ପୁରୀ: ସ୍ନାନଯାତ୍ରା ପାଇଁ ଶ୍ରୀମନ୍ଦିରରେ ବିଶେଷ ନୀତି । ପ୍ରଭାବିତ ହେବ ସର୍ବସାଧାରଣ ଦର୍ଶନ । ଶ୍ରୀମନ୍ଦିରରେ ୧୪ ଘଣ୍ଟା ବନ୍ଦ ରହିବ ସର୍ବସାଧାରଣ ଦର୍ଶନ । ଏନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି ।

ଶ୍ରୀମନ୍ଦିର ପକ୍ଷରୁ ଦିଆଯାଇଥିବା ସୂଚନା ଅନୁସାରେ, ଆଜି (ଶନିବାର) ରାତି ସାଢ଼ ୧୦ଟାରୁ କାଲି (ରବିବାର) ଦିନ ୧ଟା ଯାଏ ଦର୍ଶନ ବନ୍ଦ ରହିବ । ସ୍ନାନଯାତ୍ରା ପାଇଁ ଶ୍ରୀମନ୍ଦିରରେ ବିଶେଷ ନୀତି ମାନ ଅନୁଷ୍ଠିତ ହେବାକୁ ଥିବାରୁ ପୂର୍ବ ପ୍ରସ୍ତୁତି କରାଯିବ ।

୨୯ ତାରିଖ ସୋମବାର ଜ୍ୟେଷ୍ଠ ଶୁକ୍ଳ ପୂର୍ଣ୍ଣିମା ତିଥିରେ ସ୍ନାନଯାତ୍ରା ଅନୁଷ୍ଠିତ ହେବ । ୧୦୮ ଗରା ସୁବାସିତ ଜଳରେ ସ୍ନାନ କରିବେ ଶ୍ରୀଜୀଉ । ସ୍ନାନଯାତ୍ରା ପାଇଁ ପୁରୀରେ ବ୍ୟାପକ ପଦକ୍ଷେପ ଗ୍ରହଣ କରାଯାଇଛି । ଆଜି ତ୍ରୟୋଦଶୀରେ ଶ୍ରୀମନ୍ଦିରରେ ହୋଇଛି ଦଇତାପତି ପ୍ରବେଶ ।

ଏଥିସହ ପଢ଼ନ୍ତୁ: ପୁରୀରେ ସ୍ନାନ ଯାତ୍ରା ଓ ରଥ ଯାତ୍ରା ଲାଗି ଆରମ୍ଭ ହେଲା ପ୍ରସ୍ତୁତି,ଶ୍ରୀମନ୍ଦିରକୁ ପ୍ରବେଶ କଲେ ଦଇତାପତି 

ଏକମୁଖୀ ପ୍ରବେଶ-ପ୍ରସ୍ଥାନ

ସ୍ନାନ ପୂର୍ଣ୍ଣିମା ଦିନ ଶ୍ରୀମନ୍ଦିରରେ ଏକମୁଖୀ ପ୍ରବେଶ-ପ୍ରସ୍ଥାନ ବ୍ୟବସ୍ଥା ଗ୍ରହଣ କରାଯିବ । ମାର୍କେଟ ଛକ ଠାରୁ ୫ ଥାକିଆ ବ୍ୟାରିକେଡ୍ ଦେଇ ସିଂହଦ୍ୱାରରେ ପ୍ରବେଶ କରି ଉତ୍ତର ଦ୍ୱାରରେ ପ୍ରସ୍ଥାନ କରିବେ ଶ୍ରଦ୍ଧାଳୁ ।
ସୁରକ୍ଷା, ଭିଡ଼ ପରିଚାଳନା,ଓ ବିନା ବାଧାରେ ଶ୍ରଦ୍ଧାଳୁଙ୍କ ଦର୍ଶନ ଉପରେ ଗୁରୁତ୍ଵ ଦେଇଛି ପ୍ରଶାସନ ।

୨୪ ଘଣ୍ଟିଆ ମନିଟରିଂ

ଭିଡ଼ ପରିଚାଳନା ପାଇଁ ପୁରୀର ୧୦ଟି ସ୍ଥାନରେ ହେବ ପୋଲିସ ସହାୟତା କେନ୍ଦ୍ର । ୨୪ ଘଣ୍ଟିଆ ମନିଟରିଂ ପାଇଁ ଶ୍ରୀମନ୍ଦିରେ ଭିତରେ ୧୫୨ଟି ଓ ବାହାରେ ୨୫୦ ସିସିଟିଭି କ୍ୟାମେରା ଲଗାଯାଇଛି । ମେଡିକାଲ ଏମର୍ଜେନ୍ସି ପାଇଁ ଅକ୍ସିଜେନ ସପୋର୍ଟ ସହ ଭିତରେ ଓ ବାହାରେ ରହିବେ ରହିବେ ୮ଟି କ୍ରାକ ଟିମ୍ ।

ମହାପ୍ରଭୁଙ୍କ ଗୁପ୍ତ ସେବା ପାଇଁ ଆଜି ତ୍ରୟୋଦଶୀ ତିଥିରେ ଦଇତାମାନେ ମଙ୍ଗଳ ଆଳତି ପୂର୍ବରୁ ପ୍ରବେଶ କରିଛନ୍ତି । ଆସନ୍ତାକାଲି ଶ୍ରୀଜୀଉଙ୍କ ବଡ଼ସିଂହାର ଭୋଗ, ପହୁଡ଼ ଆଳତି ପରେ ଚତୁର୍ଦ୍ଧା ମୂର୍ତ୍ତିଙ୍କ ଶ୍ରୀମୁଖକୁ ଶ୍ରୀମୁଖ ଖଣ୍ଡୁଆରେ ଢାଙ୍କି କରାଯିବ ।

ବଡ଼ସିଂହାର ପରେ ଦଇତା ସେବକମାନେ ପ୍ରଭୁଙ୍କ ବାହୁଟକଣ୍ଟ ନୀତି ସମ୍ପାଦନ କରିବେ । କୋଠ ସୁଆସିଆଁ ସେବକମାନେ ରତ୍ନ ସିଂହାସନରେ ଚାର ବାନ୍ଧିବାକୁ ଗର୍ଭଗୃହକୁ ପ୍ରବେଶ କରିବେ ଏବଂ ଚାର ବନ୍ଧାଯିବା ପରେ ଦଇତାପତିମାନେ ପ୍ରଭୁଙ୍କ ସେନାପଟା ବାନ୍ଧିବା ନୀତି ସମ୍ପନ୍ନ କରିବେ ।

ଏଥିସହ ପଢ଼ନ୍ତୁ: ପୁରୀରେ ସ୍ନାନ ଯାତ୍ରା ପାଇଁ ଶେଷ ପର୍ଯ୍ୟାୟରେ ପ୍ରସ୍ତୁତି... ଭକ୍ତଙ୍କ ସୁରକ୍ଷା ପାଇଁ ୭୯ ପ୍ଲାଟୁନ୍ ଫୋର୍ସ 

ପିପିଲିରୁ ପୁରୀ ପର୍ଯ୍ୟନ୍ତ ଆଲର୍ଟରେ ପୋଲିସ

ପିପିଲି ଟୋଲ୍ ଗେଟ୍ ଠାରୁ ସହାୟତା ଯୋଗାଇବ ପୋଲିସ । ବଡ଼ଦାଣ୍ଡ ଓ ଗ୍ରାଣ୍ଡ ରୋଡରେ ସୂଚନା ଦେବ ପିଏ ସିଷ୍ଟମ । ୨୪ ଘଣ୍ଟିଆ ଦାୟିତ୍ଵରେ ରହିବ ସ୍ପେସିଆଲ ଟାକ୍ଟିକଲ୍ ୟୁନିଟ୍ । ଉତ୍ତର ଦ୍ଵାର ଓ ବ୍ୟାରିକେଡ୍ ପ୍ରବେଶ ପାଖରେ ରହିବ ଆମ୍ବୁଲାନ୍ସ । ମାର୍କେଟ ଛକ ଠାରୁ ୫ ଥାକିଆ ବ୍ୟାରିକେଡ୍ ଦେଇ ସିଂହଦ୍ୱାର ପ୍ରବେଶ ପରେ ସ୍ନାନବେଦୀରେ ଦର୍ଶନ କରି ଉତ୍ତର ଦ୍ୱାର ପ୍ରସ୍ଥାନ କରିବେ ଶ୍ରଦ୍ଧାଳୁ । ସେହିଭଳି ଦକ୍ଷିଣ ଦ୍ୱାର ଦେଇ ଯାଇପାରିବେ ପରିମାଣିକ ଟିକେଟ ଧାରୀ ।