Ganjam Electricity Supply / ଅନ୍ଧାରରେ ଗଞ୍ଜାମ ଓ ଗଜପତିର ଅନେକ ଅଞ୍ଚଳ; ୫୬,୭୦୬ ଟ୍ରାନ୍ସଫର୍ମର ପ୍ରଭାବିତ

ଗଞ୍ଜାମ/ଗଜପତି: ବାତ୍ୟା ପରେ ବନ୍ୟାରେ ଦୋହଲିଯାଇଛି ଦକ୍ଷିଣ ଓଡ଼ିଶା । ହଠାତ୍ ବନ୍ୟାଜଳ ମାଡ଼ି ଆସିବାରୁ ଲୋକେ ଅନେକ ସମସ୍ୟାର ସମ୍ମୁଖୀନ ହୋଇଛନ୍ତି । ଘନ ଅନ୍ଧକାରରେ ରହିଛି ଗଞ୍ଜାମ ଓ ଗଜପତି ଜିଲ୍ଲାର ଅନେକ ଅଞ୍ଚଳ । ଯଦି ଆମେ ପୂରା ଦକ୍ଷିଣ ଓଡ଼ିଶା କଥା କହିବା ତେବେ ପ୍ରାୟ ୫୬ ହଜାର ୭୦୬ ଟ୍ରାନ୍ସଫର୍ମର କ୍ଷତିଗ୍ରସ୍ତ ହୋଇଛି । ଆସ୍କା, ପୁରୁଷୋତ୍ତମପୁର, ସୋରଡ଼ା, ଭଞ୍ଜନଗର ବିଶେଷ ପ୍ରଭାବିତ ହୋଇଛି । ଯୁଦ୍ଧକାଳୀନ ଭିତିରେ ଚାଲିଛି ମରାମତି କାମ।

ସମଗ୍ର ଦକ୍ଷିଣ ଓଡ଼ିଶାରେ ସମୁଦାୟ ୧୭ ଲକ୍ଷ ୮୮ ହଜାର ୯୪୨ ଉପଭୋକ୍ତା ବାତ୍ୟା ଓ ବନ୍ୟାରେ ପ୍ରଭାବିତ ହୋଇଛନ୍ତି । ବନ୍ୟା ବିତ୍ପାତ ସତ୍ତ୍ୱେ ଯୁଦ୍ଧକାଳୀନ ଭିତିରେ ବିଦ୍ୟୁତ ଭିତ୍ତିଭୂମିର ଶତ ପ୍ରତିଶତ ପୁନରୁଦ୍ଧାର କରୁଛି ଟିପିଏସ୍ଓଡିଏଲ୍ । ଟିପିଏସ୍ଓଡିଏଲ୍ ପକ୍ଷରୁ ମିଳିଥିବା ସୂଚନା ଅନୁସାରେ ଆଜି ଅପରାହ୍ନ ସୁଦ୍ଧା ମୋଟ ୧୬ ଲକ୍ଷରୁ ଅଧିକ ଉପଭୋକ୍ତାଙ୍କ ପାଖରେ ବିଦ୍ୟୁତ ସରବରାହ ପହଞ୍ଚିସାରିଛି ।

• ୧୬ ଲକ୍ଷଙ୍କ ନିକଟରେ ପହଞ୍ଚିଲା ବିଜୁଳି

ରାଜ୍ୟର ମାଲକାନଗିରି, କୋରାପୁଟ, ଗଞ୍ଜାମ, ଗଜପତି ଓ ରାୟଗଡ଼ା ଭଳି ଜିଲ୍ଲାରେ ଶହ ଶହ ବିଜୁଳି ଖୁଣ୍ଟ ମାଟି କାମୁଡ଼ି ପଡ଼ିଛି । ସମଗ୍ର ଦକ୍ଷିଣ ଓଡ଼ିଶା ପ୍ରଭାବିତ ହୋଇଥିବା ସମସ୍ତ ୪୬ଟି ୩୩କେଭି ଲାଇନ, ୧୩୦ ପ୍ରାଇମେରୀ ସବଷ୍ଟେସନ ମରାମତି ଶେଷ ହୋଇଛି । ସେହିପରି ୬୫୮ଟି ୧୧କେଭି ଲାଇନ ମଧ୍ୟରୁ ୬୩୮ ମରାମତି ହୋଇଥିବା ବେଳେ, ୨୭୮ ପାଓ୍ୱାର ଟ୍ରାନ୍ସଫର୍ମର ଓ ୫୫ ହଜାର ଡିଷ୍ଟ୍ରିବ୍ୟୁସନ୍ ଟ୍ରାନ୍ସଫର୍ମର ପୁନଃକାର୍ଯ୍ୟକ୍ଷମ କରିବାରେ ସଫଳ ହୋଇଥିବା ନେଇ ସୂଚନା ଦେଇଛି ଟିପିଏସ୍ଓଡିଏଲ୍ । ଏହିପରି ଭାବେ ଦକ୍ଷିଣ ଓଡ଼ିଶାର ମୋଟ୍ ୧୭ ଲକ୍ଷ ୮୮ ହଜାରରୁ ଅଧିକ ଉପଭୋକ୍ତା ବାତ୍ୟା ଅର୍ଣ୍ଣବ ଓ ବନ୍ୟାରେ ପ୍ରଭାବିତ ହୋଇଥିବା ବେଳେ ପ୍ରାୟ ୧୬ ଲକ୍ଷ ଉପଭୋକ୍ତାଙ୍କ ନିକଟରେ ବିଜୁଳି ସେବାକୁ ସ୍ୱାଭାବିକ କରିବାରେ ସଫଳ ହୋଇଛି ଟିପିଏସ୍ଓଡିଏଲ୍ ।

• ଏହି ଜିଲ୍ଲାରେ ବିଦ୍ୟୁତ ପୁନରୁଦ୍ଧାର କାର୍ଯ୍ୟ ଶେଷ

ପ୍ରଭାବିତ ହୋଇଥିବା ସମୁଦାୟ ବିଦ୍ୟୁତ ଭିତ୍ତିଭୂମିର ଶତ ପ୍ରତିଶତରୁ ଅଧିକ ଭିତ୍ତିଭୂମି ସଫଳତା ପୂର୍ବକ କାର୍ଯ୍ୟକ୍ଷମ କରିଛି ଟିପିଏସ୍ଓଡିଏଲ୍ । କେବଳ ଗଞ୍ଜାମ ଜିଲ୍ଲାରେ ୮ ଲକ୍ଷରୁ ଅଧିକ ଉପଭୋକ୍ତା ପ୍ରଭାବିତ ହୋଇଥିବା ବେଳେ ଗଜପତି ଜିଲ୍ଲାରେ ୧ ଲକ୍ଷ ୫୪ ହଜାରରୁ ଅଧିକ ଉପଭୋକ୍ତା ବାତ୍ୟା ଓ ବନ୍ୟାରେ ପ୍ରଭାବିତ ହୋଇଛନ୍ତି । ସେହିପରି ମାଲକାନଗିରିରେ ସମସ୍ତ ପ୍ରଭାବିତ ଅଞ୍ଚଳରେ ୧୦୦ ପ୍ରତିଶତ ବିଜୁଳି ସରବରାହ ପୁନରୁଦ୍ଧାର କାମ ସରିଛି । କନ୍ଧମାଳ, କୋରାପୁଟ, ନବରଙ୍ଗପୁର, ରାୟଗଡ଼ା ଭଳି ଜିଲ୍ଲାରେ ବିଜୁଳି ଜନିତ ପୁନରୁଦ୍ଧାର କାର୍ଯ୍ୟ ପ୍ରାୟ ଶତ ପ୍ରତିଶତ ଶେଷ ହୋଇଛି ।

ପଢନ୍ତୁ ଏହି ଖବର: ଭଞ୍ଜନଗରରେ ନିଖୋଜଙ୍କୁ ଖୋଜିବ ନାଭାଲ ହେଲିକପ୍ଟର

ବନ୍ୟା କାରଣରୁ ପୁନରୁଦ୍ଧାର କାର୍ଯ୍ୟ ଅପେକ୍ଷାକୃତ ଭାବେ କଷ୍ଟକର ହୋଇଥିଲେ ସୁଦ୍ଧା ଟିପିଏସ୍ଓଡିଏଲର କ୍ଷେତ୍ରୀୟ କର୍ମଚାରୀମାନେ ରାସ୍ତାରେ ପଡ଼ିଥିବା ଗଛ ହଟାଇବା, ଭାଙ୍ଗିଥିବା ଖୁଣ୍ଟ ବଦଳାଇବା, ଓ କ୍ଷତିଗ୍ରସ୍ତ ତାର ଓ ଉପକରଣ ମରାମତି ପାଇଁ ନିଜର ସବୁ ସେକ୍ସନ, ସବ୍-ଡିଭିଜନ୍, ଡିଭିଜନ୍, ତଥା ସର୍କଲ ପାଇଁ ସ୍ୱତନ୍ତ୍ର ଟିମ୍ ପ୍ରସ୍ତୁତ ରଖିଥିଲା । କେଉଁଠି ଅଣ୍ଟାଏ ପାଣି ଭିତରେ ପଶି ଟ୍ରାନ୍ସଫର୍ମର ପାଖରେ ପହଞ୍ଚି ତାହାର ପୁନରୁଦ୍ଧାର କରିଥିଲେ ତ ଆଉ କେଉଁଠାରେ ଜଙ୍ଗଲ ଭିତରକୁ ପଶି ବିଜୁଳି ଖୁଣ୍ଟ ସଜାଡିଥିଲେ ।

• ଜରୁରୀ ଫୋନ ନମ୍ବର ଜାରି କଲା TPSODL

ଟିପିଏସ୍ଓଡିଏଲର କ୍ଷେତ୍ରୀୟ ଟିମ୍ ଓ ପାଓ୍ୱାର ସିଷ୍ଟମ୍ କଣ୍ଟ୍ରୋଲ ସେଣ୍ଟର ବା ପି.ଏସ୍.ସି.ସି ଭୂମିକା ବନ୍ୟା ମୁକାବିଲାରେ ସବୁଠାରୁ ବଡ଼ ଅସ୍ତ୍ର ଭାବେ ଉଭା ହୋଇପାରିଛି । କଣ୍ଟ୍ରୋଲ ସେଣ୍ଟର କାରଣରୁ କେବଳ କ୍ଷେତ୍ରୀୟ ସମନ୍ୱୟ ସହଜ ହେବା ସହ କ୍ଷୟକ୍ଷତି ସୂଚନା ସଂଗ୍ରହ, ମରାମତି ଦଳ ନିୟୋଜନ ଓ ପୁନରୁଦ୍ଧାର କାର୍ଯ୍ୟର ପ୍ରଗତି ତ୍ୱରିତ ବେଗରେ ହୋଇପାରିଛି । ଏହାସହ ଟିପିଏସ୍ଓଡିଏଲ୍ ୭ ହଜାରରୁ ଊର୍ଦ୍ଧ୍ୱ କର୍ମଚାରୀ ଓ ୩୫୮ଟି ଗାଡ଼ି ଓ ପର୍ଯ୍ୟାପ୍ତ ପରିମାଣର ବିଦ୍ୟୁତ ସରଞ୍ଜାମ ଓ ଉପକରଣ ସହାୟତାରେ ବନ୍ୟା ସ୍ଥିତିର ମୁକାବିଲା କରିଛି । ଅନ୍ୟପକ୍ଷରେ ଟିପିଏସ୍ଓଡିଏଲ୍ ଉପଭୋକ୍ତାମାନଙ୍କୁ ବନ୍ୟା ସ୍ଥିତିରେ ସଚେତନ ଓ ସତର୍କ ରହିବାକୁ ପରାମର୍ଶ ଦେଉଛି । ବିଦ୍ୟୁତ ଭିତ୍ତିଭୂମିଠାରୁ ଦୂରତା ଅବଲମ୍ୱନ କରିବା ସହ କୌଣସି ପ୍ରକାର ଜରୁରୀକାଳୀନ ପରିସ୍ଥିତିରେ ଟିପିଏସ୍ଓଡିଏଲର ନିଃଶୁଳ୍କ ସହାୟତା ନମ୍ୱର ୧୮୦୦୨୦୨୬ କିମ୍ୱା ୧୯୧୨ରେ ଯୋଗାଯୋଗ କରିବାକୁ ନିବେଦନ କରାଯାଇଛି ।