏବେ ଚିନ୍ତାରେ । ଗ୍ରାହକଙ୍କୁ କିପରି ଶୁଦ୍ଧ ଜିନିଷ ଯୋଗାଇବେ, ସେନେଇ ଆରମ୍ଭ ହୋଇଛି ମନ୍ଥନ ।

ମଙ୍ଗଳବାର ଦିନ ୧୨ ଟା । ପ୍ରସିଦ୍ଧ ପାହାଳ ମିଠା ଦୋକାନ ଗୁଡ଼ିକରେ ରେଡ୍ ମାରିଥିଲା ଫୁଡ୍ ସେଫ୍ଟି ବିଭାଗ । ରାସ୍ତାର ଦୁଇ ପାର୍ଶ୍ୱରେ ଥିବା ମିଠା ଦୋକାନଗୁଡ଼ିକରେ ହୋଇଥିଲା ଚଢାଉ । 'ଫୁଡ୍ ସେଫ୍ଟି ଅନ୍ ହୁଇଲ୍ସ' ଭ୍ୟାନ୍ ସାଙ୍ଗରେ ଧରି ମିଠା, ଛେନା ଏବଂ ପନିରର ନମୁନା ସଂଗ୍ରହ କରିଥିଲା ଟିମ୍ । ତେବେ ଏହି ଅଚାନକ ଚଢାଉ ଯୋଗୁଁ ମିଠା ଦୋକାନୀଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହୋଇଥିଲା । ଏମିତିକି ଘଟଣାସ୍ଥଳରୁ ଅନେକ ଦୋକାନୀ ସଟର୍ ପକାଇ ଫେରାର୍ ହୋଇଯାଇଥିଲେ ।

ଅଧିକ ପଢ଼ନ୍ତୁ: ଗୋଇଠିରେ ଟେକି ହୋଇ ଦର୍ଶନ ଯନ୍ତ୍ରଣାରୁ ମିଳିବ ମୁକ୍ତି; ଧାଡ଼ି ଦର୍ଶନ ପାଇଁ ପାଇଲଟ୍ ମଡେଲ ପ୍ରସ୍ତୁତ

ଅର୍ଗସ ନ୍ୟୁଜର ବଡ଼ ପ୍ରଭାବ । ଆନାଲଗ ବା ନକଲି ପନିରର କାରବାରକୁ ନେଇ ଲଗାତାର ଖବର ପ୍ରସାରଣ ପରେ ଏବେ ଚେତିଛନ୍ତି ବ୍ୟବସାୟୀ । ବଜାରରେ ବିକ୍ରି ହେଉଥିବା ଆନାଲଗ ପନିରରେ ଦୁଧ ଚର୍ବି ବଦଳରେ ବନସ୍ପତି ତେଲ, ଷ୍ଟାର୍ଚ ଓ କେମିକାଲ ବ୍ୟବହାର ହେଉଥିବାରୁ ଏହା ସ୍ୱାସ୍ଥ୍ୟ ପାଇଁ ଅତ୍ୟନ୍ତ କ୍ଷତିକାରକ । ଏହି ଖବର ସାମ୍ନାକୁ ଆସିବା ପରେ ସାଧାରଣ ଗ୍ରାହକଙ୍କ ସହ ହୋଟେଲ, ରେଷ୍ଟୁରାଣ୍ଟ ଓ ମିଠା ବ୍ୟବସାୟୀଙ୍କ ମଧ୍ୟରେ ଆଶଙ୍କା ବୃଦ୍ଧି ପାଇଛି। ଆନାଲଗ ବିକ୍ରି କରୁଥିଲେ FSSAIର ନିୟମ ମୁତାବକ ସେଥିରେ ଲେବଲିଂ ଲଗେଇବା ବାଧ୍ୟତାମୂଳକ ।

କଟକ, ଭୁବନେଶ୍ବର ସହ ରାଜ୍ୟର ବିଭିନ୍ନ ସହରରେ ସବୁଠି ନକଲି ପନୀର । ଅଧିକ ଲାଭର ଲୋଭରେ ଭେଜାଲ୍ କରୁଛନ୍ତି ଅସାଧୁ ବ୍ୟବସାୟୀ । ଚଢାଉ ସମୟରେ ଧରାପଡୁଛି କ୍ୟୁଣ୍ଟାଲ୍ କ୍ୟୁଣ୍ଟାଲ୍ ପନିର । ପ୍ରଶ୍ନ ଉଠୁଛି ବର୍ଷ ବର୍ଷ ଧରି ଖାଇବା ନାଁରେ ପରସା ଯାଉଛି କି ବିଷ ?