ଭୁବନେଶ୍ଵର/ପୁରୀ/କେନ୍ଦ୍ରାପଡ଼ା: ଆସନ୍ତାକାଲି ପବିତ୍ର ଗଣେଶ ଚତୁର୍ଥୀ । ଧରାପୃଷ୍ଠକୁ ଓହ୍ଲାଇବେ ପ୍ରଭୁ ଶ୍ରୀବିଘ୍ନବିନାଶକ । ପାର୍ବଣର ଋତୁର ପ୍ରାରମ୍ଭରେ ଅଗ୍ରପୂଜ୍ୟଙ୍କ ଆଗମନ ପାଇଁ ଚଳଚଞ୍ଚଳ ଧରାପୃଷ୍ଠ । ଆଉ ହାତରେ ମାତ୍ର କେଇ ଘଣ୍ଟା ସମୟ ଥିବାରୁ ମୂର୍ତ୍ତିରେ ଶେଷ ସ୍ପର୍ଶ ଦେଉଛନ୍ତି କାରିଗର । ଏପଟେ ରାଜଧାନୀଠୁ ଆରମ୍ଭ କରି ରାଜ୍ୟର ବିଭିନ୍ନ ଜିଲ୍ଲାରେ ପୂଜା ମଣ୍ଡପଗୁଡିକୁ ସୁସଜ୍ଜିତ ତୋରଣ, ରଙ୍ଗୀନ ଆଲୋକମାଳାରେ ସଜାଇବାରେ ବ୍ୟସ୍ତ ପୂଜା କମିଟି ସଦସ୍ୟ ।
- ରାଜଧାନୀରେ ବିରାଟ ବଡ଼ ମୂର୍ତ୍ତି
ଭୁବନେଶ୍ୱର ବଡଗଡରେ ମଧ ବଡ଼ ଗଣେଶ ମୂର୍ତ୍ତି ନିର୍ମାଣ କରାଯାଇଛି । ଲାଲବାଗ ଥିମରେ ପ୍ରାୟ ୬୫ ଫୁଟ ଉଚ୍ଚତା ବିଶିଷ୍ଟ ଗଣେଶଙ୍କୁ ପୂଜା କରାଯିବ । ଚଳିତ ବର୍ଷ ଗଣେଶଙ୍କ ମଥାରେ ହୀରା ମଥାମଣି ଲାଗାଇବାକୁ କମିଟି ନିଷ୍ପତ୍ତି ନେଇଛି । ଏହି ହୀରା ମଥାମଣି ଆକର୍ଷଣର କେନ୍ଦ୍ରବିନ୍ଦୁ ପାଲଟିବ ବୋଲି ବଡଗଡ ପୂଜା କମିଟି ପକ୍ଷରୁ କୁହାଯାଇଛି ।
- ଆକର୍ଷିତ କରିବ କାନ୍ତାରା ମନ୍ଦିର ଶୈଳୀରେ ତୋରଣ
ଭୁବନେଶ୍ୱର ସହୀଦ କ୍ଳବ୍ ପକ୍ଷରୁ କର୍ଣ୍ଣାଟକର କାନ୍ତାରା ମନ୍ଦିର ଶୈଳୀରେ ନିର୍ମିତ ହୋଇଛି ଆକର୍ଷଣୀୟ ତୋରଣ । ୧୩ ଫୁଟ ଉଚ୍ଚତା ବିଶିଷ୍ଟ ଗଣେଶଙ୍କୁ ପୂଜା କରାଯିବ । ପ୍ରାୟ ୨୮ ଦିନ ଧରି କଲିକତାରୁ ଆସିଥିବା ୩୫ ଜଣ କାରିଗର ଏହି ତୋରଣ ଓ ମୂର୍ତ୍ତି ତିଆରିରେ ଲାଗିଛନ୍ତି । ହୁଗୁଳାପତ୍ର, ତାଳପତ୍ର, ଆଖୁ, ବାଉଁଶ ଆଦି ବ୍ୟବହାର କରି ଏହି ତୋରଣ ତିଆରି କରାଯାଇଛି । ଏହା ପରିବେଶ ପାଇଁ ବେଶ ଉପଯୋଗୀ ରହିଛି । ପ୍ରାୟ ତୋରଣ ତିଆରି ପାଇଁ ୭ ଲକ୍ଷ ଟଙ୍କା ବ୍ୟୟ କରାଯାଇଛି ।
- ନୂଆସାହିରେ ୭୦ ଫୁଟ୍ ଉଚ୍ଚ ତୋରଣ
ଭୁବନେଶ୍ୱର ନୂଆସାହି ଶ୍ରୀଶ୍ରୀଆଖଣ୍ଡଳମଣି ସେବା ସଂସଦ ପକ୍ଷରୁ ୪୧ ବର୍ଷ ଧରି ହୋଇଆସୁଛି ଗଜାନନଙ୍କ ପୂଜା । ଚଳିତ ବର୍ଷ ବିରାଟକାୟ ରାଜକୁମାର ଗଣେଶ ମୂର୍ତ୍ତି ନିର୍ମାଣ କରାଯାଇଛି । ଏହା ନିର୍ମାଣ କରିବାକୁ ଦୀର୍ଘ ୨ ମାସ ହେଲା ଖୋର୍ଦ୍ଧାର ୬ ଜଣ କାରିଗର ମୂର୍ତ୍ତି ତିଆରି ଲାଗିଥିଲେ । ଅବିକଳ ଇଣ୍ଡିଆ ଗେଟ୍ ଭଳି ଆକର୍ଷଣୀୟ ତୋରଣ ସହ ଓଡ଼ିଆ ଅସ୍ମିତାର ଝଲକ ଦେଖିବାକୁ ମିଳିଛି । ଏହି ତୋରଣ ଉଚ୍ଚତା ପ୍ରାୟ ୭୦ ଫୁଟ୍ ଥିବା ସୂଚନା ମିଳିଛି।
- ପୁରୀରେ ବଣ୍ଟା ହେବ ୬ କୁଇଣ୍ଟାଲ ଲଡୁ
ଗଣେଶ ପୂଜା ପାଇଁ ଚଳଚଞ୍ଚଳ ହୋଇଉଠିଛି ଶ୍ରୀକ୍ଷେତ୍ର । ବଳଗଣ୍ଡି ସ୍ଥିତ ପୂଜା କମିଟ୍ ପକ୍ଷରୁ ଚଳିତ ବର୍ଷ ଗଣେଶ ପୂଜାରେ ଭକ୍ତ ଶ୍ରଦ୍ଧାଳୁଙ୍କୁ ବଣ୍ଟା ହେବ ୬ କୁଇଣ୍ଟାଲ ଲଡୁ । ଶେଷ ପର୍ଯ୍ୟାୟରେ ପହଁଞ୍ଚିଛି ତୋରଣ କାର୍ଯ୍ୟ । ଗଣେଶ ପୂଜା ପାଳନକୁ ନେଇ ପୁରୀ ସହରରେ ବ୍ୟାପକ ପ୍ରସ୍ତୁତି ହୋଇଛି । ବିଭିନ୍ନ ପୂଜା ମଣ୍ଡପ କର୍ମକର୍ତ୍ତାଙ୍କ ସହ ପୋଲିସ ପ୍ରଶାସନ ପକ୍ଷରୁ ଆଲୋଚନା ହୋଇଥିବା ବେଳେ ପୂଜା ମଣ୍ଡପଗୁଡିକରେ ସିସିଟିଭି ସ୍ଥାପନ କରିବା, ଅଗ୍ନି ନିରାପତ୍ତା ବ୍ୟବସ୍ଥା ଗ୍ରହଣ କରିବା, ଶବ୍ଦ ପ୍ରଦ୍ୟୁଷଣ ନ କରିବା, ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ସମୟରେ କୌଣସି ବିଶୃଙ୍ଖଳା ନକରିବା ପାଇଁ ପରାମର୍ଶ ଦେଇଛନ୍ତି ଏସପି । ବିଭିନ୍ନ ପୂଜା ମଣ୍ଡପ ପକ୍ଷରୁ ଆକର୍ଷଣୀୟ ସୁଉଚ୍ଚ ତୋରଣ ସାଙ୍ଗକୁ ବିଭିନ୍ନ ଡିଜାଇନର ଗଣେଶ ମୂର୍ତ୍ତି ନିର୍ମାଣ କରାଯାଉଛି ।
ପଢନ୍ତୁ ଏହି ଖବର: ସଜେଇ ହେଲାଣି ଵନ୍ଦର ନଗରୀ; ଦେବଶିଳ୍ପୀ ବିଶ୍ବକର୍ମାଙ୍କୁ ଦିଆଯାଉଛି ଶେଷ ସ୍ପର୍ଶ - କେନ୍ଦ୍ରାପଡ଼ାରେ ୨୦ରୁ ଊର୍ଦ୍ଧ୍ଵ ପୂଜା ମଣ୍ଡପ
ତେବେ କେନ୍ଦ୍ରାପଡ଼ାରେ ଗଜଲକ୍ଷ୍ମୀ ପୂଜା ପ୍ରସିଦ୍ଧ ଲାଭ କରିଥିବାବେଳେ, ଏଇ କିଛି ବର୍ଷ ହେବ ଗଣେଶ ପୂଜାକୁ ମଧ୍ୟ ଜାକଜକମରେ ପାଳନ କରୁଛନ୍ତି ଜିଲ୍ଲାବାସୀ । ସହରରେ ପାଖାପାଖି ୨୦ରୁ ଊର୍ଦ୍ଧ ପୂଜା ମଣ୍ଡପରେ ଗଣେଶ ପୂଜା ଅନୁଷ୍ଠିତ ହେଉଥିବାବେଳେ ସହର ଉପକଣ୍ଠ ବାରୋ, କୋରୋ, ପାଳକଣା, ନଳପାରି, କନ୍ତିଆ, ଇନ୍ଦୁପୁର ଭଳି ବିଭିନ୍ନ ଅଞ୍ଚଳରେ ଗଣେଶ ପୂଜାକୁ ବଡ଼ ଧୁମଧାମରେ ପାଳନ କରାଯାଉଛି । ଚଳିତ ବର୍ଷ ତୁହାକୁ ତୁହା ବର୍ଷା ହେଉଥିବାରୁ ପୂଜା କମିଟି ସଦସ୍ୟଙ୍କ ମନରେ ଟିକେ ଚିନ୍ତା ରହୁଛି, ତଥାପି ପୂଜାକୁ ମହାଆଡ଼ମ୍ବରେ ପାଳନ ପାଇଁ ସଭିଏଁ ପ୍ରସ୍ତୁତରେ ଲାଗିପଡିଛନ୍ତି ।
