Ganjam Flood / ରାସ୍ତା ଉପରେ ୮ ଫୁଟ୍‌ର ପାଣି; ବନ୍ୟାଜଳରେ ଉବୁଟୁବୁ ଆସିକା, ଘୋଡ଼ାହାଡ଼ ବ୍ରିଜ

ଗଞ୍ଜାମ: ଆସିକା ସହରେ ପଶିଲା ବନ୍ୟାଜଳ । ଋଷିକୁଲ୍ୟା ଓ ବଡନଦୀର ବନ୍ୟାଜଳ ପଶିବା ପରେ ଉବୁଟୁବୁ ଆସିକା ମେଡିକାଲ ରୋଡ । ଆସିକା ବ୍ରହ୍ମପୁର, ଆସିକା ସୋରଡା ଓ ଆସିକା ଭଞ୍ଜନଗର ଗାଡି ଚଳାଚଳ ବନ୍ଦ । ଆସିକା ପାଟିଳୁଗୁଡା ଗାଁ ପାଣି ଘେରରେ ରହିଛି । ଧରାକୋଟ ଦାମୋଦରପଲି ଓ ମୁଣ୍ଡମରାଇ ଗ୍ରାମ ବି ପାଣି ଘେରରେ । ବାତ୍ୟା ପରେ ପ୍ରବଳ ବର୍ଷା ଯୋଗୁଁ ପୂରା ଦକ୍ଷିଣ ଓଡ଼ିଶାରେ ବନ୍ୟା ପରିସ୍ଥିତି ସୃଷ୍ଟି ହୋଇଛି ।

ସୋରଡା ଦାରିଙ୍ଗବାଡ଼ି ରାସ୍ତାରେ ବନ୍ୟାଜଳ ପ୍ରବାହିତ ହେଉଛି । ତଳିଆ ଅଞ୍ଚଳରେ ଲୋକେ ଜଳବନ୍ଦୀ ଘେରରେ ରହିବା ପରେ ସେମାନଙ୍କୁ ଉଦ୍ଧାର କରିବାକୁ ପହଞ୍ଚିଛନ୍ତି NDRF ଟିମ । କବିସୂର୍ଯ୍ୟନଗର ବୁଢାମ୍ବ ପୋଲିସ ଫାଣ୍ଡିର ଭାଙ୍ଗିଲା କାନ୍ଥ । କବିସୂର୍ଯ୍ୟନଗର ଗାଙ୍ଗପୁର ଓ ସୁନାପଲି ମୁଖ୍ୟ ସଡ଼କ ଉପରେ ବନ୍ୟାଜଳ ପ୍ରବାହିତ ହେବା ପରେ ଯୋଗାଯୋଗ ବିଚ୍ଛିନ୍ନ ହୋଇଛି । କବିସୂର୍ଯ୍ୟନଗର ଭେଟସିଙ୍ଗି ରାସ୍ତାରେ ପ୍ରବାହିତ ହେଉଛି ବନ୍ୟାଜଳ ।

• ଆସିକାରେ ଭୟାବହ ବନ୍ୟା

ଆସିକାରେ ବନ୍ୟା ବିଭୀଷିକା ଦେଖିବାକୁ ମିଳିଥିବା ବେଳେ ସମଗ୍ର ସହର ବର୍ତ୍ତମାନ ଜଳମଗ୍ନ ହୋଇପଡ଼ିଛି। ସହରକୁ ଘେରି ରହିଥିବା ଋଷିକୁଲ୍ୟା ଓ ବଡ଼ ନଦୀରେ ଜଳସ୍ତର ବୃଦ୍ଧି ପାଇବାରୁ ଏଭଳି ସ୍ଥିତି ସୃଷ୍ଟି ହୋଇଛି। ସହରର ବିଭିନ୍ନ ଅଞ୍ଚଳରେ ଆଣ୍ଠୁଏରୁ ଅଧିକ ବନ୍ୟାଜଳ ପ୍ରବାହିତ ହେଉଛି । ଅନ୍ୟପଟେ ସହର ମଝିଦେଇ ଯାଇଥିବା ଟିପିସର ନାଳରେ ମଧ୍ୟ ପ୍ରବଳ ଜଳପ୍ରବାହ ଜାରି ରହିଛି । ଫଳରେ ସହରର ଉପଖଣ୍ଡ ଚିକିତ୍ସାଳୟ, ରଘୁନାଥ ନଗର, ବାଣୀବିହାର, ଲକ୍ଷ୍ମୀ ବଜାର ଏବଂ ବସ୍‌ଷ୍ଟାଣ୍ଡ ଭଳି ପ୍ରମୁଖ ସାହି ଓ ବଜାରରେ ବନ୍ୟାଜଳ ପଶିଯିବାରୁ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଏଭଳି ପରିସ୍ଥିତିରେ ଓଡ୍ରାଫ୍ ଟିମ୍ ପକ୍ଷରୁ ବୋଟ୍ ସାହାଯ୍ୟରେ ଜଳବନ୍ଦୀ ଅଞ୍ଚଳକୁ ଯାଇ ଫସିରହିଥିବା ଲୋକଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଉଛି।

• ୭ ଫୁଟ୍ ବନ୍ୟା ପାଣିରେ ଫସିଲା ମହିନ୍ଦ୍ରା ଥାର୍

ଗଞ୍ଜାମ ଜିଲ୍ଲାରେ ପ୍ରବଳ ବର୍ଷା ଓ ବନ୍ୟା ପରିସ୍ଥିତି ଜାରି ରହିଥିବା ବେଳେ ସୋରଡ଼ା ଅଗ୍ନିଶମ ବାହିନୀ ପକ୍ଷରୁ ଏକ ବଡ଼ ସାହସିକ ଉଦ୍ଧାର କାର୍ଯ୍ୟ ଦେଖିବାକୁ ମିଳିଛି । ୭ ଫୁଟ୍ ଉଚ୍ଚର ବନ୍ୟା ପାଣିରେ ଫସିଥିବା ଏକ ମହିନ୍ଦ୍ରା ଥାର୍ ଗାଡ଼ିରୁ ଦୁଇ ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି । ସୋରଡ଼ା–ଦାରିଙ୍ଗବାଡ଼ି ରାସ୍ତାର ଜରଉ ଛକ ନିକଟରେ ପ୍ରାୟ ୭ ଫୁଟ୍ ଉଚ୍ଚର ବନ୍ୟା ପାଣି ପ୍ରବାହିତ ହେଉଥିଲା । ଏହି ସମୟରେ ଏକ ମହିନ୍ଦ୍ରା ଥାର୍ ଗାଡ଼ି ପାଣି ମଧ୍ୟରେ ହଠାତ୍ ଫସିଯାଇଥିଲା ।

ପଢନ୍ତୁ ଏହି ଖବର: ରାସ୍ତା ଉପରେ ବିରାଟ ବଡ଼ ପଥର; ଅଳ୍ପକେ ବର୍ତ୍ତିଲେ ଯାତ୍ରୀ, ଘାଟିରାସ୍ତାରେ ଭୂସ୍ଖଳନ

ଗାଡ଼ି ଭିତରେ କେ.ବି. ରବିଚନ୍ଦ୍ରନ ଏବଂ ଡି. ସରୋଜ କୁମାର ନାମକ ଦୁଇ ବ୍ୟକ୍ତି ବନ୍ଦୀ ହୋଇ ରହିଥିଲେ । ଚାରିଆଡ଼େ ଜଳମଗ୍ନ ପରିସ୍ଥିତି ଏବଂ ପ୍ରତି ମୁହୂର୍ତ୍ତରେ ଜୀବନ ପ୍ରତି ବିପଦ ଥିବାବେଳେ ଖବର ପାଇ ସୋରଡ଼ା ଅଗ୍ନିଶମ ବାହିନୀ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲା । ଅଗ୍ନିଶମ କର୍ମଚାରୀମାନେ ନିଜ ଜୀବନକୁ ବାଜି ଲଗାଇ ଅତ୍ୟନ୍ତ ସାହସ ଓ ଦକ୍ଷତାର ସହିତ ଉଭୟଙ୍କୁ ଗାଡ଼ି ଭିତରୁ ସୁରକ୍ଷିତ ଭାବେ ଉଦ୍ଧାର କରିଥିଲେ । ବିପଦ ସମୟରେ ଅଗ୍ନିଶମ ବାହିନୀର ଏହି ତତ୍ପରତା ଓ ସାହସିକତା ସ୍ଥାନୀୟ ଅଞ୍ଚଳରେ ବେଶ୍ ପ୍ରଶଂସା ସାଉଁଟିଛି ।

• ଘୋଡ଼ାହାଡ଼ ବ୍ରିଜ ଉପରେ ୮ ଫୁଟର ବନ୍ୟାଜଳ

ଦିଗପହଣ୍ଡି ଓ ସାନଖେମୁଣ୍ଡି ଅଞ୍ଚଳରେ ବାତ୍ୟା ପ୍ରଭାବରେ ଭୀଷଣ ବର୍ଷା ଜାରି ରହିଥିବା ବେଳେ ଘୋଡ଼ାହାଡ଼ ନଦୀର ଜଳସ୍ତର ଅତ୍ୟନ୍ତ ବୃଦ୍ଧି ପାଇଛି । ସାନଖେମୁଣ୍ଡି ପଳାସପୁର ନିକଟରେ ଥିବା ଘୋଡ଼ାହାଡ଼ ବ୍ରିଜ ଉପରେ ପାଖାପାଖି ୮ ଫୁଟ ଉଚ୍ଚର ବନ୍ୟାଜଳ ପ୍ରବାହିତ ହେଉଛି । ପୋଲ ଉପରେ ବନ୍ୟାଜଳ ଚାଲୁଥିବାରୁ ଆସିକାରୁ ଦିଗପହଣ୍ଡିକୁ ସଂଯୋଗ କରୁଥିବା ୩୨୬ ନମ୍ବର ଜାତୀୟ ରାଜପଥରେ ଯାତାୟାତ ସମ୍ପୂର୍ଣ୍ଣ ବିଚ୍ଛିନ୍ନ ହୋଇଯାଇଛି। ରାସ୍ତାର ଉଭୟ ପାର୍ଶ୍ୱରେ ଶହ ଶହ ଗାଡ଼ିମୋଟର ଅଟକି ରହିଥିବାରୁ ଯାତ୍ରୀମାନେ ନାନା ଅସୁବିଧାର ସମ୍ମୁଖୀନ ହେଉଛନ୍ତି। ଖବର ପାଇ ପୋଲିସ ଓ ସ୍ଥାନୀୟ ପ୍ରଶାସନ ଘଟଣାସ୍ଥଳରେ ପହଞ୍ଚି ବ୍ୟାରିକେଟ୍ ଲଗାଇବା ସହ ସୁରକ୍ଷା ଦୃଷ୍ଟିରୁ ଲୋକଙ୍କୁ ବ୍ରିଜ ନିକଟକୁ ନ ଯିବାକୁ କଡ଼ା ନିର୍ଦ୍ଦେଶ ଦେଇ ସଚେତନ କରାଉଛନ୍ତି ।