Encounter in Jharsuguda / ଝାରସୁଗୁଡ଼ାରେ ପୁଲିସ-ଅପରାଧୀ ଏନକାଉଣ୍ଟର; କୁଖ୍ୟାତ ଅପରାଧୀ ଆହତ

ଝାରସୁଗୁଡ଼ା: ଆଜି ସକାଳେ ଜିଲ୍ଲାରେ ପୁଲିସ-ଅପରାଧୀ ମୁହାଁମୁହିଁ । ଓରିଏଣ୍ଟ ଥାନା ଅଞ୍ଚଳର ଆମଦରହ ଜଙ୍ଗଲ ନିକଟରେ ଆଜି ସକାଳେ ପୁଲିସ ଏନକାଉଣ୍ଟର ହୋଇଛି । କୁଖ୍ୟାତ ଅପରାଧୀ ବଣ୍ଟି ପ୍ରସାଦକୁ ଧରିବା ପାଇଁ ପୁଲିସ ସର୍ଚ୍ଚ ଅପରେସନ୍ ଚଳାଇଥିଲା ବେଳେ ପୁଲିସ ଟିମ୍‌କୁ ଦେଖି ଅପରାଧୀ ବଣ୍ଟି ପ୍ରସାଦ ପୁଲିସ ଉପରକୁ ଅତର୍କିତ ଗୁଳିଚାଳନା କରିଥିଲା । ପରେ ଜୀବନ ରକ୍ଷା ପାଇଁ ପୁଲିସ ପକ୍ଷରୁ ଗୁଳିଚାଳନା କରାଯାଇଥିଲା । ତେବେ ଅପରାଧୀ ବଣ୍ଟିର ବାମ ଗୋଡ଼ରେ ଗୁଳି ବାଜିଥିବା ଜଣାପଡ଼ିଛି ।

• ବଣ୍ଟି ନାଁରେ ୧୭ଟି ସଙ୍ଗୀନ ମାମଲା

କୁଖ୍ୟାତ ଅପରାଧୀ ବଣ୍ଟି ପ୍ରସାଦ ଆହତ । ବଣ୍ଟି ନାଁରେ ରହିଛି ହତ୍ୟା ଉଦ୍ୟମ, ଡକାୟତି ଭଳି ୧୭ଟି ସଙ୍ଗୀନ ମାମଲା । ଭୋର ସକାଳ ୬ଟା ସମୟ ଓରିଏଣ୍ଟ ଥାନା ଅନ୍ତର୍ଗତ ଆମଦରହ ଜଙ୍ଗଲରେ ବ୍ରଜରାଜନଗର ହନୁମାନ ନଗର ଅଞ୍ଚଳର କୁଖ୍ୟାତ ଅପରାଧୀ ବଣ୍ଟି ପ୍ରସାଦ ଲୁଚି ରହିଥିବା ନେଇ ପୁଲିସକୁ ସୂଚନା ମିଳିଥିଲା । ଖବର ପାଇ ଓରିଏଣ୍ଟ ଥାନା ପୁଲିସର ଏକ ସ୍ୱତନ୍ତ୍ର ଟିମ୍ ଜଙ୍ଗଲକୁ ଘେରାବନ୍ଦୀ କରି କମ୍ବିଂ ଅପରେସନ ଆରମ୍ଭ କରିଥିଲା ।

• ଧରାପଡ଼ିବା ଭୟରେ ଗୁଳି ଚଳାଇଥିଲା ବଣ୍ଟି

ପୋଲିସ ଦେଖି ଧରାପଡ଼ିବା ଭୟରେ ପୁଲିସ ଉପରକୁ ଅତର୍କିତ ଗୁଳି ଚଳାଇଥିଲା ବଣ୍ଟି । ଆତ୍ମରକ୍ଷା ପାଇଁ ନିୟନ୍ତ୍ରିତ ପାଲଟା ଗୁଳିଚାଳନା କରିଥିଲା ପୋଲିସ । ଏଥିରେ ବଣ୍ଟିର ବାମ ଗୋଡ଼ରେ ଗୁଳି ବାଜିବାରୁ ସେ ତଳେ ଟଳି ପଡ଼ିଥିଲା । ତୁରନ୍ତ ତାକୁ କାବୁ କରି ଚିକିତ୍ସା ପାଇଁ ଖଲିଆକାନି ଡାକ୍ତରଖାନାରେ ଭର୍ତ୍ତି କରାଯାଇଛି । ଘଟଣାସ୍ଥଳରୁ ବେଆଇନ ମାରଣାସ୍ତ୍ର ମଧ୍ୟ ଜବତ କରିଛି ପୁଲିସ । ତେବେ ଓରିଏଣ୍ଟ ଥାନା କେସ୍ ନମ୍ବର ୨୪୯/୨୦୨୬ ଅଧୀନରେ ବଣ୍ଟିକୁ ଧରିବାକୁ ଖୋଜୁଥିଲା ପୁଲିସ ।

ପଢନ୍ତୁ ଏହି ଖବର: ବଲିଉଡ ଅଭିନେତା ଟାଇଗର ଶ୍ରଫ୍‌ଙ୍କୁ ଗୁଳିମାଡ଼

ଏନକାଉଣ୍ଟର ହୋଇଥିବା ସ୍ଥାନର ଏକ ଭିଡିଓ ସାମ୍ନାକୁ ଆସିଛି । କୁଖ୍ୟାତ ଅପରାଧୀ ବଣ୍ଟିର ବାଇକ୍ ପଡ଼ିଥିବା ଦେଖିବାକୁ ମିଳିଛି । ପୋଲିସ କର୍ମଚାରୀ ମଧ୍ୟ ସେଠାରେ ଉପସ୍ଥିତ ଅଛନ୍ତି । ଆମଦରହ ଜଙ୍ଗଲରେ ବେଆଇନ ମାରଣାସ୍ତ୍ର ମଧ୍ୟ ପଡ଼ିଛି । ବଣ୍ଟିକୁ ଧରିବା ପରେ ଝାରସୁଗୁଡ଼ା ପୋଲିସକୁ ଏକ ବଡ଼ ସଫଳତା ମିଳିଛି । କାରଣ ତା’ ନାଁରେ ଝାରସୁଗୁଡ଼ା, ବ୍ରଜରାଜନଗର ଓ ଓରିଏଣ୍ଟ ଥାନାରେ ହତ୍ୟା ଉଦ୍ୟମ, ଡକାୟତି ଯୋଜନା, ସଙ୍ଗଠିତ ଅପରାଧ ଓ ବେଆଇନ ବନ୍ଧୁକ କାରବାର ଭଳି ରହିଛି ପାଖାପାଖି ୧୭ଟି ସଙ୍ଗୀନ ମାମଲା ।