Kalinga Ghati Landslide / ରାସ୍ତା ଉପରେ ବିରାଟ ବଡ଼ ପଥର; ଅଳ୍ପକେ ବର୍ତ୍ତିଲେ ଯାତ୍ରୀ, ଘାଟିରାସ୍ତାରେ ଭୂସ୍ଖଳନ

ଗଞ୍ଜାମ/କୋରାପୁଟ: ବାତ୍ୟା ଅର୍ଣ୍ଣବର ଲ୍ୟାଣ୍ଡଫଲ୍ ପରେ ଦକ୍ଷିଣ ଓଡ଼ିଶାରେ ଭୟଙ୍କର ସ୍ଥିତି । ଲଗାଣ ବର୍ଷାରେ କୋରାପୁଟ, ଗଞ୍ଜାମ, ଗଜପତି, କନ୍ଧମାଳ ଜିଲ୍ଲାଗୁଡ଼ିକରେ ବନ୍ୟା ସ୍ଥିତି । ଯୁଆଡ଼େ ଦେଖିବେ ଖାଲି ପାଣି ଆଉ ପାଣି । ଚତୁର୍ଦ୍ଦିଗ ସମୁଦ୍ରର ଭ୍ରମ ସୃଷ୍ଟି କରିଛି । ଜାତୀୟ ରାଜପଥରେ ଚାଲୁଛି ବନ୍ୟା ପାଣି । ଏପଟେ ଘାଟି ରାସ୍ତାରେ ଭୂସ୍ଖଳନ । ଅଳ୍ପକେ ବର୍ତ୍ତିଗଲେ ଯାତ୍ରୀ । କଳିଙ୍ଗା ଓ ସାଲୁର-ଶୁଙ୍କି ଘାଟି ସମେତ ତପ୍ତପାଣି ନିକଟରେ ଭୂସ୍ଖଳନ ହୋଇଛି ।

• କଳିଙ୍ଗା ଘାଟିରେ ଭୂସ୍ଖଳନ

ଗଞ୍ଜାମ ସୀମାନ୍ତ କଳିଙ୍ଗା ଘାଟିରେ ପୁଣି ଭୁସ୍ଖଳନ । ଫଳରେ କନ୍ଧମାଳ ଓ ଗଞ୍ଜାମ ଯାତାୟତ ସଂପୂର୍ଣ୍ଣ ଠପ୍‌ ହୋଇଯାଇଛି । ବାତ୍ୟା ଅର୍ଣ୍ଣବ ଆସିବା ପୂର୍ବରୁ କଳିଙ୍ଗା ଘାଟିକୁ ପ୍ରଶାସନ ସିଲ୍‌ କରିଥିଲା । ତେବେ ଦୁଇଦିନର ଲଗାଣ ବର୍ଷା ପରେ ପୁଣି ଆଜି ଭୂସ୍ଖଳନ ହୋଇଛି । ବଡ଼ ବଡ଼ ପଥର ଆସି ଘାଟି ରାସ୍ତାକୁ ଅବରୋଧ କରିଛନ୍ତି । କିଛିଦିନ ତଳେ ହୋଇଥିବା ଲଘୁଚାପ ଜନିତ ବର୍ଷା ସମୟରେ କଳିଙ୍ଗା ଘାଟିରେ ଭୂସ୍ଖଳନ ହୋଇଥିଲା । ଫଳରେ ପାହାଡ଼ର ମାଟି ଅତଡ଼ା ଖସିବା ସହ ଗାର୍ଡ ୱାଲ୍ ଭାଙ୍ଗି ଯାଇଥିଲା । ବାରମ୍ବାର ଭୁସ୍ଖଳନ ଯୋଗୁଁ ଏବେ ସ୍ଥିତି ଅଣାୟତ୍ତ ହୋଇପଡ଼ିଛି । ଘାଟିରାସ୍ତା ମରାମତି କାମ ସରିବା ପୂର୍ବରୁ ପୁଣି ବର୍ଷା ଏବେ ଚିନ୍ତା ବଢାଇ ଦେଇଛି ।

• ସାଲୁର-ଶୁଙ୍କି ଘାଟିରେ ଭୂସ୍ଖଳନ

କୋରାପୁଟରେ ଅର୍ଣ୍ଣବର ତାଣ୍ଡବ । ସାଲୁର ଶୁଙ୍କି ଘାଟିରେ ଭୁସ୍କଳନ । ବର୍ଷା ଯୋଗୁଁ ସାଲୁର-ଶୁଙ୍କି ଘାଟିରେ ଭୂସ୍ଖଳନ ହୋଇଛି । ବିଭିନ୍ନ ସ୍ଥାନରେ ପାହାଡ଼ରୁ ମାଟି ଅତଡ଼ା ଖସିଥିବା ବେଳେ ଭାଙ୍ଗିଛି ଗାର୍ଡ ୱାଲ୍ । ଏଥିସହ ରାସ୍ତାରେ ଉପୁଡ଼ି ପଡ଼ିଛି ଗଛ । ବର୍ଷା ଓ ଭୂସ୍ଖଳନ ଯୋଗୁଁ ଯାତାୟାତ ଉପରେ ପ୍ରଭାବ ପଡ଼ିବା ଆଶଙ୍କା ରହିଛି । ବିଭିନ୍ନ ସ୍ଥାନରେ ସ୍ଥିତି ଉପରେ ନଜର ରଖିବା ସହ ଲୋକଙ୍କୁ ସତର୍କ ରହିବାକୁ ସୂଚନା ଜାରି କରିଛି ଜିଲ୍ଲା ପ୍ରଶାସନ । ସେହିପରି କିନ୍ଦୁଲି ଛକ ନିକଟରୁ ଦେଓମାଳି ପର୍ବତମାଳା ଯିବା ରାସ୍ତାରେ ମଧ୍ୟ ଭୂସ୍ଖଳନ ହୋଇଛି । ଭୂସ୍ଖଳନ ଯୋଗୁଁ ଯାତାୟତ ପ୍ରଭାବିତ ହୋଇପଡ଼ିଛି ।

ପଢନ୍ତୁ ଏହି ଖବର: MKCGରେ ବଡ଼ ଅଘଟଣ... କର୍କଟ ୱାର୍ଡରେ ଖସିଲା ସିଲିଂ

• ତପ୍ତପାଣି ନିକଟରେ ଭୂସ୍ଖଳନ

ଗଞ୍ଜାମ-ଗଜପତି ସୀମାନ୍ତ ତପ୍ତପାଣି ନିକଟ ବେଲାଗଡଠାରେ ଧସିଲା ମାଟି ଅତଡ଼ା । ଫଳରେ ରାସ୍ତା ଅବରୋଧ ହୋଇଛି । ଯାତାୟତ ବାଧାପ୍ରାପ୍ତ ହୋଇଛି । ବାତ୍ୟା ପରେ ପ୍ରବଳ ବର୍ଷା ଯୋଗୁଁ ଏପରି ସ୍ଥିତି ଉପୁଜୁଛି ।