Koraput Landslide / ପୁଣି ପାହାଡ଼ ଧସିଲା, ରାସ୍ତାରେ ଖସିଲା ବଡ଼ ବଡ଼ ପଥର

କୋରାପୁଟ: ଜିଲ୍ଲାର ପଟ୍ଟାଙ୍ଗିରୁ ନେରିଡ଼ିୱାଲସାକୁ ସଂଯୋଗ କରୁଥିବା ବ୍ରିଟିଶ ରୋଡ୍‌ରେ ପୁଣି ଭୂସ୍ଖଳନ । ପାହାଡ଼ରୁ ବଡ଼ ବଡ଼ ପଥର ଖସି ରାସ୍ତା ଉପରେ ପଡ଼ିଥିବାରୁ ଯାତାୟାତ ବାଧାପ୍ରାପ୍ତ ହୋଇଛି । ଫଳରେ ଯାତ୍ରୀ ଓ ଯାନବାହନ ଚଳାଚଳରେ ସମସ୍ୟା ଦେଖାଦେଇଛି । ତୁରନ୍ତ ପଥର ହଟାଇ ରାସ୍ତା ସ୍ୱାଭାବିକ କରିବାକୁ ଦାବି ହେଉଛି । ଅର୍ଣ୍ଣବ ବାତ୍ୟା ପରେ ଜିଲ୍ଲାରେ ଦ୍ଵିତୀୟ ଥର ଲାଗି ଭୂସ୍ଖଳନ ହୋଇଥିବାବେଳେ ତୁରନ୍ତ ରାସ୍ତା ସଫା କରିବାକୁ ଉଦ୍ୟମ ଚାଲିଛି ।

ବାତ୍ୟା ଅର୍ଣ୍ଣବ ପରେ କୋରାପୁଟରେ ମାଟି ଅତଡ଼ା ଖସିଥିଲା । ବାତ୍ୟା ପ୍ରଭାବରେ କୋରାପୁଟ ଜିଲ୍ଲାରେ ବର୍ଷା ଲାଗିରହିଥିଲା । ବର୍ଷା ଯୋଗୁଁ ସାଲୁର-ଶୁଙ୍କି ଘାଟିରେ ଭୂସ୍ଖଳନ ହୋଇଥିଲା । ବିଭିନ୍ନ ସ୍ଥାନରେ ପାହାଡ଼ରୁ ମାଟି ଅତଡ଼ା ଖସିଥିବା ବେଳେ ଭାଙ୍ଗିଥିଲା ଗାର୍ଡ ୱାଲ୍ । ଏଥିସହ ରାସ୍ତାରେ ଉପୁଡ଼ି ପଡ଼ିଥିଲା ଗଛ । ବର୍ଷା ଓ ଭୂସ୍ଖଳନ ଯୋଗୁଁ ଯାତାୟାତ ଉପରେ ପ୍ରଭାବ ପଡ଼ିବା ଆଶଙ୍କା ରହିଥିଲା । ସେହିପରି ଦେଓମାଳି ଯିବା ରାସ୍ତାରେ ମଧ୍ୟ ହୋଇଥିଲା ଭୂସ୍ଖଳନ ।

• ଗିଡିପାବାଲିରେ ଉଦ୍ଧାର କାର୍ଯ୍ୟ ଜୋରଦାର

ଅନ୍ୟପଟେ ବାତ୍ୟା ଅର୍ଣ୍ଣବ ପରେ ଗଞ୍ଜାମର ସୀମାନ୍ତ ଗିଡିପାବାଲି ଭୂସ୍ଖଳନ ସ୍ଥଳରେ ଜୋରଦାର ଚାଲିଛି ସର୍ଚ୍ଚ ଅପରେସନ । ଜି. ଉଦୟଗିରିର ତହସିଲଦାର ସମୁଦ୍ର ମିଶ୍ରଙ୍କ ନେତୃତ୍ୱ ଓଡ୍ରାଫ ଟିମ୍ ଓ ଫାୟାର ବ୍ରିଗେଡ ଟିମ୍ ସହ ଡିଭିଏଫର ଯବାନମାନେ ଏହି ସର୍ଚ୍ଚ ଅପରେସନ ଜାରି ରଖିଛନ୍ତି । ଓଡ୍ରାଫ ଓ ଅଗ୍ନିଶମ ବିଭାଗ ଯବାନମାନେ ହାତରେ ଫାଉଡା, ସାବଳ, ଗଇଁତି, ଦଉଡି, ବାଉଁଶ ସହାୟତାରେ ସର୍ଚ୍ଚ ଅପରେସନ କରାଯାଉଛି । ସର୍ଚ୍ଚ ଅପରେସନରେ ବାଧକ ସାଜୁଛି ବଡ଼ ବଡ଼ ପଥର ।

ପଢନ୍ତୁ ଏହି ଖବର: ଭୂସ୍ଖଳନ ମୃତାହତ ରୋକିବାକୁ ସରକାରଙ୍କ ବଡ଼ ପ୍ଲାନ୍; ସ୍ଥାନାନ୍ତର ହେବ ସମ୍ପୂର୍ଣ୍ଣ ଗାଁ

ପଥର ହଟାଇ ମାଟି ଖୋଳି ନିଖୋଜ ବ୍ୟକ୍ତିଙ୍କୁ ଖୋଜୁଛନ୍ତି ଯବାନ । ଆଜି ସର୍ଚ୍ଚ ଅପରେସନ ବେଳେ ମାଟି ତଳେ ପୋତି ହୋଇଥିବା ଗୋଟିଏ ଘରୁ ଧାନ ବସ୍ତା ବାହାରିବା ପରେ ସେହି ସ୍ଥାନରେ ମାଟି କଢାଯାଉଛି । ବର୍ତ୍ତମାନ ଗୋଟିଏ ମୃତଦେହ ଦେଖିବାକୁ ମିଳିଛି । ୧୧ ନିଖୋଜଙ୍କୁ ଖୋଜିବା ବାହାର କରିବାକୁ ଉଦ୍ୟମ ଜାରି ରହିଛି । ସେପଟେ ନିଖୋଜ ବ୍ୟକ୍ତିଙ୍କ ମୃତଦେହ ନେବାକୁ ଅପେକ୍ଷା କରିଛନ୍ତି ପରିବାର ସଦସ୍ୟ ।

• ଭୂସ୍ଖଳନ ପରେ ଆକ୍ସନ ମୋଡରେ ସରକାର

ଗିଡ଼ିପାବାଲି ଭୂସ୍ଖଳନ ପରେ ଆକ୍ସନ ମୋଡ଼ରେ ରାଜ୍ୟ ସରକାର । ପାହାଡ଼ ଉପରେ ଏବଂ ତଳେ ଥିବା ଲୋକଙ୍କ ସ୍ଥାନାନ୍ତରିତ ପାଇଁ ନିଷ୍ପତ୍ତି ନିଆଯାଇଛି । କନ୍ଧମାଳ ଏବଂ ଗଜପତି ଜିଲ୍ଲାରେ ଶହ ଶହ ପାହାଡ଼ ଅଛି । ଅନେକ ଭୂସ୍ଖଳନ ପଏଣ୍ଟ ରହିଛି । ସେସବୁ ସ୍ଥାନରେ ଲୋକଙ୍କୁ ସ୍ଥାନାନ୍ତରିତ କରାଯିବ । ତଳେ ଥିବା ଗାଁରେ ନୂଆ ବସ୍ତି ଏବଂ ଘର କରି ଯୋଗାଇଦେବେ ସରକାର । କେତେ ଲୋକ ପାହାଡ଼ ଉପରେ ଏବଂ ତଳେ ରହିଛନ୍ତି ତାର ସର୍ଭେ ଆରମ୍ଭ ହୋଇଛି । ଉତ୍ତର ପୂର୍ବ ରାଜ୍ୟକୁ ଆମ ଅଧିକାରୀମାନେ ଯାଇଥିଲେ । ଜନବସତି ଚିହ୍ନଟ ହେବା ପରେ ସେମାନଙ୍କୁ ସ୍ଥାନାନ୍ତରିତ ପାଇଁ ପ୍ରକ୍ରିୟା ଆରମ୍ଭ ହେବ । ଏବେ ଗିଡ଼ିପାବାଲିଠାରେ ଯେତିକି ଲୋକ ବଞ୍ଚିକି ଆସିଲେ ସେମାନେ କହୁଛନ୍ତି ତଳେ ଆମକୁ ରାଜ୍ୟ ସରକାର ଜାଗା ଦିଅନ୍ତୁ । ସେମାନଙ୍କୁ ଅନ୍ୟ ଜାଗାରେ ସରକାର ଘର ଦେବେ । ଅନ୍ତୋଦ୍ୟୟ ଯୋଜନାରେ ଘର ମିଳିବ ବୋଲି ରାଜ୍ୟ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ସୂଚନା ଦେଇଛନ୍ତି ।