Kotia Andhra Poll / କୋଟିଆ ବିବାଦ; ଆନ୍ଧ୍ର ନିର୍ବାଚନ ବନ୍ଦ ପାଇଁ କେନ୍ଦ୍ର ସରକାରଙ୍କ ହସ୍ତକ୍ଷେପ ଲୋଡ଼ିଲେ ଆଇନଜୀବୀ

ଭୁବନେଶ୍ୱର/କୋରାପୁଟ: ଓଡ଼ିଶାର କିଛି ଆଦିବାସୀ ସୀମାନ୍ତ ଅଞ୍ଚଳରେ ଆନ୍ଧ୍ରପ୍ରଦେଶ ପକ୍ଷରୁ ପଞ୍ଚାୟତ ନିର୍ବାଚନକୁ ନେଇ ପୁଣି ତେଜିଲା ବିବାଦ । ଆସନ୍ତା ନଭେମ୍ବର ୫ ତାରିଖରେ କୋଟିଆ, ମାଲକାନଗିରିର ଚିତ୍ରକୋଣ୍ଡା ସୀମାନ୍ତ ଏବଂ ଗଜପତି ଜିଲ୍ଲାର ଗଙ୍ଗାବାଡ଼ ଅଞ୍ଚଳରେ ଆନ୍ଧ୍ର ପକ୍ଷରୁ ନିର୍ବାଚନୀ ପ୍ରକ୍ରିୟା ଚଳାଇବାକୁ ନେଇ ଆପତ୍ତି ଉଠାଇଛନ୍ତି ଓଡ଼ିଆ ଆଇନଜୀବୀ ତଥା ମାନବାଧିକାର କର୍ମୀ ଅନୁପ କୁମାର ପାତ୍ର।

ଏନେଇ ସେ କେନ୍ଦ୍ର ଗୃହ ସଚିବ ଗୋବିନ୍ଦ ମୋହନଙ୍କୁ ଏକ ଜରୁରୀ ପତ୍ର ଲେଖିଛନ୍ତି । ରାଷ୍ଟ୍ରପତିଙ୍କ ସଚିବାଳୟ ପକ୍ଷରୁ ଅକ୍ଟୋବର ୨୭ ତାରିଖରେ ହୋଇଥିବା ନିର୍ଦ୍ଦେଶର ଉଲ୍ଲେଖ କରି ଏହି ମାମଲାରେ ତୁରନ୍ତ କେନ୍ଦ୍ର ସରକାରଙ୍କ ହସ୍ତକ୍ଷେପ ପାଇଁ ସେ ଦାବି କରିଛନ୍ତି । ଆବେଦନକାରୀଙ୍କ ଅଭିଯୋଗ ଅନୁଯାୟୀ, ଓଡ଼ିଶାର ସୀମାନ୍ତ ଅଞ୍ଚଳରେ ଆନ୍ଧ୍ର ପ୍ରଶାସନିକ ଅଧିକାରୀମାନେ ନିର୍ବାଚନୀ ପ୍ରଚାର ଓ ଅନ୍ୟାନ୍ୟ କାର୍ଯ୍ୟକଳାପ ଚଳାଇଛନ୍ତି । ଏହାଦ୍ୱାରା ଓଡ଼ିଶାର ସାର୍ବଭୌମତ୍ୱ, ଆଦିବାସୀଙ୍କ ଅଧିକାର ଏବଂ ସାମ୍ବିଧାନିକ ବ୍ୟବସ୍ଥା ପ୍ରତି ପ୍ରଶ୍ନ ଉଠୁଥିବା ସେ ନିଜ ପତ୍ରରେ ଦର୍ଶାଇଛନ୍ତି ।

• କୋଟିଆକୁ ନେଇ ଉଠିଲା ଖଣିଜ ସମ୍ପଦ ପ୍ରସଙ୍ଗ

ଆବେଦନରେ କୋଟିଆ ଗ୍ରାମପଞ୍ଚାୟତର ଖଣିଜ ସମ୍ପଦକୁ ନେଇ ମଧ୍ୟ ଗୁରୁତର ଅଭିଯୋଗ ରହିଛି । ସ୍ଥାନୀୟ ତଦନ୍ତକାରୀ ଓ ଭୂବୈଜ୍ଞାନିକ ସର୍ଭେ ରିପୋର୍ଟ ଅନୁସାରେ ହରମାଣ୍ଡାଙ୍ଗି, ତେଲାସେମ୍ବି, ମୁଥାକାସେମ୍ବି, ପଟାଙ୍ଗୀ ଓ ସେମିଲିଗୁଡ଼ା ପାହାଡ଼ିଆ ଅଞ୍ଚଳରେ ବିପୁଳ ପରିମାଣରେ ବକ୍ସାଇଟ୍, ମାଙ୍ଗାନିଜ୍ ଓ ଲାଟେରାଇଟ୍‌ ଭଳି ଖଣିଜ ସମ୍ପଦ ରହିଥିବା ଦାବି କରାଯାଇଛି । ଏହି ଖଣିଜ ସମ୍ପଦ ଉପରେ ନିୟନ୍ତ୍ରଣ ହାସଲ କରିବା ଲକ୍ଷ୍ୟରେ ଆନ୍ଧ୍ରର ପ୍ରଶାସନିକ ହସ୍ତକ୍ଷେପ ବଢୁଥିବା ଆବେଦନକାରୀ ଅଭିଯୋଗ କରିଛନ୍ତି । ତେବେ ଏହି ଅଭିଯୋଗଗୁଡ଼ିକର ସ୍ୱତନ୍ତ୍ର ସତ୍ୟତା ଯାଞ୍ଚ ହେବା ଆବଶ୍ୟକ ।

• ଚିତ୍ରକୋଣ୍ଡା ଓ ଝୁମଡାଙ୍ଗରେ ଆନ୍ଧ୍ରର ହସ୍ତକ୍ଷେପ ଅଭିଯୋଗ

ମାଲକାନଗିରି ଜିଲ୍ଲାର ସ୍ଵାଭିମାନ ଅଞ୍ଚଳ ଚିତ୍ରକୋଣ୍ଡା ବ୍ଲକ୍‌ ଅନ୍ତର୍ଗତ ଧୂଳିପୁଟ ପଞ୍ଚାୟତର ଜୁମଡାଙ୍ଗ ଗ୍ରାମରେ ଆନ୍ଧ୍ର ପ୍ରଶାସନିକ କର୍ମଚାରୀମାନେ ନଭେମ୍ବର ୬ ପଞ୍ଚାୟତ ନିର୍ବାଚ ଲାଗି ଜୋରଦାର ପ୍ରଚାର କରୁଥିବା ଅଭିଯୋଗ ହୋଇଛି । ଏପରିକି ଆଦିବାସୀ ପରିବାରର ଦ୍ଵୈତ ଭୋଟର ପରିଚୟ ପତ୍ର ତିଆରି କରିବା ସହ ଆନ୍ଧ୍ର ସରକାରଙ୍କ ବିଭିନ୍ନ ଜନହିତକର ଯୋଜନାର ପ୍ରଲୋଭନ ଦେଖାଇ ନିର୍ବାଚନୀ ପ୍ରଭାବ ବିସ୍ତାର କରାଯାଉଥିବା ଦାବି କରିଛନ୍ତି ଆବେଦନକାରୀ । ଏହାଦ୍ଵାରା ଓଡ଼ିଆ ଭାଷା ଓ ସ୍ଥାନୀୟ ସାଂସ୍କୃତିକ ପରିଚୟ ଉପରେ ମଧ୍ୟ ପ୍ରଭାବ ପଡୁଥିବା ଅଭିଯୋଗ ହୋଇଛି ।

• ରାଇପାହାଡ଼ରେ ଦ୍ୱୈତ ଭୋଟର ପରିଚୟକୁ ନେଇ ଚିନ୍ତା

କୋରାପୁଟ ଜିଲ୍ଲାର ସଦର ବ୍ଲକ୍‌ ଅନ୍ତର୍ଗତ ରାଇପାହାଡ଼ ଗ୍ରାମରେ ମଧ୍ୟ ସୀମାପାର ନିର୍ବାଚନୀ ହସ୍ତକ୍ଷେପ ଅଭିଯୋଗ ଆଣିଛନ୍ତି ଆଇନଜୀବୀ । କେତେକ ଭୋଟରଙ୍କ ପାଖରେ ଉଭୟ ରାଜ୍ୟର ଭୋଟର ପରିଚୟପତ୍ର ଥିବା ଏବଂ ଏହାର ଅପବ୍ୟବହାର ହେବାର ଆଶଙ୍କା ରହିଥିବା ସେ ଦର୍ଶାଇଛନ୍ତି । ଏହାସହ ରାଇପାହାଡ଼ ଓ ଡୁମୁରିଗୁଡ଼ା ଅଞ୍ଚଳରେ ଭିତ୍ତିଭୂମି ଓ ପରିବେଶ ସମ୍ପର୍କିତ କେତେକ ସମସ୍ୟା ମଧ୍ୟ ଆବେଦନରେ ଉଲ୍ଲେଖ କରାଯାଇଛି ।

• ଗଜପତିର ଗଙ୍ଗାବାଡ଼ରେ ୬ଟି ଗାଁକୁ ନେଇ ଉଦ୍‌ବେଗ

ଗଜପତି ଜିଲ୍ଲାର ରାୟଗଡ଼ା ବ୍ଲକ୍‌ ଅନ୍ତର୍ଗତ ଗଙ୍ଗାବାଡ଼ ପଞ୍ଚାୟତର ୨୪ଟି ଗାଁ ଓ ପ୍ରାୟ ୧୩୦୦ରୁ ଅଧିକ ଭୋଟରଙ୍କୁ ନେଇ ମଧ୍ୟ ଆବେଦନରେ ଚିନ୍ତା ପ୍ରକାଶ କରାଯାଇଛି । ମାନିପଟଣା, ଗୁଡ଼ିଖୁଡ଼ି, ମଧୁଆଖୋଳ, ଅମରିଙ୍ଗି, ଅଖାଡ଼ା ଓ ବୁରୁସିଂ ଭଳି ସୀମାନ୍ତ ଗ୍ରାମରେ ଆନ୍ଧ୍ର ପକ୍ଷରୁ ନିର୍ବାଚନୀ ପ୍ରଚାର ଚାଲିଥିବା ଅଭିଯୋଗ ହୋଇଛି । ଏଠାରେ ପ୍ରତି ଗାଁରେ ୧୦୦ରୁ ଅଧିକ ଭୋଟରଙ୍କ ଆନ୍ଧ୍ର ଭୋଟର ଭାବେ ଭୋଟର ପରିଚୟପତ୍ର ତିଆରି କରାଯାଇଛି । ଯାହାର ଅପବ୍ୟବହାର ହେବା ନେଇ ଆଇନଜୀବୀ ଚିନ୍ତା ପ୍ରକଟ କରିଛନ୍ତି ।

• କେନ୍ଦ୍ର ଗୃହ ମନ୍ତ୍ରଣାଳୟ ନିକଟରେ ୫ ଦଫା ଦାବି

ଏହି ସମସ୍ୟାର ସମାଧାନ ପାଇଁ ଆଇନଜୀବୀ ଅନୁପ କୁମାର ପାତ୍ର କେନ୍ଦ୍ର ଗୃହ ମନ୍ତ୍ରଣାଳୟ ନିକଟରେ ୫ ଦଫା ଦାବି ରଖିଛନ୍ତି ।
୧. କୋଟିଆର ବିବାଦୀୟ ୨୧ଟି ଗ୍ରାମ ସମେତ ମାଲକାନଗିରିର ଝୁମଡାଙ୍ଗ ଏବଂ ଗଜପତିର ସୀମାନ୍ତ ଗ୍ରାମ ଗଙ୍ଗାବାଡ଼ରେ ନଭେମ୍ବର ୫ ତାରିଖରେ ହେବାକୁ ଥିବା ଆନ୍ଧ୍ରର ପଞ୍ଚାୟତ ନିର୍ବାଚନ ଓ ପ୍ରଚାର କାର୍ଯ୍ୟକୁ ତୁରନ୍ତ ବନ୍ଦ କରାଯାଉ ।
୨. କୋରାପୁଟ, ମାଲକାନଗିରି ଓ ଗଜପତିର ସମ୍ବେଦନଶୀଳ ସୀମାନ୍ତ ଗ୍ରାମଗୁଡ଼ିକରେ କେନ୍ଦ୍ରୀୟ ପର୍ଯ୍ୟବେକ୍ଷକ ଓ ଆବଶ୍ୟକ ସୁରକ୍ଷା ବାହିନୀ ମୁତୟନ କରାଯାଉ ।
୩. ଏହି ସୀମାନ୍ତ ଅଞ୍ଚଳଗୁଡ଼ିକରେ ଡାକଘର, ପ୍ରଶାସନିକ କାର୍ଯ୍ୟାଳୟ ଓ ଯୋଗାଯୋଗ ବ୍ୟବସ୍ଥାକୁ ପୁନଃସ୍ଥାପନ କରାଯାଉ।
୪. ଓଡ଼ିଶା ଓ ଆନ୍ଧ୍ରପ୍ରଦେଶ ସରକାରଙ୍କ ମଧ୍ୟରେ କେନ୍ଦ୍ର ଗୃହ ମନ୍ତ୍ରଣାଳୟର ତତ୍ତ୍ୱାବଧାନରେ ତ୍ରିପାକ୍ଷିକ ଆଲୋଚନା କରାଯାଉ ।
୫. ରାଷ୍ଟ୍ରପତିଙ୍କ ସଚିବାଳୟର ନିର୍ଦ୍ଦେଶ ଅନୁଯାୟୀ ନିଆଯାଇଥିବା ପଦକ୍ଷେପ ସମ୍ପର୍କରେ ଆବେଦନକାରୀଙ୍କୁ ସିଧାସଳଖ ଅବଗତ କରାଯାଉ।

ପଢନ୍ତୁ ଏହି ଖବର: କୋଟିଆ ସୀମା ବିବାଦ: ଆଇନଜୀବୀଙ୍କ ଆବେଦନ ଉପରେ ଗୃହ ମନ୍ତ୍ରଣାଳୟକୁ ରିପୋର୍ଟ ମାଗିଲା ରାଷ୍ଟ୍ରପତିଙ୍କ ସଚିବାଳୟ

ଓଡ଼ିଆ ଆଇନଜୀବୀ ଅରୁପ କୁମାର ପାତ୍ରଙ୍କ ଦ୍ଵାରା ଓଡ଼ିଶା-ଆନ୍ଧ୍ର ସୀମା ବିବାଦର ସ୍ଥାୟୀ ସମାଧାନ ଓ ଆଦିବାସୀଙ୍କ ସାମ୍ବିଧାନିକ ଅଧିକାରର ସୁରକ୍ଷା ଦାବି କରି ଏହି ଆବେଦନ ଦାଖଲ କରାଯାଇଛି । ଏବେ ନଭେମ୍ବର ୫ ତାରିଖର ନିର୍ବାଚନକୁ ନେଇ କେନ୍ଦ୍ର ଗୃହ ମନ୍ତ୍ରଣାଳୟ କି ପଦକ୍ଷେପ ନେଉଛନ୍ତି, ତାହା ଉପରେ ସମସ୍ତଙ୍କ ନଜର ।