Bomb Attack / ପରସ୍ପର ଉପରକୁ ବୋମା ଫିଙ୍ଗିଲେ ଦୁଇ ଭାଇ; ବଡ଼ ଭାଇ ମୃତ, ସାନ ଗୁରୁତର

ଭୁବନେଶ୍ଵର: ଅଧରାତିରେ ବୋମାମାଡ଼ । ଭାଇ ଉପରୁ ଭାଇ ଫିଙ୍ଗିଲା ବୋମା । ଭାଇ-ଭାଇ ବୋମାମାଡ଼ରେ ଜଣେ ଭାଇର ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଭାଇ ଗୁରୁତର ଆହତ ହୋଇଛନ୍ତି । ଗୁରୁତରଙ୍କୁ କ୍ୟାପିଟାଲ୍ ହସ୍ପିଟାଲ୍ ପରେ କଟକ ବଡ଼ ମେଡିକାଲ୍ ସ୍ଥାନାନ୍ତର କରାଯାଇଛି ।

ଖୋର୍ଦ୍ଧା ଜିଲ୍ଲା ଚନ୍ଦକା ଥାନା ଅନ୍ତର୍ଗତ ଅଙ୍ଗାରପଡ଼ା ପଞ୍ଚାୟତ ମହୁଲ ଗାଁରେ ବିଳମ୍ବିତ ରାତିରେ ବୋମାମାଡ଼ ହୋଇଛି । ଦୁଇ ଦୁଇଟି ବୋମାମାଡ଼ରେ ସ୍ଥାନୀୟ ଅଞ୍ଚଳ ଥରି ଉଠିଛି । ଦୁଇ ଭାଇଙ୍କ ମଧ୍ୟରେ ପ୍ରଥମେ ଝଗଡ଼ା ହୋଇଥିଲା । ଯାହାକୁ ନେଇ ଦୁଇ ଭାଇ ପରସ୍ପର ଉପରକୁ ବୋମା ଫିଙ୍ଗିଥିଲେ ।

ଏଥିସହ ପଢ଼ନ୍ତୁ: MKCG ସ୍ତ୍ରୀ ଏବଂ ପ୍ରସୂତି ବିଭାଗ OTର ଦ୍ୱିତୀୟ ମହଲାରେ ଅଗ୍ନିକାଣ୍ଡ 

ବୋମାମାଡ଼ରେ ବଡ଼ ଭାଇର ମୃତ୍ୟୁ ହୋଇଥିବା ବେଳେ ସାନ ଭାଇ ଗୁରୁତର ହୋଇଛନ୍ତି । ବଡ଼ ଭାଇ ମୋହନ ପାଢ଼ୀଙ୍କ ମୃତ୍ୟୁ ହୋଇଥିବା ବେଳେ ସାନ ଭାଇ ମଦନ ପାଢ଼ୀ ଗୁରୁତର ଆହତ ହୋଇଛନ୍ତି । ମଦନଙ୍କ ହାତ ଛିଡ଼ି ଯାଇଥିବା ଜଣାପଡ଼ିଛି ।

ବୋମାମାଡ଼ ଖବର ପାଇ ଘଟଣା ସ୍ଥଳରେ ପ୍ରଥମେ ଚନ୍ଦକା ଥାନା ଅଧିକାରୀ ଓ ପିସିଆର୍ ଟିମ୍ ପହଞ୍ଚିଥିଲେ । ପରେ ଜୋନ୍-୬ ଏସିପି, ସାଇଣ୍ଟିଫିକ୍ ଟିମ୍ ଓ ଭୁବନେଶ୍ବର ଡିସିପି କ୍ରାଇମ୍ ସ୍ପଟ୍‌ରେ ଛାନଭିନ୍ କରିଛନ୍ତି ।

ଗ୍ରାମବାସୀଙ୍କ ଅନୁସାରେ, ଦୁଇ ଭାଇ ମଦନ ଓ ମୋହନଙ୍କ ମଧ୍ୟରେ ମଙ୍ଗଳବାର ସନ୍ଧ୍ୟାରେ ଝଗଡ଼ା ହୋଇଥିଲା । ପରେ ପରିବାର ଲୋକ ଓ ଗ୍ରାମବାସୀ ଉଭୟଙ୍କୁ ବୁଝାସୁଝା କରିଥିଲେ । ପରେ ବିଳମ୍ବିତ ରାତିରେ ପୁଣି ଥରେ ଦୁଇ ଭାଇ ମୁହାଁମୁହିଁ ହୋଇଥିଲେ ।

ଝଗଡ଼ା ବଢ଼ିବା ପରେ ମଦନ ଓ ମୋହନ ପରସ୍ପର ଉପରକୁ ବୋମା ଫିଙ୍ଗିଥିଲେ । ଯେଉଁଥିରେ ବଡ଼ ଭାଇ ମୋହନଙ୍କ ମୃତ୍ୟୁ ହୋଇଥିବା ବେଳେ ଏବେ ସାନ ଭାଇ ମଦନ ମେଡିକାଲ୍ ବେଡରେ ଜୀବନ ମରଣ ସହ ସଂଗ୍ରାମ କରୁଛି । ଚନ୍ଦକା ଥାନା ପୋଲିସ ପରିବାର ଲୋକଙ୍କୁ ପଚରାଉଚରା କରିବା ସହ ବିଭିନ୍ନ ଦିଗକୁ ନେଇ ଛାନଭିନ୍ ଆରମ୍ଭ କରିଛି ।

ଏଥିସହ ପଢ଼ନ୍ତୁ: ଭସାଣି ବେଳେ ସଂଘବଦ୍ଧ ଆକ୍ରମଣ; ଚାଲିଗଲା ଦୋକାନୀଙ୍କ ଜୀବନ 

ଦୋକାନୀଙ୍କୁ ଭୁଜାଲି ମାଡ଼

ସେପଟେ ଭଦ୍ରକ ଗ୍ରାମାଞ୍ଚଳ ଥାନା ଅଧିନସ୍ଥ ରାଆନ୍ଦିଆ ପଞ୍ଚାୟତର ଜେନା ସାହିରେ ବୀଭତ୍ସ ହତ୍ୟାକାଣ୍ଡ ଘଟିଛି । ଦୁର୍ବୃତ୍ତ ସଂଘବଦ୍ଧ ଭାବେ ଲକ୍ଷ୍ମୀଧର ଜେନା ଓ ପର୍ଶୁରାମଙ୍କୁ ଭୁଜାଲି ଏବଂ କାଚ ବୋତଲରେ ଆକ୍ରମଣ କରିଥିଲେ । ପରିବାରର ଅଭିଯୋଗ ଅନୁସାରେ, ଦୁର୍ବୃତ୍ତଙ୍କ ଆକ୍ରମଣରେ ଘଟଣାସ୍ଥଳରେ ହିଁ ଲକ୍ଷ୍ମୀଧରଙ୍କ ମୃତ୍ୟୁ ହୋଇଛି । ପର୍ଶୁରାମ ଗୁରୁତର ଆହତ ହୋଇଥିବା ବେଳେ ତାଙ୍କୁ କଟକ ସ୍ଥାନାନ୍ତର କରାଯାଇଛି ।