Kendujhar Development / କେନ୍ଦୁଝରରେ ବିକାଶର ନୂଆ ଶୁଭାରମ୍ଭ; ଏକାଧିକ ବିକାଶମୂଳକ ପ୍ରକଳ୍ପ ଉଦଘାଟନ କଲେ ମୁଖ୍ୟମନ୍ତ୍ରୀ

କେନ୍ଦୁଝର ବିକାଶର ନୂଆ ଫର୍ଦ୍ଦ । ଚାଷୀଙ୍କ କ୍ଷେତକୁ ପାଣି, ଗାଁ ଲୋକଙ୍କୁ ଉନ୍ନତ ସ୍ୱାସ୍ଥ୍ୟସେବା ଆଉ ହାତପାହାନ୍ତାରେ ବ୍ୟାଙ୍କିଂ ସୁବିଧା । ନିଜ ମାଟିରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ବଡ଼ ବିକାଶ ଭେଟି । କେବଳ ମେଗା ଲିଫ୍ଟ ଇରିଗେସନ୍ ପାଇଁ ୧୧୮ କୋଟିରୁ ଅଧିକ ଟଙ୍କାର ପ୍ରକଳ୍ପ ନୁହେଁ, ଝୁମ୍ପୁରାରେ ଉଦ୍‌ଘାଟିତ ହୋଇଛି ନୂଆ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର । କୃଷି, ସ୍ୱାସ୍ଥ୍ୟ, ଶିକ୍ଷା ଓ କ୍ରୀଡ଼ା ସବୁ କ୍ଷେତ୍ରରେ କେନ୍ଦୁଝର ଆଗକୁ ବଢ଼ିବାକୁ ଯାଉଛି ।

• ମେଗା ଜଳସେଚନ ପ୍ରକଳ୍ପ ଉଦଘାଟିତ

ଗ୍ରାମୀଣ ବିକାଶ, କୃଷି ପାଇଁ ଜଳସେଚନ, ଉନ୍ନତ ସ୍ୱାସ୍ଥ୍ୟସେବା ଏବଂ ବ୍ୟାଙ୍କିଂ ସୁବିଧାର ସମ୍ପ୍ରସାରଣ ଦିଗରେ ଜିଲ୍ଲାବାସୀଙ୍କୁ ମିଳିଛି ଅନେକ ନୂଆ ସୁଯୋଗ । ନିଜ ମାଟି ଗସ୍ତ ଅବସରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏକାଧିକ ବିକାଶମୂଳକ ପ୍ରକଳ୍ପର ଶୁଭାରମ୍ଭ ଓ ଉଦ୍‌ଘାଟନ କରିଛନ୍ତି । ଏହି ଗସ୍ତର ସବୁଠୁ ବଡ଼ ଆକର୍ଷଣ ପାଲଟିଛି ମେଗା ଲିଫ୍ଟ ଇରିଗେସନ୍ ପ୍ରକଳ୍ପ କ୍ଲଷ୍ଟର-୩୮ । ପ୍ରାୟ ୧୧୮.୫୪ କୋଟି ଟଙ୍କା ବ୍ୟୟ ଅଟକଳରେ ରାଇକଳା, ସତୀକୁଦର ଓ ଜାରକାଣୀଠାରେ କାର୍ଯ୍ୟକାରୀ ହେବାକୁ ଥିବା ଏହି ପ୍ରକଳ୍ପ ଦ୍ୱାରା ୪,୭୮୨.୨୩ ହେକ୍ଟର ଚାଷଜମିକୁ ଜଳସେଚନ ସୁବିଧା ମିଳିପାରିବ ।

ପାହାଡ଼ିଆ ଓ ମାଳ ଅଞ୍ଚଳରେ ଜଳସେଚନ ସୁବିଧାର ସମ୍ପ୍ରସାରଣ ଦ୍ୱାରା କୃଷି କ୍ଷେତ ପାଇଁ ନୂଆ ସୁଯୋଗ ସୃଷ୍ଟି ହେବ। ଉଠା ଜଳସେଚନ ପ୍ରକଳ୍ପ ମାଧ୍ୟମରେ ଶୁଷ୍କ ଜମିକୁ ଜଳସେଚନର ସୁବିଧା ମିଳିବ। https://t.co/ZYYcTtk9yo

— CMO Odisha (@CMO_Odisha) November 7, 2026

• ବହୁବିଧ ଫସଲ ଚାଷ ହେବା ସହାୟକ

କେବଳ କେନ୍ଦୁଝର ବ୍ଲକ୍ ନୁହେଁ, ବରଂ ମୟୂରଭଞ୍ଜ ଜିଲ୍ଲାର ଜାରକାଣୀ ଅଞ୍ଚଳର ପ୍ରାୟ ୨୭ ହଜାର ୭୫୪ ଜଣ ଚାଷୀ ଏଥିରୁ ସିଧାସଳଖ ଉପକୃତ ହେବେ । ଏହି ବିଶାଳ ଜଳସେଚନ ପ୍ରକଳ୍ପ ଚାଷୀଙ୍କୁ ମୌସୁମୀ ବର୍ଷା ଉପରେ ନିର୍ଭରଶୀଳତାରୁ ମୁକ୍ତ କରିବ । ବର୍ଷତମାମ ବହୁବିଧ ଫସଲ ଚାଷ ପାଇଁ ସୃଷ୍ଟି ହେବ ନୂଆ ସମ୍ଭାବନା, ଯାହା କୃଷି ଉତ୍ପାଦନ ବୃଦ୍ଧି କରିବା ସହ ଚାଷୀ ପରିବାରଙ୍କ ଆର୍ଥିକ ସ୍ଥିତିରେ ଆଣିବ ବଡ଼ ପରିବର୍ତ୍ତନ ।

ପଢନ୍ତୁ ଏହି ଖବର: ଭତ୍ତା ପାଇଁ ଅପେକ୍ଷାର ଯୁଗ ଶେଷ ! ୫ ଲକ୍ଷରୁ ଅଧିକ ହିତାଧିକାରୀଙ୍କୁ ମିଳିବ ଭତ୍ତା

• ନୂଆ ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ର ଉଦଘାଟିତ

ସେହିପରି ସ୍ୱାସ୍ଥ୍ୟ ସେବା କ୍ଷେତ୍ରରେ ବି ଆସିଛି ବଡ଼ ସୁଧାର । ଝୁମ୍ପୁରାଠାରେ ୧୭.୯୭ କୋଟି ଟଙ୍କା ବ୍ୟୟରେ ନବନିର୍ମିତ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଗୃହର ଉଦ୍‌ଘାଟନ କରିଛନ୍ତି ମୁଖ୍ୟମନ୍ତ୍ରୀ । ଏହାଦ୍ୱାରା ଗ୍ରାମୀଣ ଓ ଆଦିବାସୀ ଜନସାଧାରଣଙ୍କୁ ନିଜ ଅଞ୍ଚଳରେ ହିଁ ଉନ୍ନତମାନର ସ୍ୱାସ୍ଥ୍ୟସେବା ମିଳିପାରିବ। ସେହିପରି ରାଇକଳାଠାରେ ଷ୍ଟାଡିୟମ୍ ଓ ହାଇୟର ସେକେଣ୍ଡାରୀ ହାଇସ୍କୁଲ ପ୍ରତିଷ୍ଠା ଘୋଷଣା ସହ ଷ୍ଟେଟ୍‌ ବ୍ୟାଙ୍କର ନୂତନ ଶାଖା ଉଦ୍‌ଘାଟନ କରାଯାଇଛି । ଯାହା ଗ୍ରାମାଞ୍ଚଳରେ ଆର୍ଥିକ ଅନ୍ତର୍ଭୁକ୍ତିକରଣକୁ ଆହୁରି ମଜବୁତ୍ କରିବ । ଜଳସେଚନଠାରୁ ଆରମ୍ଭ କରି ସ୍ୱାସ୍ଥ୍ୟ, ଶିକ୍ଷା ଓ ଆର୍ଥିକ ସେବା - ଏହି ସମସ୍ତ ପ୍ରକଳ୍ପ କେନ୍ଦୁଝରର ଗ୍ରାମୀଣ ଜୀବନଧାରାରେ ନୂଆ ରୂପାନ୍ତର ଆଣିବା ସହ ଜିଲ୍ଲାର ସାମଗ୍ରିକ ବିକାଶକୁ ନୂଆ ଶିଖରକୁ ନେବ ।