Census 2027 Questions / ଜନଗଣନା ୨୦୨୭: ଦେବାକୁ ପଡ଼ିବ ୪୦ ପ୍ରଶ୍ନର ଉତ୍ତର, ଜାତିଠାରୁ ରୋଜଗାର ପର୍ଯ୍ୟନ୍ତ ସବୁ ତଥ୍ୟ

ସ୍ୱାଧୀନତା ପରେ ଏଥର ପ୍ରଥମ ଥର ସବୁ ସମ୍ପ୍ରଦାୟର ଜାତି ଗଣନା । ନିଜର ଧର୍ମ ଠାରୁ ନେଇ ଜାତି ପର୍ଯ୍ୟନ୍ତ ପ୍ରଶ୍ନର ଉତ୍ତର ରଖିବେ ଦେଶବାସୀ । ୨୦୨୭ ଜନଗଣନାକୁ ନେଇ କେନ୍ଦ୍ର ସରକାର ଜାରି କରିଛନ୍ତି ୪୦ଟି ପ୍ରଶ୍ନର ତାଲିକା । ପ୍ରଥମଥର ପାଇଁ ଜନଗଣନାରେ ଜାତି ସମ୍ପର୍କିତ ତଥ୍ୟ ସଂଗ୍ରହ କରାଯିବ । ଏହା ସହ ଶିକ୍ଷା, ରୋଜଗାର, ପ୍ରବାସ, ମହିଳାଙ୍କ ସ୍ଥିତି, ଡିଜିଟାଲ ସାକ୍ଷରତା ଓ ପରିଚୟପତ୍ର ସମ୍ପର୍କିତ ତଥ୍ୟ ମାଗିବେ ସରକାର । ସେପଟେ ଶୀତପ୍ରବଣ ଅଞ୍ଚଳରେ ସେପ୍ଟେମ୍ବର ୧ରୁ ଆରମ୍ଭ ହେବ ଜନଗଣନାର ଜନସଂଖ୍ୟା ଗଣନା ପର୍ଯ୍ୟାୟ ।

ଆପଣ କୋଭିଡ ଟୀକା ନେଇଛନ୍ତି ତ ? ଯଦି ନେଇଥିଲେ କେତୋଟି ନେଇଥିଲେ ଆଉ କେଉଁଠି ନେଇଥିଲେ ? ଆପଣଙ୍କ ଜାତି କ'ଣ ? ଆପଣଙ୍କ ରୋଜଗାର କେତେ ? ଏଭଳି ୪୦ ପ୍ରଶ୍ନ । ଦ୍ୱିତୀୟ ପର୍ଯ୍ୟାୟ ଜନଗଣନାରେ ଆପଣଙ୍କୁ ଦେବାକୁ ପଡ଼ିବ ଏହିସବୁ ପ୍ରଶ୍ନର ଉତ୍ତର । ପ୍ରଥମଥର ପାଇଁ ଜାତିଭିତ୍ତିକ ଜନଗଣନା ହେଉଥିବାରୁ ଦେଶବାସୀଙ୍କୁ ନିଜର ଜାତି ସମେତ ଆହୁରି ୪୦ ପ୍ରଶ୍ନର ଉତ୍ତର ମାଗିବେ ଜନଗଣନା ଅଧିକାରୀ ।

ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଜାରି ପ୍ରଶ୍ନ ତାଲିକାରେ ସବୁଠୁ ଅଧିକ ପ୍ରଶ୍ନ ରହିଛି ରୋଜଗାର ଏବଂ କାମକୁ ନେଇ । ଏଥିରେ ବ୍ୟକ୍ତିଙ୍କ ପରିଚୟ, ପରିବାର, ଶିକ୍ଷା, ପ୍ରବାସ, ମହିଳାଙ୍କ ସ୍ଥିତି, ଆର୍ଥକ ସ୍ଥିତି ଏବଂ ଡିଜିଟାଲ ପରିଚୟ ବାବଦରେ ତଥ୍ୟ ମଗାଯାଇଛି । ଏଥିସହ ମୋବାଇଲ ନମ୍ବର, ଆଧାର, ଭୋଟର ଆଇଡି, କେତୋଟି ବ୍ୟାଙ୍କ ଆକାଉଣ୍ଟ ରହିଛି ତାହା ମଧ୍ୟ ଏହି ତାଲିକାରେ ରହିଛି । ତେବେ ଜନଗଣନାରେ ପରିଚୟ ବାବଦରେ ପ୍ରଶ୍ନ ମଧ୍ୟରେ ବ୍ୟକ୍ତିଙ୍କ ନାମ, ପରିବାର ମୁଖ୍ୟଙ୍କ ସହ କ'ଣ ସମ୍ପର୍କ, ଲିଙ୍ଗ, ଜନ୍ମତିଥି, ବୟସ ଆଦି ରହିଛି ।

ଅଧିକ ପଢ଼ନ୍ତୁ: ୨୫ ବର୍ଷ ଭିତରେ ରାଜ୍ୟରେ ରେକର୍ଡ ଭାଙ୍ଗିଲା ବର୍ଷା, ମାତ୍ର ୩ ମାସରେ ବର୍ଷିଲା ୧୧ ଶହ ମିଲିମିଟର

ସେହିଭଳି ରୋଜଗାର, ଚାକିରି ନେଇ ରହିଛି ୮ ପ୍ରଶ୍ନ । ଏଥିସହ ପିତାମାତା, ବୈବାହିକ ସ୍ଥିତି, ବିବାହ ସମୟର ବୟସ, ଜାତୀୟତା, ଧର୍ମ, ଜାତି ବାବଦ ପ୍ରଶ୍ନ ଅନ୍ତର୍ଭୁକ୍ତ । ଶିକ୍ଷା ଏବଂ ଭାଷା ବାବଦରେ ମାତୃଭାଷା, ଅନ୍ୟ ଭାଷା, ସାକ୍ଷରତା, ଡିଜିଟାଲ ସାକ୍ଷରତା ବାବଦରେ ତ‌ଥ୍ୟ ମଗାଯାଇଛି ।

ଏଥର ଜନଗଣନାର ଆଉ ଏକ ବଡ଼ ବିଶେଷତା ହେଉଛି ଡିଜିଟାଲ୍ ପ୍ରକ୍ରିୟା । ଭାରତରେ ପ୍ରଥମଥର ପାଇଁ ଜନଗଣନା ତଥ୍ୟ ମୋବାଇଲ୍ ଆପ୍‌ ମାଧ୍ୟମରେ ଡିଜିଟାଲ୍ ଭାବେ ସଂଗ୍ରହ କରାଯିବ । ଏଥିସହ ପ୍ରଥମଥର ପାଇଁ ସ୍ୱୟଂ-ଗଣନାର ସୁବିଧା ମଧ୍ୟ ରହିବ । ସରକାରଙ୍କ ଅଧିକୃତ ଜନଗଣନା ପୋର୍ଟାଲରେ ୨୦୨୭ ଜନଗଣନା ସମ୍ପର୍କିତ ଅଧିସୂଚନା ଏବଂ ପ୍ରଥମ ପର୍ଯ୍ୟାୟର ହାଉସ୍-ଲିଷ୍ଟିଂ ପ୍ରଶ୍ନାବଳୀ ପ୍ରକାଶିତ ହୋଇଛି । ବର୍ତ୍ତମାନ ବିବାହିତ, ବିଧବା, ଛାଡ଼ପତ୍ର ପାଇଥିବା କିମ୍ବା ଅଲଗା ରହୁଥିବା ମହିଳାଙ୍କୁ ସନ୍ତାନ ସମ୍ପର୍କିତ ତଥ୍ୟ ମଧ୍ୟ ପଚରାଯିବ । କେବଳ ସେତିକି ନୁହେଁ ଜନ୍ମସ୍ଥାନ, ପୂର୍ବ ବାସସ୍ଥାନ, ମାଇଗ୍ରେସନର କାରଣ ଏବଂ ସେଠାରେ ରହିବା ଅବଧିକୁ ନେଇ ଉତ୍ତର ରଖିବେ ଦେଶବାସୀ । ସ୍ଥାୟୀ ବାସସ୍ଥାନ ଠିକଣା, ମହିଳାଙ୍କଠାରୁ ଜନ୍ମିତ ଜୀବିତ ପିଲା, ଅଦ୍ୟାବଧୂ ଜନ୍ମିତ ପିଲା ଏବଂ ଗତ ବର୍ଷକ ମଧ୍ୟରେ ଜନ୍ମିତ ପିଲାଙ୍କ ସଂଖ୍ୟା ବାବଦ ପ୍ରଶ୍ନ ରହିଛି ।

୨୦୧୧ ଜନଗଣନା ତୁଳନାରେ ଏଥର ୧୧ଟି ଅଧିକ ପ୍ରଶ୍ନ ସାମିଲ କରାଯାଇଛି । ଦୁର୍ଗମ ଓ ବରଫ ପଡୁଥିବା ଅଞ୍ଚଳର ଆଗୁଆ ଜନଗଣନା ପରେ ଦେଶର ଅନ୍ୟ ଅଞ୍ଚଳରେ ଫେବ୍ରୁଆରୀ ୨୦୨୭ରେ ଜନସଂଖ୍ୟା ଗଣନା କରାଯିବ । ଏହି ପ୍ରକ୍ରିୟା ମାର୍ଚ୍ଚ ୧, ୨୦୨୭ ସୁଦ୍ଧା ଶେଷ କରିବାକୁ ଲକ୍ଷ୍ୟ ରହିଛି ।
୨୦୨୭ ଜନଗଣନା ଭାରତର ୧୬ତମ ଜନଗଣନା ଏବଂ ସ୍ୱାଧୀନତା ପରେ ୮ମ ଜନଗଣନା ହେବ । ସେପଟେ ଲଦାଖ ଏବଂ ଜମ୍ମୁ-କାଶ୍ମୀର, ହିମାଚଳ ପ୍ରଦେଶ ଓ ଉତ୍ତରାଖଣ୍ଡର ତୁଷାରପ୍ରବଣ ଅଞ୍ଚଳରେ ସେପ୍ଟେମ୍ବର ୧ରୁ ୩୦ ମଧ୍ୟରେ ଜନସଂଖ୍ୟା ଗଣନା ହେବ। ଏହା ପୂର୍ବରୁ ଅଗଷ୍ଟ ୧୭ରୁ ୩୧ ପର୍ଯ୍ୟନ୍ତ ସ୍ୱୟଂ-ଗଣନା ବା Self-Enumeration ପାଇଁ ସୁଯୋଗ ରହିଛି। ଦେଶର ଅନ୍ୟ ଅଞ୍ଚଳରେ ଜନସଂଖ୍ୟା ଗଣନା ପରବର୍ତ୍ତୀ ବର୍ଷ ଆରମ୍ଭ ହେବ ।