ଅର୍ଗସ ବ୍ୟୁରୋ : ପେଶାରେ ନାପିତ । କିନ୍ତୁ ସାରା ଜୀବନ ସମ୍ବଲପୁରୀ ଭାଷା ଓ ସଂଗୀତ ପାଇଁ ସମର୍ପିତ । ୬୦୦ରୁ ଅଧିକ ସମ୍ବଲପୁରୀ ଲୋକ ଗୀତର ସ୍ରଷ୍ଟା । ୩ ଟି ଓଡ଼ିଆ ଚଳଚ୍ଚିତ୍ରରେ କଣ୍ଠଦାନ । ୧୨ରୁ ଅଧିକ ନାଟକର ରଚୟିତା । ୮୭ ବର୍ଷ ବୟସରେ ଏହି କଳାର ପୂଜାରୀଙ୍କୁ ମିଳିଛି ବଡ଼ ସ୍ବୀକୃତି । ପଦ୍ମଶ୍ରୀ ପୁରସ୍କାର ପାଇଁ ମନୋନୀତ ହୋଇଥିବା ଶୁଣିବା ପରେ ଖୁସିରେ ବିଭୋର ହୋଇଯାଇଥିଲେ ସମ୍ବଲପରୁର ବିନୋଦ ପଶାୟତ । ତାଙ୍କର ଗୁଣକୁ ଚିହ୍ନି ପାରିଥିବାରୁ ପ୍ରଧାନମନ୍ତ୍ରୀ ମୋଦିଙ୍କୁ କୃତଜ୍ଞତା ସେ ଜାଣାଇଛନ୍ତି ।

ବିନୋଦ ପଶାୟତଙ୍କ ଜନ୍ମ ୧୯୩୫ ମସିହାରେ ବଲାଙ୍ଗିର ସହରର ଟିକରାପଡ଼ାଠାରେ ହୋଇଥିଲା । ତେବେ ୧୯୫୩ ମସିହାରେ ସେ ସମ୍ବଲପୁର ଆସି ଏହିଠାରେ ରହି ଯାଇଥିଲେ । ସେ ଅଲ ଇଣ୍ଡିଆ ରେଡ଼ିଓ ଓ ଦୂରଦର୍ଶନର ଜଣେ ସ୍ବୀକୃତିପ୍ରାପ୍ତ କଳାକାର ଥିଲେ । "ହାଏ କୃଷ୍ଣ ହାଏ କୃଷ୍ଣ " ସମ୍ବଲପୁରୀ ଭଜନ ରଚନା କରି ସେ ଖୁବ୍ ଖ୍ୟାତିଅର୍ଜନ କରିଥିଲେ । ଏହି ଭଜନ ତାଙ୍କୁ ଖୁବ ପ୍ରସିଦ୍ଧି ଦେଇଥିଲା । ମା' ସମଲେଶ୍ବରୀଙ୍କ କୃପାରୁ ପଦଶ୍ରୀ ମିଳିବା ସମ୍ଭବ ହୋଇପାରିଥିବା କହିଛନ୍ତି ବିନୋଦ ପଶାୟତ ।

ଆଉ ଜଣେ ହେଉଛନ୍ତି ବିନୋଦ । ପ୍ରଥମ ଓଡିଆ ପଟଚିତ୍ର ଶିଳ୍ପୀ ଭାବରେ ବିନୋଦ ମହାରଣା ପାଇବେ ପଦ୍ମଶ୍ରୀ ପୁରସ୍କାର । ଘରର ଆର୍ଥିକ ଦୁସ୍ଥିତି ପାଇଁ ଅଧାରୁ ପାଠ ପଢା ଛାଡି ଥିଲେ । ୧୪ ବର୍ଷ ବୟସରେ ନିଜ ଅଜାଙ୍କଠାରୁ ପଟ ଚିତ୍ର କଳା ଶିଖିଥିଲେ ବିନୋଦ । ଓଡ଼ିଶାର ସାହିତ୍ୟ, କଳା, ସଂସ୍କୃତି ଓ ସ୍ଥାପତ୍ୟକୁ ପଟ୍ଟଚିତ୍ରକଳା ମାଧ୍ୟମରେ ବଞ୍ଚାଇବା ପାଇଁ ସେ ନିଆରା ପ୍ରୟାସ ଜାରି ରଖିଛନ୍ତି । ଯୁଗ ସହ ତାଳ ଦେଇ ଓଡ଼ିଆ ପର୍ବ ପର୍ବାଣୀ ସହ ବିଭିନ୍ନ ପୁରାଣ ଚିତ୍ର ଆଙ୍କିଛନ୍ତି ବିନୋଦ ମହାରଣା ।

ମାତ୍ର ୫ ବର୍ଷ ବୟସରେ ବାପାଙ୍କଠାରୁ ଶିକ୍ଷାଲାଭ କରିଥିବା ବିରଳ ଶବ୍ଦ ନୃତ୍ୟ କଳାକୁ ଜୀବନ ବ୍ୟାପୀ ସାଧନ ବନାଇ ଦେଇଥିଲେ ବରଗଡ଼ ଜିଲ୍ଲା ବରପାଲି ବ୍ଲକ କୁମ୍ଭାରୀ ଗାଁର ଭାଗବତ ପଧାନ । ନା କେବଳ ଶବ୍ଦ ନୃତ୍ୟକୁ ବଞ୍ଚାଇ ରଖିଛନ୍ତି ବରଂ ଅନେକ ଶିଷ୍ୟଙ୍କ ଜରିଆରେ ଏହି ମହାନ କଳାର ପ୍ରଚାର ପ୍ରସାର ପାଇଁ ପରିଣତି ବସୟରେ ବି ସଂଘର୍ଷ ଜାରି ରଖିଛନ୍ତି । ଚଳିତ ବର୍ଷ ପଦ୍ମଶ୍ରୀ ପୁରସ୍କାର ପାଇଁ ମନୋନୀତ ହେବା ଖବର ମିଳିବା ପରେ ମୋଦି ସରକାରଙ୍କୁ ଧନ୍ୟବାଦ ଜଣାଇବା ସହ ଏହି ସମ୍ମାନ ସମସ୍ତ କଳାକାରଙ୍କ ସମେତ ବରଗଡ଼ ଜିଲ୍ଲା ଏବଂ ଓଡ଼ିଶା ବାସୀଙ୍କର ବୋଲି କହିଛନ୍ତି ଭାଗବତ । ଭାଗବତ ପଧାନଙ୍କୁ ପଦ୍ମଶ୍ରୀ ପୁରସ୍କାର ମିଳିବା ନେଇ ଘୋଷଣା ହେବା ପରେ ଜନ୍ମମାଟି କୁମ୍ଭାରୀ ସମେତ ସାରା ବରଗଡ଼ ଜିଲ୍ଲାରେ ଖେଳିଯାଇଛି ଖୁସି ।

ଅଧିକ ପଢନ୍ତୁ ଓଡ଼ିଶା ଖବର

ଚଳିତ ବର୍ଷ ଆଉ ଯେଉଁ ଓଡ଼ିଆ ବଣମଲ୍ଲୀର ବାସ୍ନା ପ୍ରଧାନମନ୍ତ୍ରୀଙ୍କ ପାଖରେ ପହଞ୍ଚିଛି ସେ ହେଉଛନ୍ତି ଗଞ୍ଜାମ ଶେରଗଡ଼ ବ୍ଲକ ଗୋବିନ୍ଦପୁର ଗାଁର ଗୋପୀନାଥ ସ୍ବାଇଁ । ପିଲାଟି ବେଳୁ ହିଁ ଲୋକ କଳା ପ୍ରତି ଗୋପୀନାଥଙ୍କର ଆଗ୍ରହ ଥିଲା । ପଞ୍ଚମ ଶ୍ରେଣୀରେ ପଢୁଥିବା ବେଳେ ମାତ୍ର ୧୦ ବର୍ଷ ବୟସରେ ଦାଦାଙ୍କଠାରୁ କୃଷ୍ଣ ଲୀଳା ଶିକ୍ଷାଲାଭ କରିଥିଲେ । ସେବେଠାରୁ ଆଉ ପଛକୁ ଫେରି ଚାହିଁନାହାନ୍ତି ଗୋପୀନାଥ । ଅନେକ ଶିଷ୍ୟଙ୍କ ମାଧ୍ୟମରେ ଏହି ବିରଳ କଳାକୁ ବଞ୍ଚାଇ ରଖିବାକୁ ଜୀବନବ୍ୟାପୀ ଉଦ୍ୟମ କରିଆସିଛନ୍ତି । ଗୋପୀନାଥ ପଦ୍ମଶ୍ରୀ ପୁରସ୍କାର ପାଇଁ ଗୋପୀନାଥଙ୍କୁ ମନୋନୀତ କରି ତାଙ୍କ କଳା ସାଧନାକୁ ବଡ଼ ସମ୍ମାନ ଦେଇଛନ୍ତି ମୋଦି ସରକାର ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV