ପୁରୀ: ରୁଷିଛି କାଳିଆ, ରଥକୁ ଯିବାକୁ ବିଳମ୍ବ କରୁଛି । ସାତ ପାହାଚ ଦେଇ ଆସିଲା ବେଳେ ଅଝଟ କରିଛି । ଆଉ ଜଗାର ମଥାରୁ ଖସି ଯାଇଛି ସୁସଜ୍ଜିତ ଟାହିଆ । ଶ୍ରୀସୁଦର୍ଶନ, ଶ୍ରୀବଳଭଦ୍ର, ଦେବୀ ସୁଭଦ୍ରାଙ୍କ ପରେ ଧାଡ଼ି ପହଣ୍ଡିରେ ଆସିଛନ୍ତି ଜଗତର ନାଥ ପ୍ରଭୁ ଜଗନ୍ନାଥ ।

ପ୍ରବଳ ବର୍ଷା ଭିତରେ ବଡ଼ଦାଣ୍ଡ ଜନସମୁଦ୍ର ପାଲଟିଛି । ପ୍ରତିଟି ଲୋତକ ତାର ପ୍ରାଣ ପ୍ରିୟ ଠାକୁରକୁ ଚାହିଁ ରହିଛନ୍ତି । ସିଂହଦ୍ଵାର ଦେଇ ରଥକୁ ଜଗତର ନାଥ ଜଗନ୍ନାଥ ଆସିବା ବେଳେ ମଥାରେ ଟାହିଆ ନଥିବା ଦେଖିବାକୁ ମିଳିଛି । ବିନା ଟାହିଆରେ ସେବାୟତ ଜଗନ୍ନାଥଙ୍କୁ ନନ୍ଦିଘୋଷ ରଥକୁ ପହଣ୍ଡି କରି ଆଣିଛନ୍ତି ।

ଏଥିସହ ପଢ଼ନ୍ତୁ: ବ୍ରହ୍ମ ହିଁ ଜଗତର ଏକମାତ୍ର ସତ୍ୟ ଓ ଅପରିବର୍ତ୍ତନୀୟ ତତ୍ତ୍ଵ 

ଟାହିଆ କୁଆଡ଼େ ଗଲା ?

ମିଳିଥିବା ସୂଚନା ଅନୁସାରେ, ପହଣ୍ଡି ବେଳେ କଳା ସାଆନ୍ତଙ୍କୁ ଟାହିଆ ପିନ୍ଧା ଯାଇଥିଲା । ତେବେ ସାତ ପାହାଚ ନିକଟରେ ଜଗା ମଥାରୁ କୌଣସି କାରଣରୁ ଟାହିଆ ଖସିପଡ଼ିଛି । ତେବେ, କେଉଁ କାରଣରୁ କଳା ଠାକୁରଙ୍କ ଟାହିଆ ଖସିପଡ଼ିଲା ତାହା ସ୍ପଷ୍ଟ ହୋଇନାହିଁ ।

ବିନା ଟାହିଆରେ କଳା ଠାକୁର ଝୁଲି ଝୁଲି ରଥକୁ ଆସିଛ । ଗୋଟିଏ ପାହୁଣ୍ଡ ଆସିବା ପରେ କ୍ଷଣିକ ଅଟକି ଯାଉଥିଲେ କଳା ସାଆନ୍ତ । ବଡ଼ ଦାଣ୍ଡରେ ବଡ଼ ବଡ଼ ଆଖିରେ ଜଗା ତାର ଭକ୍ତମାନଙ୍କୁ ଦେଖିବା ସହ ବର୍ଷାରେ ଭିଜିଛି ।

ଯାହାକୁ ଦେଖି ଜଗନ୍ନାଥ ପ୍ରେମୀ କହୁଛନ୍ତି, "ଆମ କାଳିଆ ବୋଧେ ଆଜି ରୁଷିଛି । ସେଥିପାଇଁ ବୋଧ ହୁଏ ନାଟୁଆ ଠାକୁର ନାଟ ଲଗାଇ ଟାହିଆ ଖସାଇ ଦେଇଛି । ସବୁ ତାଙ୍କ ଇଚ୍ଛା, ତାଙ୍କ ଲୀଳା । ସେ ବୋଧେ ଆଉ ଏକ ନାଟ ଲଗାଇବାକୁ ଚାହୁଁଛି ।"

ଏଥିସହ ପଢ଼ନ୍ତୁ: ବଡ଼ଦାଣ୍ଡରେ ଦିବ୍ୟ ତିନି ରଥ; କେଉଁ ରଥ ଦର୍ଶନ କଲେ ମିଳେ କେଉଁ ଲାଭ ? 

ଜଗା ମଥାରେ ଟାହିଆ ନଥିବା ବେଳେ କେବଳ ତୁଳସୀ ମଣ୍ଡିତ ହୋଇ ଠାକୁର ରଥକୁ ଆସିଛନ୍ତି । ଜଗନ୍ନାଥ ରଥକୁ ଆସୁଥିବା ବେଳେ ଆକାଶରୁ ଇନ୍ଦ୍ରଦେବ ବର୍ଷା ବୃଷ୍ଟି କରିଛନ୍ତି । କାଳିଆ ଭକ୍ତିରେ ଶୀକ୍ଷେତ୍ର ତଲ୍ଲୀନ ହୋଇ ଯାଇଛି । ପ୍ରତିଟି ମନ, ପ୍ରତିଟି ପ୍ରାଣ ଚାହିଁ ରହିଛି ଚକା ନୟନକୁ । 

ନିର୍ଦ୍ଧାରିତ ସମୟରେ ଧାଡ଼ି ପହଣ୍ଡି ଆରମ୍ଭ ହୋଇଥିଲା । ଦିନ ୧୧ଟା ସୁଦ୍ଧା ବଡ଼ ଠାକୁର ବଳଭଦ୍ର, ଦେବୀ ସୁଭଦ୍ରାଙ୍କ ପହଣ୍ଡି ପରେ ଝୁଲି ଝୁଲି ଟାହିଆ ଖସାଇ ଦେଇ ଆସିଛନ୍ତି କଳା ସାଆନ୍ତ ।

ଟାହିଆ କ'ଣ ?

ଟାହିଆ ହେଉଛି ଶ୍ରୀଜଗନ୍ନାଥ, ଶ୍ରୀବଳଭଦ୍ର ଓ ଦେବୀ ସୁଭଦ୍ରାଙ୍କ ମସ୍ତକରେ ଲାଗୁଥିବା ଏକ ବିଶେଷ ଶୋଭାମୟ ଅଳଙ୍କାର । ଏହା ଅର୍ଦ୍ଧବୃତ୍ତାକାର (ପଖା ଆକୃତି) ହୋଇଥାଏ । ରଥଯାତ୍ରା ଓ ସମ୍ବନ୍ଧିତ ନୀତିଗୁଡ଼ିକରେ ଟାହିଆର ବିଶେଷ ମହତ୍ତ୍ୱ ରହିଛି । ଏହା ଶ୍ରୀବିଗ୍ରହଙ୍କ ଐଶ୍ୱର୍ଯ୍ୟ, ମହିମା ଓ ରାଜବେଶର ପ୍ରତୀକ ବୋଲି ବିବେଚିତ । ଟାହିଆ ବାଉଁଶ କାଠି, ଶୋଳା, ଜରି, ରଙ୍ଗୀନ କାଗଜ, ଚୁମକି, ସୋଲା ଫୁଲ ଏବଂ ପାରମ୍ପରିକ ସଜ୍ଜା ସାମଗ୍ରୀରେ ତିଆରି ।