School Closed / ବନ୍ୟା ବିଭୀଷିକାରେ ବେହାଲ୍ ଶିକ୍ଷା ବ୍ୟବସ୍ଥା; ସୁଧୁରୁନି ସ୍କୁଲ୍‌-କଲେଜ୍ ସ୍ଥିତି

ଗଞ୍ଜାମ: ଜିଲ୍ଲାରେ ବନ୍ୟା ପ୍ରଳୟ ଭିତରେ ଭାଙ୍ଗିପଡ଼ିଛି ଶିକ୍ଷା ବ୍ୟବସ୍ଥା । ଜିଲ୍ଲାର ମୋଟ ୪୯୮ଟି ବିଦ୍ୟାଳୟର ସ୍ଥିତି ଅତି ସାଂଘାତିକ । ପ୍ରାଥମିକ ଆକଳନ ଅନୁଯାୟୀ, ୧୦୩୨ଟି ଶ୍ରେଣୀଗୃହ ଏବଂ ୨୧୫ଟି ବିଦ୍ୟାଳୟର ପାଚେରି କ୍ଷତିଗ୍ରସ୍ତ ହୋଇଛି । ବନ୍ୟା ଛାଡ଼ିବାର ୧୦ ଦିନ ପରେ ବି ସ୍କୁଲଗୁଡ଼ିକ କାଦୁଅ ପଚପଚ । କେଉଁଠି ଫାଟିଯାଇଛି ଶ୍ରେଣୀଗୃହର କାନ୍ଥ ତ ଆଉ କେଉଁଠି ପାଣିରେ ଭାସିଯାଇଛି ମୂଲ୍ୟବାନ ରେକର୍ଡ, ବହିଖାତା ଓ ଆସବାବପତ୍ର । ଆସିକାରୁ ସୋରଡ଼ା, ଶେରଗଡ଼ରୁ ପୁରୁଷୋତ୍ତମପୁର, ସବୁଠି ସମାନ କରୁଣ ଚିତ୍ର । ବର୍ତ୍ତମାନ ସ୍ଥିତିକୁ ସୁଧାରିବା ପାଇଁ ଶିକ୍ଷକମାନେ ନିଜେ ସ୍କୁଲ ପରିସର ସଫା କରିବାରେ ଲାଗିପଡ଼ିଛନ୍ତି ।

• ଦୀପାବଳି ଯାଏଁ ସ୍କୁଲ ଛୁଟି

କେବଳ ସ୍କୁଲ ନୁହେଁ, ଜିଲ୍ଲାର କିଛି କଲେଜ ମଧ୍ୟ ବ୍ୟାପକ କ୍ଷତିଗ୍ରସ୍ତ ହୋଇଛି। ପୁରୁଷୋତ୍ତମପୁର ତାରାତାରିଣୀ କଲେଜ ହେଉ ଅବା ସୋରଡ଼ାର ବିଭିନ୍ନ କଲେଜ, ସବୁଠି ବନ୍ୟା ପାଣି ତାଣ୍ଡବ ରଚିଛି । ଏସବୁ ସ୍ଥିତିକୁ ଦୃଷ୍ଟିରେ ରଖି ଆଗାମୀ ଦୀପାବଳି ପର୍ଯ୍ୟନ୍ତ ସ୍କୁଲଗୁଡ଼ିକୁ ଛୁଟି ଘୋଷଣା କରିଛନ୍ତି ଗଞ୍ଜାମ ଜିଲ୍ଲା ପ୍ରଶାସନ। ତେବେ ଅସୁରକ୍ଷିତ ହୋଇପଡ଼ିଥିବା କୋଠା ଓ ସଫେଇ କାର୍ଯ୍ୟ ପାଇଁ ପ୍ରଶାସନ ଆଗକୁ କି ପଦକ୍ଷେପ ନେଉଛି, ତାହା ଦେଖିବାକୁ ବାକି ରହିଲା ।

• "ଖୁବଶୀଘ୍ର ସମସ୍ୟାର ସମାଧାନ"

ଅନ୍ୟପଟେ ଗାଁ ଗାଁରେ ପାଣି ପଶିବା ଦ୍ୱାରା ଛାତ୍ରଛାତ୍ରୀଙ୍କ ବହିଖାତା ନଷ୍ଟ ହୋଇଯାଇଥିବାରୁ, ପିଲାଙ୍କୁ ତୁରନ୍ତ ବହି ଯୋଗାଇଦେବା ସହ ସମସ୍ତ ସମସ୍ୟାର ସମାଧାନ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ । କୋମଳମତି ଶିକ୍ଷାର୍ଥୀଙ୍କ ଭବିଷ୍ୟତକୁ ଆଖି ଆଗରେ ରଖି ଯୁଦ୍ଧକାଳୀନ ଭିତ୍ତିରେ ଏହି ସ୍କୁଲଗୁଡ଼ିକର ମରାମତି ଏବଂ ସଫେଇ କାର୍ଯ୍ୟ ଶେଷ କରି ପୁଣି ଥରେ କାର୍ଯ୍ୟକ୍ଷମ କରିବା ଏବେ ପ୍ରଶାସନ ପାଇଁ ସବୁଠାରୁ ବଡ଼ ଆହ୍ୱାନ ।

ପଢନ୍ତୁ ଏହି ଖବର: ASO ପଦରେ ଭର୍ତ୍ତି ପାଇଁ ଆସିଲା ବିଜ୍ଞପ୍ତି; ଜାଣନ୍ତୁ ଆବେଦନର ସମସ୍ତ ତଥ୍ୟ

• ଗଞ୍ଜାମରେ କେମିତି ହେଲା ବନ୍ୟା ?

ଗଞ୍ଜାମ ଜିଲ୍ଲାରେ ଏହି ଭୟଙ୍କର ବନ୍ୟା ଭୀଷଣ ବାତ୍ୟା 'ଅର୍ଣ୍ଣବ' ଏବଂ ଏହାର ପ୍ରଭାବରେ ହୋଇଥିବା ପ୍ରବଳ ବର୍ଷା ଯୋଗୁଁ ଆସିଥିଲା । ବିଶେଷ କରି ଋଷିକୁଲ୍ୟା ଓ ଘୋଡ଼ାହାଡ଼ ନଦୀର ଜଳସ୍ତର ହଠାତ୍ ବିପଦ ସଙ୍କେତ ଉପରକୁ ଚାଲିଯିବାରୁ ସମଗ୍ର ଜିଲ୍ଲାରେ ଏକ ବଡ଼ ଜଳପ୍ରଳୟ ସୃଷ୍ଟି ହୋଇଥିଲା, ଯାହା ଗଞ୍ଜାମ ଜିଲ୍ଲାରେ ବିଗତ ୩୬ ବର୍ଷର ସବୁଠାରୁ ବଡ଼ ବନ୍ୟା ବୋଲି କୁହାଯାଉଛି । ଜିଲ୍ଲାର ହିଞ୍ଜିଳିକାଟୁ, ଶେରଗଡ଼, ସୋରଡ଼ା ଏବଂ ଭଞ୍ଜନଗର ଭଳି ବ୍ଲକଗୁଡ଼ିକ ସବୁଠାରୁ ଅଧିକ ପ୍ରଭାବିତ ହୋଇଥିଲେ । ପ୍ରାୟ ୩୦୦ରୁ ଅଧିକ ଗ୍ରାମ ଜଳବନ୍ଦୀ ହୋଇ ରହିଥିଲେ ।