ନାରାୟଣପାଟଣା (କୋରାପୁଟ): ସ୍କୁଲ୍‌ରେ ୮୦ ଜଣ ଛାତ୍ରଛାତ୍ରୀ ଅସୁସ୍ଥ । ବିଷାକ୍ତ ଖାଦ୍ୟ ଖାଇ ଅସୁସ୍ଥ ହୋଇ ପଡ଼ିଥିବା ସୂଚନା । କୋରାପୁଟ ଜିଲ୍ଲା ବନ୍ଧୁଗାଁ ବ୍ଲକ ବାଉଁଶପୁଟ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ଏଭଳି ଅଭାବନୀୟ ଘଟଣା ଘଟିଛି ।

ସୂଚନା ଅନୁସାରେ, ସକାଳ ପ୍ରାୟ ୯ଟା ସମୟରେ ଛାତ୍ରଛାତ୍ରୀଙ୍କୁ ଖାଦ୍ୟ ଖାଇବାକୁ ଦିଆ ଯାଇଥିଲା । ଖାଦ୍ୟ ଖାଇବା ପରେ ୮୦ରୁ ଅଧିକ ଛାତ୍ରଛାତ୍ରୀ ଅସୁସ୍ଥ ଅନୁଭବ କରିଥିଲେ । ଛାତ୍ରଛାତ୍ରୀ ଅସୁସ୍ଥ ଅନୁଭବ କରିବା ପରେ ବାଉଁଶପୁଟ ସ୍କୁଲ୍‌ରେ ଡାକ୍ତରୀ ଦଳ ପହଞ୍ଚି ଚିକିତ୍ସା କରୁଛନ୍ତି ।

ଏଥିସହ ପଢ଼ନ୍ତୁ: ଶ୍ରେଣୀଗୃହକୁ ବନ୍ଧୁକ ନେଇ ଆସିଲେ; ପୁଣି ପ୍ରଧାନଶିକ୍ଷକଙ୍କ ମୁଣ୍ଡରେ ରଖି ଧମକାଇଲେ ନବମ ଛାତ୍ର

୮୦ରୁ ଅଧିକ ଛାତ୍ରଛାତ୍ରୀ ଅସୁସ୍ଥ ହେବା ପରେ କିଛି ଅଭିଭାବକ ପିଲାଙ୍କୁ ଆସି ନେଇ ଯାଇଛନ୍ତି । ପ୍ରଥମେ ଅନୁମାନ କରାଯାଉଥିଲା, ରାତିରେ ବଳକା ରହି ଯାଇଥିବା ଖାଦ୍ୟକୁ ସକାଳେ ପିଲାଙ୍କୁ ଖାଇବାକୁ ଦିଆଯାଇଥିବାରୁ ସେମାନେ ଅସୁସ୍ଥ ହୋଇ ପଡ଼ିଛନ୍ତି । ତେବେ ସ୍କୁଲ୍ କର୍ତ୍ତୃପକ୍ଷ ବାସୀ ଖାଦ୍ୟ ଦିଆଯାଇଥିବା କଥାକୁ ଅସ୍ଵୀକାର କରିଛନ୍ତି ।

ସେପଟେ ଖାଦ୍ୟ ଖାଇ ଅସୁସ୍ଥ ହୋଇ ପଡ଼ିଥିବା ଛାତ୍ରଛାତ୍ରୀ ଝିଟିପିଟି ପଡ଼ିଥିବା କହିଛନ୍ତି । କିଛି ଛାତ୍ରୀଙ୍କ କହିବା ଅନୁସାରେ, ସେମାନେ ଖାଦ୍ୟ ଖାଇବା ବେଳେ ଥାଳିରେ ଝିଟିପିଟି ପଡ଼ିଥିବା ଦେଖିଥିଲେ । ତାପରେ ସେମାନେ ଖାଦ୍ୟ ନଖାଇ ଫିଙ୍ଗି ଦେଇଛନ୍ତି ।

ଏଥିସହ ପଢ଼ନ୍ତୁ: ସ୍କୁଲ୍ ଆଗରେ କଳା ରଙ୍ଗର କାର୍... ଚାଲାଣ ହେଉଥିଲା ପିଲାଙ୍କ ମଧ୍ୟାହ୍ନଭୋଜନ ଚାଉଳ

କିଛି ଛାତ୍ରଛାତ୍ରୀ ଖାଦ୍ୟ ଖାଇବା ମାତ୍ରେ ଅସୁସ୍ଥ ଅନୁଭବ କରିଥିଲେ । ୮୦ରୁ ଅଧିକ ଛାତ୍ରଛାତ୍ରୀଙ୍କ ଅସୁସ୍ଥ ଅନୁଭବ କରିବା ପରେ ଡାକ୍ତରୀ ଦଳ ପହଞ୍ଚି ଚିକିତ୍ସା କରିବା ସହ ଔଷଧ ଦେଉଛନ୍ତି । ଏବେ ବିଦ୍ୟାଳୟରେ ଛାତ୍ରଛାତ୍ରୀଙ୍କ ସ୍ଵାସ୍ଥ୍ୟାବସ୍ଥା ନିୟନ୍ତ୍ରଣାଧିନ ରହିଛି ।

ତେବେ ରୋଷେଇ ବେଳେ କେଉଁ ପରିସ୍ଥିତିରେ ଖାଦ୍ୟରେ ଝିଟିପିଟି ପଡ଼ିଲା ତାହା ସ୍ପଷ୍ଟ ହୋଇ ନାହିଁ । ତେବେ ରୋଷେୟାଙ୍କ ଅବହେଳାରୁ ଖାଦ୍ୟରେ ଝିଟିପିଟି ପଡ଼ି ଯାଇଥାଇପାରେ ବୋଲି ଅନୁମାନ କରାଯାଉଥିଲେ ହେଁ କିଛି ସ୍ପଷ୍ଟ ହୋଇ ନାହିଁ ।