Ganjam Flood Death / ଋଷିକୂଲ୍ୟାର ତାଣ୍ଡବ; ବନ୍ୟା ପାଣି ଦେଖିବାକୁ ଯାଇ ପାଣିରେ ବୁଡ଼ି ଯୁବକଙ୍କ ମୃତ୍ୟୁ

ଗଞ୍ଜାମ: ବାତ୍ୟା ପରେ ପ୍ରବଳ ବର୍ଷା ଯୋଗୁଁ ଜିଲ୍ଲାରେ ଋଷିକୂଲ୍ୟା ନଦୀର ତାଣ୍ଡବ । ପ୍ରଥମ ଜୀବନ ନେଲା ଗଞ୍ଜାମ ବନ୍ୟା । ସୋରଡ଼ା ବ୍ଲକ୍‌ରେ ବନ୍ୟା ପରିସ୍ଥିତି ଅତ୍ୟନ୍ତ ସଙ୍ଗୀନ ହୋଇପଡ଼ିଛି । ନୂଆଗଡ଼ ଗାଁରେ ୧୫ ଫୁଟ୍‌ର ବନ୍ୟାଜଳ ପ୍ରବାହିତ ହେଉଥିବାବେଳେ ବନ୍ୟା ପାଣିରେ ବୁଡ଼ି ଜଣେ ଯୁବକଙ୍କ ମୃତ୍ୟୁ ଘଟିଛି । ଯୁବକଙ୍କ ମୃତଦେହ ଏକ ଗଛରେ ଲାଗିଥିବାବେଳେ ଉଦ୍ଧାର କଲା ଅଗ୍ନିଶମ ବାହିନୀ । ଏହାପରେ ଯୁବକଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିବାବେଳେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି ।

• ବରାଡ଼ି ଗାଁର ଯୁବକ ମୃତ

ବରାଡ଼ି ଗ୍ରାମର ୩୬ ବର୍ଷୀୟ ପାଣ୍ଡା ନାୟକଙ୍କ ମୃତ୍ୟୁ ଘଟିଛି । ପାଣ୍ଡା ବରାଡି ନିକଟ ଡ୍ରାଫ୍‌କୁ ବନ୍ୟା ପାଣି ଦେଖିବାକୁ ଯାଇଥିବା ବେଳେ ହଠାତ୍ ପାଣି ଭିତରକୁ ଗଳି ପଡ଼ିଥିଲେ । ପାଣିର ପ୍ରଖର ସ୍ରୋତରେ ଭାସିଯାଇ ସେ ନିକଟରେ ଥିବା ଏକ ଗଛରେ ଲାଗି ରହିଥିଲେ । ସ୍ଥାନୀୟ ଲୋକଙ୍କଠାରୁ ଖବର ପାଇ ସୋରଡ଼ା ଅଗ୍ନିଶମ ବାହିନୀ ତୁରନ୍ତ ଘଟଣାସ୍ଥଳରେ ପହଞ୍ଚି ତାଙ୍କୁ ଉଦ୍ଧାର କରି ସୋରଡ଼ା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଆଣିଥିଲେ । ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି।

• ଉଦ୍ଧାର କାର୍ଯ୍ୟରେ ହେଲିକପ୍ଟର

ଅନ୍ୟପଟେ ଉଦ୍ଧାର କାର୍ଯ୍ୟରେ ନିୟୋଜିତ ହୋଇଛି କୋଷ୍ଟଗାର୍ଡର ହେଲିକପ୍ଟର । ଲୋକେ ଘରଛାତ ଉପରେ ଆଶ୍ରୟ ନେବାକୁ ବାଧ୍ୟ ହୋଇଛନ୍ତି । ବନ୍ୟା ବିପନ୍ନଙ୍କୁ ଉଦ୍ଧାର କରିବା ପାଇଁ ଯୁଦ୍ଧକାଳୀନ ଭିତ୍ତିରେ କାର୍ଯ୍ୟ ଆରମ୍ଭ ହୋଇଛି । ଉଦ୍ଧାର କାର୍ଯ୍ୟରେ କୋଷ୍ଟଗାର୍ଡର ହେଲିକପ୍ଟର ନିୟୋଜିତ କରାଯାଇଛି । ଜଗମୋହନ CHCରୁ ପୀଡ଼ିତଙ୍କୁ ହେଲିକପ୍ଟର ଜରିଆରେ ଉଦ୍ଧାର କରାଯାଇ ସୁରକ୍ଷିତ ଭାବେ ଧରାକୋଟ PHCକୁ ସ୍ଥାନାନ୍ତର କରାଯାଉଛି । ପାଣି ଘେରରେ ଫସି ରହିଥିବା ସିନ୍ଦୁରାପଲ୍ଲୀ, ମୁଣ୍ଡମରେଇ ଭଳି ଅନେକ ଗାଁରୁ ଲୋକଙ୍କୁ ଏୟାରଲିଫ୍ଟ କରାଯାଉଛି । ଗଞ୍ଜାମ ଜିଲ୍ଲା ପ୍ରଶାସନ ପକ୍ଷରୁ ବନ୍ୟା ପରିସ୍ଥିତି ଉପରେ କ୍ରମାଗତ ନଜର ରଖାଯାଇଛି। ପ୍ରଶାସନ ପକ୍ଷରୁ ସ୍ଥାନୀୟ ଲୋକଙ୍କୁ ନଦୀ କିମ୍ବା ବନ୍ୟା ପାଣି ନିକଟକୁ ନଯିବା ପାଇଁ ସାବଧାନ କରାଯାଇଛି ।

ପଢନ୍ତୁ ଏହି ଖବର: ରାସ୍ତା ଉପରେ ୮ ଫୁଟ୍‌ର ପାଣି; ବନ୍ୟାଜଳରେ ଉବୁଟୁବୁ ଆସିକା, ଘୋଡ଼ାହାଡ଼ ବ୍ରିଜ

• ଭଞ୍ଜନଗରରେ ଭୟାବହ ସ୍ଥିତି

ଭଞ୍ଜନଗର ନିକଟସ୍ଥ ଢୁଢୁଆ ଗାଁରେ ବନ୍ୟାଜଳ ପ୍ରବେଶ କରିବା ଯୋଗୁଁ ପୂରା ଗାଁ ଜଳବନ୍ଦୀ ହୋଇପଡ଼ିଛି । ଲୋକଙ୍କ ଘର ଭିତରେ ଆଣ୍ଠୁଏ ଆଣ୍ଠୁଏ ପାଣି ଜମିରହିଥିବାରୁ ସେମାନେ ଜୀବନ ବିକଳରେ ଘର ଛାତ ଉପରେ ଆଶ୍ରୟ ନେଇଛନ୍ତି । ତେବେ କିଛି ଲୋକ ଗାଁରୁ ବାହାରକୁ ଆସିବାକୁ ପ୍ରୟାସ କରୁଥିବା ବେଳେ ବାଟରେ ଏକ କୋଠଘରେ ବନ୍ୟାଜଳରେ ଘେରି ହୋଇ ଜଳବନ୍ଦୀ ହୋଇରହିଥିଲେ । ଖବର ପାଇ ଘଟଣାସ୍ଥଳରେ ଓଡ୍ରାଫ୍ ଟିମ୍ ପହଞ୍ଚି ସେମାନଙ୍କୁ ସୁରକ୍ଷିତ ଭାବେ ଉଦ୍ଧାର କରିଛି । ଅଗ୍ନିଶମ ବାହିନୀ ପକ୍ଷରୁ ୧୦ଜଣଙ୍କୁ ଉଦ୍ଧାର କରାଯାଇଥିବା ଚିତ୍ର ମଧ୍ୟ ସାମ୍ନାକୁ ଆସିଛି । ପ୍ରଖର ସୁଅକୁ ଖାତିର ନକରି ଉଦ୍ଧାର ଅଭିଯାନ ଚଳାଇଛନ୍ତି ଅଗ୍ନିଶମ ବାହିନୀ ।