ଅର୍ଗସ ବ୍ୟୁରୋ : ଗୁଲୁଗୁଲା ନେଲା ଜୀବନ, ଚ୍ୟାଲେଞ୍ଜ ହେଲା କାଳ । ଚ୍ୟାଲେଞ୍ଜରେ ଗୁଲୁଗୁଲା ଖାଉଖାଉ ତଣ୍ଟିରେ ଲାଗିଯିବାରୁ ଅଣନିଶ୍ୱାସୀ ହୋଇ ଚାଲିଗଲା ଜଣେ ବ୍ୟକ୍ତିଙ୍କର ଜୀବନ। ଏଭଳି ଏକ ଅଭାବନୀୟ ଓ ଚାଞ୍ଚଲ୍ୟକର ଘଟଣା ସମଗ୍ର ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି । ସାମାନ୍ୟ ଗୁଲୁଗୁଲା ଯେ କେବେ କାହାର ଜୀବନ ନେଇପାରେ ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।

ଅଧିକ ପଢନ୍ତୁ ଓଡ଼ିଶା ଖବର

ଏଭଳିଏକ ଅଭାବନୀୟ ଘଟଣା ଘଟିଛି ମୟୂରଭଞ୍ଜ ଜିଲ୍ଲା ବେତନଟୀ ଥାନା ବଡ଼ଜାମବଣି ଫାଣ୍ଡି ଅଧୀନ ଦାନ୍ତିଆମୁହାଁ ଗାଁରେ l ମୃତକ ଜଣକ ହେଉଛନ୍ତି ଗ୍ରାମର ଶିରୀଶଚନ୍ଦ୍ର ମହାନାୟକ । ଘଟଣା ମୁତାବକ ଗତ ୫ ତାରିଖ ରବିବାର ଦିନ ଦାନ୍ତିଆମୁହାଁ ସପ୍ତାହିକ ହାଟରେ ଏକ ଜଳଖିଆ ଦୋକାନକୁ ଶିରୀଶ ଯାଇଥିଲେ l ଏବଂ ତାଙ୍କର କିଛି ସାଙ୍ଗ ସାଥି ମାନଙ୍କ ସହ ଚ୍ୟାଲେଞ୍ଜରେ ଥରକେ ଚାରିଗୋଟି ଗୁଲୁଗୁଲା ଏବଂ ଗୋଟିଏ ମାଲପୁଆ ଏକସଙ୍ଗେ ପାଟିରେ ପୁରାଇ ଖାଇବାକୁ ଚେଷ୍ଟା କରିଥିଲେ ।

ଏକାଥରକେ ପାଟିରେ ଏତେ ଗୁଡ଼ାଏ ଖାଦ୍ୟ ପୁରାଇଦେବ କାରଣରୁ ଏହା ଶିରିଶଙ୍କ ତଣ୍ଟିରେ ଅଟକିଯାଇଥିଲା । ଫଳରେ ଅଣନିଶ୍ୱାସୀ ହୋଇ ହଠାତ୍ ପାଣି ମାଗିଥିଲେ ହେଲେ ପାଣି ତାଙ୍କ ତଣ୍ଟିରେ ପାର ନହୋଇ ନାକ ଦେଇ ବାହାରିଯାଇଥିଲା । ଏବଂ ସେ ଛଟପଟ ହୋଇ ତଳେ ପଡିଯାଇଥିଲେ ।

ଏନେଇ ଗତ ସୋମବାର ମୃତକଙ୍କ ପରିବାରଲୋକଙ୍କ ଏତଲାକ୍ରମେ ବଡଜାମବଣି ଫାଣ୍ଡି ଅଧିକାରୀ ଏଏସଆଇ ଲମ୍ବୋଦର ମହାନ୍ତ ୬୯ ନମ୍ବରରେ ଏକ ଅପମୃତ୍ୟୁ ମାମଲା ରୁଜୁକରିବା ସହିତ ଘଟଣାର ତଦନ୍ତ ଜାରି ରଖିଛନ୍ତି l ତେବେ ଶିରିଶଙ୍କ ମୃତ୍ୟୁ ପରେ ଭାଙ୍ଗିପଡିଛି ପୁରା ପରିବାର। ଜୀବନ ବଞ୍ଚାଇବା ପାଇଁ ଖାଦ୍ୟର ନିତ୍ୟାନ୍ତ ଆବଶ୍ୟକତା ରହିଥିବା ବେଳେ, ସେହି ଖାଦ୍ୟ ଯେ ଜୀବନ ନେଇପାରେ ତାହା କିଏ କହି ପାରିବ ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV