SRC Press Meet / ଗଞ୍ଜାମରେ ସୁଧୁରୁଛି ସ୍ଥିତି; ଆଜି ଆସିକାରେ ବିଦ୍ୟୁତ ସଂଯୋଗ, ନିଖୋଜଙ୍କୁ ଖୋଜାଚାଲିଛି

ଗଞ୍ଜାମ: ବାତ୍ୟା ଅର୍ଣ୍ଣବ ପ୍ରଭାବରେ ପ୍ରବଳ ବର୍ଷା ଯୋଗୁଁ ଗଞ୍ଜାମରେ ସୃଷ୍ଟି ହୋଇଥିବା ବନ୍ୟା ସ୍ଥିତିରେ ଆସୁଛି ସୁଧାର । ବାତ୍ୟା ପରେ ବନ୍ୟା ସ୍ଥିତି ନେଇ ସ୍ଵତନ୍ତ୍ର ରିଲିଫ କମିଶନର ପ୍ରେସ୍‌ମିଟ୍ ମାଧ୍ୟମରେ ସବିଶେଷ ସୂଚନା ଦେଇଛନ୍ତି । ଗଞ୍ଜାମ, ଗଜପତିର ୭ଟି ବ୍ଲକରେ ଭୀଷଣ ବର୍ଷା ହୋଇଛି । ଗଞ୍ଜାମ ଜିଲ୍ଲାରେ ୧ ଲକ୍ଷ ୫ ହଜାର ୬୨୨ ଲୋକ ଓ ଗଜପତି ଜିଲ୍ଲାରେ ୨୧ ହଜାର ୭୮୨ ଲୋକ ପ୍ରଭାବିତ ହୋଇଛନ୍ତି । ତେବେ ଆଜି ଆସିକା ସହରରେ ବିଦ୍ୟୁତ ସଂଯୋଗ ଦିଆଯିବ ବୋଲି ଏସଆରସି ସୂଚନା ଦେଇଛନ୍ତି । ଗଞ୍ଜାମରେ ୮୦ରୁ ୮୫% ବିଦ୍ୟୁତ୍ ଭିତ୍ତିଭୂମି ପୁନଃରୁଦ୍ଧାର ହୋଇଛି ।

ସେହିପରି ଗଞ୍ଜାମ ପାତ୍ରପୁରରେ ରେକର୍ଡ ଭାଙ୍ଗିଛି ବର୍ଷା । ପାତ୍ରପୁରରେ ୫୪୬ ମିମି ରେକର୍ଡ ବର୍ଷା ହୋଇଛି । ଗଞ୍ଜାମ, ଗଜପତିର ୭ଟି ବ୍ଲକରେ ଭୀଷଣ ବର୍ଷା ହୋଇଛି । ଗଞ୍ଜାମ, ଗଜପତି ଓ କନ୍ଧମାଳରେ ପ୍ରବଳ ବର୍ଷା ଯୋଗୁଁ ବନ୍ୟା ହୋଇଛି । ଲୋକଙ୍କୁ ସୁରକ୍ଷିତ ସ୍ଥାନାନ୍ତର ସହ ରିଲିଫ୍ କାର୍ଯ୍ୟ ତ୍ବରାନ୍ବିତ କରାଯାଇଛି । ଗଜପତି ଜିଲ୍ଲାରେ ୩୪୦ଟି ରିଲିଫ୍ କ୍ୟାମ୍ପ୍‌ ସହ ଗଞ୍ଜାମ ଜିଲ୍ଲାରେ ୧ ଲକ୍ଷ ୫ ହଜାର ୬୨୨ ଲୋକ ପ୍ରଭାବିତ ହୋଇଛନ୍ତି । ଗ୍ରାଉଣ୍ଡରେ ପୁନରୁଦ୍ଧାର କାର୍ଯ୍ୟ ଜୋର୍‌ଦାର୍ ଚାଲିଛି ।

• ବନ୍ୟାରେ ୪ ଜଣଙ୍କ ମୃତ୍ୟୁ

ଚଳିତ ବନ୍ୟାରେ ୪ ଜଣଙ୍କ ମୃତ୍ୟୁ ହୋଇଥିବା କହିଲେ ଏସଆରସି । ଭୂସ୍ଖଳନ ଓ ପ୍ରବଳ ବର୍ଷା ପାଇଁ ୪ ଜଣଙ୍କ ମୃତ୍ୟୁ ହୋଇଛି । ଭୂସ୍ଖଳନ ଯୋଗୁଁ ରାଇକିଆରେ ୩ଜଣଙ୍କ ମୃତ୍ୟୁ ହୋଇଥିବାବେଳେ ଗଜପତିରେ ଶୌଚ ହେବାକୁ ଯାଇ ଜଣଙ୍କ ମୃତ୍ୟୁ ଘଟିଛି । ଭଞ୍ଜନଗର ଗିଡ଼ିପାବାଲିରେ ଭୂସ୍ଖଳନ ହୋଇଛି । ଭୂସ୍ଖଖଳନରେ ୧୩ଜଣ ନିଖୋଜ ଅଛନ୍ତି, ଜଣେ ଉଦ୍ଧାର । ବୃଦ୍ଧା ତାରାବତୀ ପ୍ରଧାନଙ୍କୁ ଜୀବିତ ଉଦ୍ଧାର କରାଯାଇଛି ।

• ଭଞ୍ଜନଗରରେ ୧୨ ଜଣ ନିଖୋଜ

ଭୟଙ୍କର ଭୂସ୍ଖଳନ ଯୋଗୁ ଭଂଜନଗର ଗିଡିପାବାଲି ଗାଁରୁ ୧୨ ଜଣ ନିଖୋଜ ଅଛନ୍ତି । ବାଟ ସାରା ହୋଇଛି ଭୂସ୍ଖଳନ । ଅନେକ ପାହାଡ଼ ଧସିଯାଇଥିବା ଚିତ୍ର ସାମ୍ନାକୁ ଆସିଛି । କେବଳ ଗିଡ଼ିପାବାଲି ନୁହେଁ ଅନେକ ଗାଁ ପ୍ରଭାବିତ ହୋଇଛି । ରେସ୍କ୍ୟୁ ଟିମ ସହ ଯିବାବେଳେ ପ୍ରକୃତିର ଭଙ୍କରର ରୂପ କ୍ୟାମେରାରେ କଏଦ ହୋଇଛି । ବିପଦ ଭିତରେ ଫସି ରହିଥିବା ଲୋକଙ୍କୁ ବାଟରେ ରେସ୍କ୍ୟୁ ଟିମ ଦଉଡ଼ି ପକାଇ ଉଦ୍ଧାର କରିଥିଲା । ତେବେ ରାସ୍ତା ଘାଟ ସଂପୂର୍ଣ୍ଣ ନଷ୍ଟ ହୋଇଯାଇଥିବା ବେଳେ ଭୂସ୍ଖଳନ ଓ ଗଛ ଉଡ଼ି ପାହାଡ଼ ଧସିଯାଇଥିବା ଦେଖିବାକୁ ମିଳିଛି । ବାଟ ସାରା ଥିବା ଗାଁରେ ଲୋକେ ଫସି ରହିଛନ୍ତି । ଉଦ୍ଧାରକାରୀ ଟିମ ଲୋକଙ୍କୁ ସୁରକ୍ଷିତ ସ୍ଥାନକୁ ନେବା ପାଇଁ ପ୍ରୟାସ ଜାରି ରଖିଛନ୍ତି ।

ପଢନ୍ତୁ ଏହି ଖବର: ଗଞ୍ଜାମ ବନ୍ୟାରେ ଚାରିଆଡ଼େ ଧ୍ୱଂସର ଚିତ୍ର, ୫/୬ ଫୁଟ୍ ପାଣିରେ ବୁଡ଼ିଲା ଗାଁ

• ଆସିକା ସହରରୁ ଆସିଲା ଦୁର୍ଦ୍ଦଶା ଚିତ୍ର

ବନ୍ୟା ପାଣି ଖସିଯିବା ପରେ ଗଞ୍ଜାମ ଜିଲ୍ଲା ଆସିକା ସହରରୁ ଦୁର୍ଦ୍ଦଶାର ଚିତ୍ର ସାମ୍ନାକୁ ଆସିଛି । ସହରର ବିଭିନ୍ନ ଅଞ୍ଚଳରେ କୁଢ଼ କୁଢ଼ ଅଳିଆ ଆବର୍ଜନା ଜମା ହୋଇ ରହିଥିବାବେଳେ ରାସ୍ତାଘାଟ ଏବଂ ଲୋକଙ୍କ ଆସବାବପତ୍ର ଚାରିଆଡ଼େ ମାଟି ଓ କାଦୁଅରେ ଭର୍ତ୍ତି ହୋଇଯାଇଛି । ସେପଟେ ସହରରେ ବିଦ୍ୟୁତ ସରବରାହ ସ୍ଥିତି ଅତି ସାଙ୍ଘାତିକ ରହିଛି । ବନ୍ୟା ଓ ଝଡ଼ ପ୍ରଭାବରେ ଅନେକ ସ୍ଥାନରେ ବିଦ୍ୟୁତ ଖୁଣ୍ଟ ଉପୁଡ଼ି ମାଟିରେ ପଡ଼ିଛି । କ୍ଷତିଗ୍ରସ୍ତ ବିଦ୍ୟୁତ ସେବାକୁ ଯଥାଶୀଘ୍ର ସ୍ୱାଭାବିକ କରିବା ପାଇଁ ପ୍ରଶାସନ ପକ୍ଷରୁ ଆଜିଠାରୁ ରିଷ୍ଟୋରେସନ୍ କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଆରମ୍ଭ ହୋଇଛି । ବିଭିନ୍ନ ସ୍ଥାନକୁ ନୂତନ ବିଦ୍ୟୁତ ଖୁଣ୍ଟ ଅଣାଯିବା ସହ ଛିଣ୍ଡିଥିବା ତାରଗୁଡ଼ିକୁ ଯୋଡ଼ିବା କାମ ଜାରି ରହିଛି ।