Puri Queue Darshan / ଗୋଇଠିରେ ଟେକି ହୋଇ ଦର୍ଶନ ଯନ୍ତ୍ରଣାରୁ ମିଳିବ ମୁକ୍ତି; ଧାଡ଼ି ଦର୍ଶନ ପାଇଁ ପାଇଲଟ୍ ମଡେଲ ପ୍ରସ୍ତୁତ

ପୁରୀ: ନାଟମଣ୍ଡପରେ ବାହାର କାଠ ଦର୍ଶନ ସମୟରେ କାଳିଆକୁ ଦେଖିବାକୁ ଚାଲେ କସରତ । କିଏ ଟିପରେ ତ ପୁଣି କିଏ ଗୋଇଠିରେ ଟେକି ହୋଇ ଚକାଆଖିରେ ଆଖି ମିଶାଇବାକୁ ଆତୁର ହୁଏ । କିଏ ମନ ପୂରେଇ ଦେଖିବାକୁ ଚାହିଁଲା ବେଳକୁ ଗହଳି ଭିତରେ ସୁଯୋଗ ମିଳିପାରୁନି । ପୁଣି ବରିଷ୍ଠ ନାଗରିକ, ମହିଳାମାନଙ୍କ ପାଇଁ ଦର୍ଶନ କେବେ କେବେ ଗହଳିରେ ଯନ୍ତ୍ରଣାଦାୟୀ ହେଉଛି । ବାହାରେ ବ୍ୟାରିକେଡ଼ ଦେଇ ଧାଡ଼ିରେ ଯିବାବେଳେ ଏମିତି ହୁଏନାହିଁ । ହେଲେ ସାତପାହାଚଠାରୁ ଏକାସାଙ୍ଗରେ ଦର୍ଶନ ପାଇଁ ଯିବାବେଳେ ବିଶେଷକରି ବାହାର କାଠ ଦର୍ଶନ ସମୟରେ ଅସୁବିଧା ଭୋଗୁଛନ୍ତି ଭକ୍ତ ।

ତେଣୁ ଭିତରେ ଦର୍ଶନ ସୁବିଧା ପାଇଁ ସରକାର ନେଉଛନ୍ତି ନୂଆ ପଦକ୍ଷେପ । ଭିତରେ ସହଜ ଦର୍ଶନ ପାଇଁ ୫ ଥାକିଆ ରାମ୍ପ ହେବ । ଆଉ ଧାଡ଼ିରେ ଯାଇ ଘଣ୍ଟାକ ମଧ୍ୟରେ ଦର୍ଶନ କରିବେ ୮ରୁ ୧୦ ହଜାର ଶ୍ରଦ୍ଧାଳୁ । ଯାହାକୁ ସବୁ ମହଲରୁ ସ୍ୱାଗତ କରାଯାଇଛି । କିନ୍ତୁ ଏହାକୁ ପ୍ରଥମେ ପରୀକ୍ଷାମୂଳକ କରାଯାଇ ବ୍ୟବସ୍ଥା କରିବାକୁ ଦାବି କରିଛନ୍ତି ବରିଷ୍ଠ ସେବାୟତ ବିନାୟକ ଦାସ ମହାପାତ୍ର । ନଚେତ୍ ଏଥିରେ ତ୍ରୁଟି ହୋଇପାରେ ବୋଲି ସେ କହିଛନ୍ତି । ସେପଟେ ନିଷ୍ପତ୍ତିକୁ ସବୁ ମହଲରୁ ସ୍ୱାଗତ କରାଯାଇଛି ।

• ଶୃଙ୍ଖଳିତ ଧାଡ଼ି ଦର୍ଶନ ପାଇଁ ବିଶେଷ ବ୍ୟବସ୍ଥା

ସେପଟେ ଶ୍ରୀମନ୍ଦିର ଧାଡ଼ି ଦର୍ଶନ ପାଇଁ ଆଇନ ମନ୍ତ୍ରୀଙ୍କ ଅଧ୍ୟକ୍ଷତାରେ ଲୋକସେବା ଭବନରେ ଅନୁଷ୍ଠିତ ଉଚ୍ଚସ୍ତରୀୟ ବୈଠକରେ ଆଇଆଇଟି ଭୁବନେଶ୍ୱର ପ୍ରସ୍ତୁତ କରିଛି ପାଇଲଟ ମଡେଲ । ଗରୁଡ଼ ସ୍ତମ୍ଭଠାରୁ ବାହାର କାଠ ମଧ୍ୟରେ ଦର୍ଶନ ପାଇଁ ୫ ଥାକିଆ କୋଲାପ୍ସିବୁଲ ଅର୍ଥାତ୍ ଖୋଲା ଯୋଡ଼ା ହୋଇ ପାରିବା ଭଳି ରାମ୍ପ କରାଯିବ । ଗୋଟିଏ ରାମ୍ପ ବା ଧାଡ଼ିରେ ଥରକେ ୫୦ ଲୋକ ଯାଇପାରିବେ । ଗୋଟିଏ ଘଣ୍ଟାରେ ୮ରୁ ୧୦ ହଜାର ଲୋକଙ୍କୁ ଦର୍ଶନ ସୁବିଧା ଯୋଗାଇଦେବାକୁ ହେଉଛି ଯୋଜନା ।

ପଢନ୍ତୁ ଏହି ଖବର: ଶ୍ରୀମନ୍ଦିରରେ ବଡ଼ ପରିବର୍ତ୍ତନ…ନାଟମଣ୍ଡପରେ ଆରମ୍ଭ ହେଲା AC ଟ୍ରାଏଲ୍

୩ରୁ ୪ ମାସ ମଧ୍ୟରେ ଏହାକୁ ଲାଗୁ କରିବାକୁ ଯୋଜନା ପ୍ରସ୍ତୁତ ହୋଇଛି କହିଛନ୍ତି ଆଇନମନ୍ତ୍ରୀ । ତେବେ ପୂର୍ବରୁ ଏହି ଯୋଜନା ହୋଇଥିବା ବେଳେ ବୈଷୟିକ କାରଣରୁ ବନ୍ଦ ରହିଥିଲା । ଆଗକୁ କାର୍ତ୍ତିକ ମାସ ରହିଥିବା ବେଳେ ଭିଡ଼କୁ ଦୃଷ୍ଟିରେ ରଖି ଏହି ସମୟରେ ପରୀକ୍ଷା କରିବା ନେଇ ଆଶଙ୍କା ବ୍ୟକ୍ତ କରିଛନ୍ତି ସେବାୟତ । ସେପଟେ ଧାଡ଼ି ଦର୍ଶନ ବାଟ ଫିଟିବା ପରେ ସୁବିଧା ଦର୍ଶନ ପାଇଁ ଅପେକ୍ଷା କରିଛନ୍ତି ବରିଷ୍ଠ ଓ ମହିଳା ଭକ୍ତ ।