Ghati Road Sealed / 'ଅର୍ଣ୍ଣବ' ପାଇଁ କଳିଙ୍ଗା ଘାଟି ଏବଂ ଦାରିଙ୍ଗିବାଡ଼ି ଘାଟି ସିଲ୍‌

ଗଞ୍ଜାମ: ବାତ୍ୟାକୁ ନେଇ ଗଞ୍ଜାମ ଜିଲ୍ଲା ପକ୍ଷରୁ ବ୍ୟାପକ ପ୍ରସ୍ତୁତି ହୋଇଛି । କଳିଙ୍ଗା ଘାଟି ଅଞ୍ଚଳ ଉପରେ ନଜର ରଖିବାକୁ ଭଞ୍ଜନଗର ଉପଜିଲ୍ଲାପାଳଙ୍କୁ ନିର୍ଦ୍ଦେଶ ଦିଆଯାଇଛି । ଆଗାମୀ ୨୯ ତାରିଖ ଯାଏଁ କଳିଙ୍ଗା ଘାଟି ଓ ଦାରିଙ୍ଗିବାଡ଼ି ରାସ୍ତା ବନ୍ଦ କରାଯିବ । ବାତ୍ୟା 'ଅର୍ଣ୍ଣବ' ଯୋଗୁ ଲଗାଣ ବର୍ଷା ଲାଗି ରହିଥିବା ବେଳେ ଭୂସ୍ଖଳନ ହେବାର ସମ୍ଭାବନା ରହିଛି ।

ଜିଲ୍ଲାର ସୋରଡ଼ା ଥାନା ଅନ୍ତର୍ଗତ ଦାରିଙ୍ଗବାଡି ଘାଟି ରାସ୍ତାକୁ ଗାଜଲବାଡ଼ି ପଞ୍ଚାୟତ ନିକଟରେ ସିଲ୍ କରିଛି ସୋରଡ଼ା ତହସିଲ ଓ ପୋଲିସ ପ୍ରଶାସନ । ଘାଟି ରାସ୍ତାର ଉଭୟ ପାର୍ଶ୍ବରେ ଅର୍ଥାତ୍ ବାଇମେଲା ଗାଁ ନିକଟରେ ଓ ଗାଜଲବାଡ଼ି ପଞ୍ଚାୟତ ନିକଟରେ ବ୍ୟାରିକେଟ ମାଧ୍ୟମରେ ସିଲ୍ କରିଛି ପ୍ରଶାସନ । ସିଲ୍ ହେବାବେଳେ ଘଟଣା ସ୍ଥଳରେ ସୋରଡ଼ା ପୋଲିସ ସହ ସୋରଡ଼ା ତହସିଲଦାର ଗୋପାଳ କୃଷ୍ଣ ରାଉତରାୟ ଉପସ୍ଥିତ ଥିଲେ ।

• ଓଡ୍ରାଫ୍ ଏବଂ ଏନଡିଆରଏଫ୍ ମୁତୟନ

ସ୍ୱତନ୍ତ୍ର ରିଲିଫ୍ କମିଶନର୍‌ (SRC)ଙ୍କ କାର୍ଯ୍ୟାଳୟ ପକ୍ଷରୁ ଗଞ୍ଜାମ ଜିଲ୍ଲା ପାଇଁ ୩ଟି ODRAF ଦଳ ଓ ୨ଟି NDRF ଦଳ ମୁତୟନ କରାଯାଇଛି । ଛତ୍ରପୁରସ୍ଥିତ OSAP ଅଷ୍ଟମ ବାଟାଲିୟନ୍‌ର ଗୋଟିଏ ODRAF ଦଳକୁ ବ୍ରହ୍ମପୁର ମହାନଗର ନିଗମ ଅଞ୍ଚଳରେ ଉଦ୍ଧାର କାର୍ଯ୍ୟ ପାଇଁ ମୁତୟନ କରାଯାଇଛି । ଅନ୍ୟ ଏକ ODRAF ଦଳ ପାତ୍ରପୁରରେ ମୁତୟନ ରହିଛି । ଗୋଟିଏ NDRF ଦଳ ବ୍ରହ୍ମପୁରରେ ଏବଂ ଅନ୍ୟ ଦଳଟି ଆସିକାରେ ମୁତୟନ ହୋଇଛି । ଆବଶ୍ୟକୀୟ ଯନ୍ତ୍ରପାତି ଓ କର୍ମଚାରୀଙ୍କ ସହ ୨୪ଟି ଅଗ୍ନିଶମ ସେବା ଦଳକୁ ପ୍ରସ୍ତୁତ ରଖାଯାଇଛି । ଏଥିସହ ୪ଟି SRC ପାୱାର ବୋଟ୍‌କୁ ବିଭିନ୍ନ ରଣନୈତିକ ସ୍ଥାନରେ ମୁତୟନ କରାଯାଇଛି ।

• ଉଗ୍ର ହୋଇ ମାଡ଼ି ଆସୁଛି ବାତ୍ୟା

ପଶ୍ଚିମ-କେନ୍ଦ୍ରୀୟ ବଙ୍ଗୋପସାଗରରେ ସକ୍ରିୟ ଥିବା ଅତ୍ୟନ୍ତ ଭୀଷଣ ବାତ୍ୟା ଅର୍ଣ୍ଣବ ଗତ ୬ ଘଣ୍ଟା ମଧ୍ୟରେ ଘଣ୍ଟା ପ୍ରତି ୨୦ କିଲୋମିଟର ବେଗରେ ପଶ୍ଚିମ-ଉତ୍ତରପଶ୍ଚିମ ଦିଗକୁ ଗତି କରିଛି । ବର୍ତ୍ତମାନ ବିଶାଖାପାଟଣାଠାରୁ ୧୭୦ କିମି, କାକିନାଡ଼ାଠାରୁ ୧୮୦ କିମି, ମଛଲିପାଟଣାମଠାରୁ ୨୭୦ କିମି, ବାପାଟଲା ଠାରୁ ପୂର୍ବ ଦିଗରେ ୩୫୦ କିମି ଏବଂ ଗୋପାଳପୁରଠାରୁ ଦକ୍ଷିଣ-ଦକ୍ଷିଣପଶ୍ଚିମ ଦିଗରେ ୩୭୦ କିମି ଦୂରରେ କେନ୍ଦ୍ରୀଭୂତ ହୋଇ ରହିଛି । ଆଜି ସନ୍ଧ୍ୟା ପର୍ଯ୍ୟନ୍ତ ପଶ୍ଚିମ-ଉତ୍ତରପଶ୍ଚିମ ଦିଗକୁ ଗତି କରିବାର ପ୍ରବଳ ସମ୍ଭାବନା ରହିଛି ।

ପଢନ୍ତୁ ଏହି ଖବର: ମାଡ଼ି ଆସୁଛି ବାତ୍ୟା; କଳାହାଣ୍ଡି, କଟକ ସମେତ ୧୨ ଜିଲ୍ଲାରେ ସ୍କୁଲ ଛୁଟି

• ଆସନ୍ତାକାଲି ଲ୍ୟାଣ୍ଡଫଲ୍ କରିବ

ଏହା ପରେ ଏହା ଉତ୍ତରପଶ୍ଚିମ ଦିଗକୁ ଗତି କରିବ ଏବଂ ୨୮ ଅକ୍ଟୋବର ୨୦୨୬ ପୂର୍ବାହ୍ନ ସୁଦ୍ଧା ଆନ୍ଧ୍ରପ୍ରଦେଶ ଓ ୟାନାମ ଉପକୂଳ ଅତିକ୍ରମ କରିବ । ଏହି ସମୟରେ ଏହା ବାପାଟଲା ଓ ବିଶାଖାପାଟଣା ମଧ୍ୟରେ, ୟାନାମ ନିକଟ ଦେଇ ଏକ 'ଅତ୍ୟନ୍ତ ଭୀଷଣ ବାତ୍ୟା' ଭାବରେ ସ୍ଥଳଭାଗ ଛୁଇଁବାର ସମ୍ଭାବନା ରହିଛି । ସେତେବେଳେ ପବନର ସର୍ବାଧିକ ବେଗ ଘଣ୍ଟା ପ୍ରତି ୧୨୫-୧୩୫ କିଲୋମିଟର ରହିପାରେ, ଯାହା ଝଟକା ପବନ ରୂପେ ଘଣ୍ଟା ପ୍ରତି ୧୫୦ କିଲୋମିଟର ପର୍ଯ୍ୟନ୍ତ ପହଞ୍ଚିପାରେ ।

• ଏହି ଜିଲ୍ଲାଗୁଡ଼ିକୁ ଆଲର୍ଟ

ଆସନ୍ତା ୨୪ ଘଣ୍ଟା ପାଇଁ ୨ ଜିଲ୍ଲାକୁ ରେଡ୍ ଆଲର୍ଟ, ୯ ଜିଲ୍ଲାକୁ ଅରେଞ୍ଜ ଆଲର୍ଟ ଓ ୧୫ ଜିଲ୍ଲାକୁ ୟେଲୋ ଆଲର୍ଟ ଜାରି କରିଛି ପାଣିପାଗ ବିଭାଗ । ଗଞ୍ଜାମ ଓ ଗଜପତି ଜିଲ୍ଲାରେ ଅତ୍ୟନ୍ତ ପ୍ରବଳ ବର୍ଷା ସହ ପବନର ବେଗ ରହିବ ୪୦ରୁ ୫୦ ଓ ଝଟକା ପବନ ୫୦ କିମି । ସେହିପରି କୋରାପୁଟ, ମାଲକାନଗିରିରେ ବର୍ଷା ସହ ପବନର ବେଗ ଅଧିକ ରହିବ ଅର୍ଥାତ ଘଣ୍ଟା ପ୍ରତି ପବନର ବେଗ ୫୦ରୁ ୬୦ କିମ୍ବା ଝଟକା ପବନ ୭୦ କିମି । ରାୟଗଡ଼ା,କନ୍ଧମାଳ, ନୟାଗଡ଼, ପୁରୀ,ଖୋର୍ଦ୍ଧା ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ସମ୍ଭାବନା ଥିବାରୁ ଅରେଞ୍ଜ ଆଲର୍ଟ ଜାରି କରାଯାଇଛି ଆଞ୍ଚଳିକ ପାଣିପାଗ କେନ୍ଦ୍ରର ନିର୍ଦ୍ଦେଶିକା ମନୋରମା ମହାନ୍ତି ସୂଚନା ଦେଇଛନ୍ତି ।