Khadi Lagi Rituals / ଆସୁଛନ୍ତି ମହିଷାମର୍ଦ୍ଦିନୀ; ମା'ଙ୍କ ମୃଣ୍ମୟୀ ମୂର୍ତ୍ତିରେ ଲାଗିଲା ଖଡ଼ିରଙ୍ଗ

କଟକ/ଭୁବନେଶ୍ଵର: ଆଜି ପବିତ୍ର ମହାଳୟା ଅମାବାସ୍ୟା । ବିଧି ଓ ପରମ୍ପରା ଅନୁସାରେ ମା' ଦୁର୍ଗାଙ୍କ ମୃଣ୍ମୟୀ ମୂର୍ତ୍ତିରେ ଖଡ଼ିରଙ୍ଗ ଲାଗି କରାଯାଇଛି । କଟକର ସମସ୍ତ ପୂଜା ମଣ୍ଡପରେ ଖଡ଼ିଲାଗିବା ପରେ ମା'ଙ୍କୁ ରଙ୍ଗ ଲାଗି କରାଯିବ । ଅନ୍ୟପଟେ ମହାଳୟାରେ ଶକ୍ତିପୀଠମାନଙ୍କରେ ସ୍ୱତନ୍ତ୍ର ନୀତିକାନ୍ତି ସହ ଷୋଡଶ ଉପଚାର ପୂଜା ଅନୁଷ୍ଠିତ ହୋଇଛି । ଶରତକାଳୀନ ପୂଜାରେ ମା'ଙ୍କ ଅପୂର୍ବ ବେଶ ଦର୍ଶନ କରି କୃପାଲାଭ କରିଛନ୍ତି ଭକ୍ତ ଓ ଶ୍ରଦ୍ଧାଳୁ ।

ନନ୍ଦୋତ୍ସବରେ ମାଟି ଅନୁକୂଳ ପରେ ଏକମାଟିଆ ଓ ଦୋମାଟିଆ ସରିବା ପରେ ଆଜି ଜଗତଜନନୀଙ୍କ ମୃଣ୍ମୟୀ ମୂର୍ତ୍ତିରେ ଲାଗିହୋଇଛି ଖଡ଼ିରଙ୍ଗ । ବିଧି ଓ ପରମ୍ପରା ଅନୁଯାୟୀ ମହାଳୟା ଦିନ ପୂଜା ମଣ୍ଡପରେ ନିର୍ମିତ ମା'ଙ୍କ ମୂର୍ତ୍ତିରେ ଖଡ଼ିରଙ୍ଗ ଲାଗି କରାଯାଇଛି । ବିଭିନ୍ନ ପ୍ରାକୃତିକ ସାମଗ୍ରୀରୁ ପ୍ରସ୍ତୁତ ହୋଇଥିବା ଖଡ଼ିରଙ୍ଗ ମା'ଙ୍କୁ ଲାଗି କରାଯାଇଥାଏ । ଆସନ୍ତାକାଲିଠାରୁ ମୃଣ୍ମୟୀ ମୂର୍ତ୍ତିରେ ରଙ୍ଗ ଲାଗି କରାଯିବ । ପରେ ବସ୍ତ୍ର ପରିଧାନ ଓ ଅଳଙ୍କାରରେ ସୁସଜ୍ଜିତ ହେବେ ଦଶଭୂଜା ।

• ଚାଲିଛି ଷୋଡଶ ଉପଚାର ପୂଜା

ମହାଳୟାରେ କଟକର ଶକ୍ତିପୀଠଗୁଡ଼ିକରେ ଭକ୍ତ ଓ ଶ୍ରଦ୍ଧାଳୁଙ୍କ ଭିଡ଼ ଲାଗିଛି । କଟକର ଅଧିଷ୍ଠାତ୍ରୀ ମା' କଟକ ଚଣ୍ଡୀ ଓ ଗଡ଼ଚଣ୍ଡୀଙ୍କ ପୀଠରେ ସ୍ୱତନ୍ତ୍ର ପୂଜା ଅନୁଷ୍ଠିତ ହୋଇଛି । ଷୋଡଶ ଉପଚାର ପୂଜା ସହ ଚଣ୍ଡୀପାଠ ଓ ବେଦପାଠରେ ଏକ ଆଧ୍ୟାତ୍ମିକ ପରିବେଶ ସୃଷ୍ଟି ହୋଇଛି । ଏହାକୁ ନେଇ ଭକ୍ତଙ୍କ ମଧ୍ୟରେ ଦେଖାଦେଇଛି ଉତ୍ସାହ ଓ ଭକ୍ତିମୟ ପରିବେଶ।

ପଢନ୍ତୁ ଏହି ଖବର: ପାର୍ବଣ ପାଇଁ ଆକ୍ସନ୍ ମୋଡ୍‌ରେ କମିଶନରେଟ୍ ପୋଲିସ, ୧୮୫ ମଣ୍ଡପକୁ A, B, C କାଟାଗୋରୀରେ ବାଣ୍ଟିଲା ପୋଲିସ

• ଉତ୍ସବମୁଖର ରାଜଧାନୀ

ଦୁର୍ଗାପୂଜାକୁ ନେଇ ଉତ୍ସବମୁଖର ରାଜଧାନୀ ଭୁବନେଶ୍ୱର । କେଉଁଠି ଭବ୍ୟ ପେଣ୍ଡାଲ୍ ଓ ସାଜସଜ୍ଜା, ତ ଆଉ କେଉଁଠି ନିଆରା ପରମ୍ପରା ସାଙ୍ଗକୁ ସର୍ବଧର୍ମ ସମନ୍ୱୟର ବାର୍ତ୍ତା । କଳିଙ୍ଗ ଦୁର୍ଗାପୂଜାରେ ପ୍ରଥମଥର ପାଇଁ ଲେଜର୍ ଶୋ’ ଓ ୬୩ ଫୁଟ୍‌ର ରାବଣ ପୋଡ଼ି ରହିଛି ମୁଖ୍ୟ ଆକର୍ଷଣ । ଆମେରିକାର ନ୍ୟୁଜର୍ସିସ୍ଥିତ ସ୍ୱାମୀନାରାୟଣ ମନ୍ଦିରର ଢାଞ୍ଚାରେ ଏଠାରେ ତୋରଣ ନିର୍ମାଣ ହେଉଛି । ଅନ୍ୟପଟେ ଡିଷ୍ଟ୍ରିକ୍ଟ ସେଣ୍ଟର ଓନର୍ସ ଆସୋସିଏସନ ଦୁର୍ଗାପୂଜା କମିଟି ଦେଉଛି ସାମ୍ପ୍ରଦାୟିକ ସଦ୍‌ଭାବନାର ବାର୍ତ୍ତା । ଶେଷ ପର୍ଯ୍ୟାୟରେ ରାଜଧାନୀ ଏବଂ କଟକର ପୂଜା ପ୍ରସ୍ତୁତି ...ଭକ୍ତି, ପରମ୍ପରା ଆଉ ଭାଇଚାରାର ଏହି ମହାପର୍ବକୁ ନେଇ ଏବେ ସମସ୍ତଙ୍କର ଅପେକ୍ଷା ମା’ଙ୍କ ଆଗମନକୁ ।