କଣ୍ଠଶିଳ୍ପୀ ହ୍ୟୁମାନ ସାଗରଙ୍କ ମୃତ୍ୟୁ ଘଟଣା । ବଢିଲା ମ୍ୟାନେଜର ଦିନେଶ ବେହେରାଙ୍କ ପାଇଁ ଅଢୁଆ । ଦିନେଶଙ୍କ ନାଁରେ ପୁଣି ଥାନାରେ ଏତଲା ଦାୟର କରାଯାଇଛି । କଟକ ମହିଳା ଥାନାରେ ଷ୍ଟେଟ ହ୍ୟୁମାନ୍‌ ରାଇଟ୍ସ କାଉନସିଲ ପକ୍ଷରୁ ଏହି ଏତଲା ଦିଆଯାଇଛି । ହ୍ୟୁମାନଙ୍କ ମାଆଙ୍କୁ ଦିନେଶ ଅସଭ୍ୟ ଭାଷାରେ ଗାଳିଗୁଲଜ କରିବା ଅଭିଯୋଗରେ ଏହି ଏତଲା ଦିଆଯାଇଛି ।

ସୂଚନା ଅନୁସାରେ କଣ୍ଠଶିଳ୍ପୀ ହ୍ୟୁମାନ ସାଗରଙ୍କ ମୃତ୍ୟୁ ପରେ ତାଙ୍କ ମାଆଙ୍କୁ ଦିନେଶ ଅସଭ୍ୟ ଭାଷାରେ ଗାଳିଗୁଲଜ କରିଥିଲା । ଯାହାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା । ତାଙ୍କ ବିରୋଧରେ ଆଇନଗତ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ଦାବି କରିଛନ୍ତି ଷ୍ଟେଟ ହ୍ୟୁମାନ୍‌ ରାଇଟ୍ସ କାଉନସିଲ ସଦସ୍ୟ ।

ଅଧିକ ପଢ଼ନ୍ତୁ: 'କେବଳ ସୁଭଦ୍ରା ପାଇଁ ୧୩ କୋଟି ୮ ଲକ୍ଷ ଖର୍ଚ୍ଚ କରିଛନ୍ତି ରାଜ୍ୟ ସରକାର'

ତେବେ ଏହା ପୂର୍ବରୁ ମଧ୍ୟ ହ୍ୟୁମାନଙ୍କ ୨ ମ୍ୟାନେଜରଙ୍କ ନାଁରେ ଥାନାରେ ଏତଲା ଦିଆଯାଇଛି । ବଲାଙ୍ଗୀର ଟାଉନ ଥାନାରେ ହ୍ୟୁମାନଙ୍କ ଦୁଇ ମ୍ୟାନେଜର ପ୍ରଶାନ୍ତ ବେହେରା ଓ ଦିନେଶ ବେହେରା ନାମରେ FIR ହୋଇଛି । କୋଶଲ ମୁକ୍ତି ମୋର୍ଚ୍ଚା ତରଫରୁ ବଲାଙ୍ଗୀର ଟାଉନ ଥାନାରେ ଏତଲା ଦିଆଯାଇଛି । ଏହା ସହ ହ୍ୟୁମାନ ସାଗରଙ୍କ ମା'ଙ୍କୁ ଦୁର୍ବ୍ୟବହାର ନେଇ ମଧ୍ୟ ମାମଲା ହୋଇଛି । ଦେହ ଖରାପ ସତ୍ତ୍ବେ ହ୍ୟୁମାନଙ୍କ ବିଭିନ୍ନ ଷ୍ଟେଜ ଶୋ' କରାଉଥିଲେ । ଯାହା ତାଙ୍କ ମୃତ୍ୟୁର କାରଣ ବୋଲି ଏତଲାରେ ଉଲ୍ଲେଖ କରାଯାଇଛି ।

ସୂଚନା ଅନୁସାରେ, ହ୍ୟୁମାନ ସାଗରଙ୍କ ମୃତ୍ୟୁ ପାଇଁ ଏକାଧିକ ଜଣଙ୍କୁ ଦାୟୀ କରିଥିଲେ ତାଙ୍କ ମାଆ । ଏମିତିକି ହ୍ୟୁମାନ ଅସୁସ୍ଥ ଥିବାବେଳେ ତାଙ୍କୁ ନେଇ ଷ୍ଟେଜ୍ ଶୋ' କରାଯାଉଥିଲା ବୋଲି କହିଥିଲେ। ସେହିପରି ହ୍ୟୁମାନଙ୍କ ମାଆ ଆହୁରି କହିଥିଲେ, ହ୍ୟୁମାନଙ୍କୁ ଧୋକା ଦିଆ ଯାଇଛି । ମୋ ପୁଅକୁ ମାରି ଦିଆଯାଇଛି । ୨ରୁ ୩ ମାସ ହେଲା ପୁଅ ଆସୁନଥିଲା, ସେ ମାନସିକ ଅବସାଦ (ଡିପ୍ରେସନ୍‌)ରେ ଥିଲା ।"

ହ୍ୟୁମାନଙ୍କ ସ୍ଵାସ୍ଥ୍ୟ ବିଗିଡ଼ିବା ଓ ମୃତ୍ୟୁକୁ ନେଇ ତାଙ୍କ ମ୍ୟାନେଜର ଓ ଷ୍ଟେଜ୍ ଶୋ' ଆୟୋଜକଙ୍କୁ ଦାୟୀ କରିଛନ୍ତି ତାଙ୍କ ମାଆ । ଏସବୁ ପାଇଁ ପପୁ, ପ୍ରଶାନ୍ତ ଓ ଜଣେ ମହିଳା କଣ୍ଠଶିଳ୍ପୀଙ୍କୁ ଖୋଲାଖୋଲି ଭାବେ ଦୋଷ ଦେଇଥିଲେ ହ୍ୟୁମାନଙ୍କ ମାଆ ।

ଅନ୍ୟପଟେ ଚାଞ୍ଚଲ୍ୟକର ବୟାନ ଦେଇଛନ୍ତି ହ୍ୟୁମାନଙ୍କ ଚିକିତ୍ସା କରୁଥିବା ଡାକ୍ତର ସଞ୍ଜୀବ କର । ଡାକ୍ତର କର କହିଛନ୍ତି, "ମାସେରୁ ଅଧିକ ସମୟ ଧରି ହ୍ୟୁମାନଙ୍କ ଅବସ୍ଥା ଷ୍ଟେବୁଲ୍ ନଥିଲା । ସେ ମଦ ପିଉଥିଲେ । ୨୦୨୪ରୁ ସେ ଅସୁସ୍ଥ ଥିବାବେଳେ ଅବସ୍ଥା ଷ୍ଟେବୁଲ୍ ଥିଲା । ମାସେ ଭିତରେ ତାଙ୍କ ସ୍ଵାସ୍ଥ୍ୟାବସ୍ଥା ଅବନତି ହେବା ସହ ଜ୍ଵର ହେବା ସହ ଧଇଁସଇଁ ହେଉଥିଲେ ।" କେବଳ ସେତିକି ନୁହେଁ, ନିମୋନିଆ, ହାର୍ଟ ଫେଲ୍ୟୁଅର, ଲିଭର ଖରାପ ଆଦି ପାଇଁ ହ୍ୟୁମାନଙ୍କ ମୃତ୍ୟୁ ହୋଇଛି ।

ଡାକ୍ତର ସଞ୍ଜୀବ କର କହିଛନ୍ତି, "ମାସେ ହେଲା ସେ ଅଧିକ ଅସୁସ୍ଥ ଥିଲେ । ବିଶ୍ରାମ ଆବଶ୍ୟକତା ଥିଲା । କିନ୍ତୁ ସେ ବିଶ୍ରାମ ନେଉ ନଥିଲେ । ଷ୍ଟେଜ୍ ଶୋ' କରିବା ଲାଗି ମଧ୍ୟ ବାରଣ କରିଥିଲି । ସେ ଅତ୍ୟଧିକ ମଦ ପିଉଥିବାରୁ ସଙ୍ଗୀତକୁ ନେଇ ଅଥୟ ଥିଲେ । ପରାମର୍ଶ ଦେବା ସତ୍ତ୍ଵେ ସେ ଶୁଣୁନଥିଲେ ।"