Tragic Incident / ଡାଏବେଟିସ୍ ଥିବାରୁ ରକ୍ତ ପରୀକ୍ଷା ପାଇଁ ଯାଇଥିଲେ… ବଢ଼ି ପାଣି ଦେଖୁ ଦେଖୁ ନଦୀକୁ ଖସି ପଡ଼ିଲେ

କେନ୍ଦ୍ରାପଡ଼ା: ଅସୁସ୍ଥ ଥିଲେ, ରକ୍ତ ପରୀକ୍ଷା ପାଇଁ ସକାଳୁ ନୂଆ ଶାଢ଼ି ପିନ୍ଧି ଛତା ଧରି ଘରୁ ବାହାରି ଯାଇଥିଲେ । ଡାଏବେଟିସ୍ ଥିବାରୁ ପ୍ରଥମେ ଖାଲି ପେଟରେ ରକ୍ତ ପରୀକ୍ଷା କଲେ । ଖାଦ୍ୟ ଖାଇବାର ୨ ଘଣ୍ଟା ପରେ ଆଉ ଥରେ ରକ୍ତ ପରୀକ୍ଷା କରିବାର ଥିଲା । ହାତରେ ସମୟ ଥିବା ବେଳେ ନଦୀରେ ଆସିଥିବା ବଢ଼ି ପାଣି ଦେଖିବାକୁ ମହିଳାଙ୍କ ଇଚ୍ଛା ହେଲା ।

ଆଉ ବିଳମ୍ବ ନ କରି ମହିଳା ଜଣଙ୍କ ଚାଲି ଆସିଥିଲେ କେନ୍ଦ୍ରାପଡ଼ା ସଦର ଥାନା ଅନ୍ତର୍ଗତ ଦାନପୁର ପୋଲ ଉପରକୁ । ବ୍ରିଜ୍ ଉପରେ ଛିଡ଼ା ହୋଇ ବନ୍ୟା ପାଣି ଦେଖୁଥିଲେ । ହେଲେ ହଠାତ୍ ବ୍ରିଜ୍ ଉପରୁ ମହିଳାଙ୍କ ଗୋଡ଼ ଖସିଗଲା । ଆଉ ସେ ଯାଇ ପଡ଼ିଲେ ସିଧା ଲୁଣାନଦୀର ବଢ଼ି ପାଣିରେ । ନଦୀର ପ୍ରଖର ସ୍ରୋତ ମହିଳା ଜଣଙ୍କୁ ଭସାଇ ନେଇଛି ।

ଏଥିସହ ପଢ଼ନ୍ତୁ: ବରଯାତ୍ରୀ ନେଇ ବଢ଼ି ପାଣିରେ ବାହା ହେବାକୁ ଗଲା ବର 

ନିଖୋଜ ମହିଳା ଜଣଙ୍କ ହେଉଛନ୍ତି, କେଶରପୁର ଗାଁର ମନୋରମା ଦାସ । ସ୍ଥାନୀୟ ଲୋକଙ୍କ ଠାରୁ ମହିଳା ଜଣଙ୍କ ନଦୀକୁ ଖସି ପଡ଼଼ି ଭାସି ଯାଇଥିବା ସୂଚନା ପାଇ ଅଗ୍ନିଶମ ବାହିନୀ ପହଞ୍ଚି ଖୋଜା ଖୋଜି ଜାରି କରିଛି । ତେବେ, ଖବର ଲେଖାଯିବା ସୁଦ୍ଧା ମହିଳାଙ୍କ ପତ୍ତା ମିଳି ନାହିଁ ।

ନିଖୋଜ ମନୋରାମ ଦାସଙ୍କ ସ୍ଵାମୀ ଗୌତମ ଦାସ କହିଛନ୍ତି, "ଡାଏବେଟିସ୍ ଥିବାରୁ ରକ୍ତ ପରୀକ୍ଷା ପାଇଁ ଯାଇଥିଲା । ପ୍ରଥମେ ବ୍ଲଡ୍ ଦେବା ପରେ ବଢ଼ି ପାଣି ଦେଖିବାକୁ ଆସିଥିଲା । ଛତା ଧରି ପାଣି ଦେଖୁଥିବା ବେଳେ ନଦୀକୁ କୌଣସି କାରଣରୁ ଖସି ପଡ଼ିଛନ୍ତି । ନଦୀକୁ ଡେଇଁବାର ପ୍ରଶ୍ନ ଉଠୁ ନାହିଁ ।"

ସ୍ଥାନୀୟ ଲୋକଙ୍କ ଅନୁସାରେ, "ମହିଳା ଜଣଙ୍କ ବ୍ରିଜ୍ ଉପରେ ଛତା ଧରି ବନ୍ୟା ଜଳ ଦେଖୁଥିଲେ । ବଢ଼ି ପାଣି ଦେଖୁ ଦେଖୁ ହଠାତ୍ ଖସି ପଡ଼ିଥିଲେ ।" ତେବେ ମନୋରମାଙ୍କ ଡାଏବେଟିସ୍ ଥିବାରୁ ମୁଣ୍ଡ ବୁଲାଇବା ଯୋଗୁଁ ସେ ଖସି ପଡ଼ିଥିବା ଆଶଙ୍କା କରାଯାଉଛି । ଅଗ୍ନିଶମ ବାହିନୀ ସର୍ଚ୍ଚ ଅପରେସନ୍ ଜାରି ରଖିଛି ।

ଏଥିସହ ପଢ଼ନ୍ତୁ: ଖୋଲିଲା ହୀରାକୁଦର ୧୦ ଗେଟ୍‌, ମହାନଦୀରେ ଆହୁରି ବଢ଼ିବ ଜଳସ୍ତର ! 

ସେପଟେ କେନ୍ଦ୍ରାପଡ଼଼ା ଜିଲ୍ଲା ଆଳିର ମାନପୁରରେ ଜଣେ ମହିଳା ନଦୀକୁ ଡେଇଁ ପଡ଼ିଛନ୍ତି । ମାନପୁର ଗାଁର ନିତ୍ୟାନନ୍ଦ ସାମଲଙ୍କ ପତ୍ନୀ କନକଲତା ସାମଲ (୭୦) ମାନପୁର ସେତୁ ଉପରୁ ନଦୀକୁ ଡେଇଁ ପଡ଼ିଥିଲେ । ମହିଳା ଜଣଙ୍କ ନଦୀକୁ ଡେଇଁବା ଦେଖି ଲୋକେ ପାଟି କରଥିଲେ ।

ଉପସ୍ଥିତ ଲୋକେ ସଙ୍ଗେ ସଙ୍ଗେ ନଦୀକୁ ଡେଇଁ କନକଲତାଙ୍କୁ ଉଦ୍ଧାର କରିଛନ୍ତି । ତାଙ୍କୁ ଆଳି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି । ଏବେ କନକଲତାଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ଥିବା ଡାକ୍ତର ସୂଚନା ଦେଇଛନ୍ତି ।